រសៀលថ្ងៃទី ០៦ ខែមេសា ឆ្នាំ២០១៦ នៅទីស្តីការក្រសួង មានប្រារព្ធពិធីផ្ទេរតំណែងរដ្ឋមន្រ្តីក្រសួងសាធារណការ និងដឹកជញ្ជូន ក្រោមអធិបតីភាព ឯកឧត្តម ប៊ិន ឈិន ឧបនាយករដ្ឋមន្រ្តីប្រចាំការ និងជាប្រធានអាជ្ញាធរជាតិដោះស្រាយទំនាស់ដីធ្លី តំណាងដ៍ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ។
បន្ទាប់ពីឯកឧត្តម សង់ ស៊ីណាវ៉ុង អគ្គលេខាធិការរងរាជរដ្ឋាភិបាល បានអានព្រះរាជក្រឹត្យ តែងតាំង ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន រួចមក ឯកឧត្តម ត្រាំ អ៊ីវតឹក អតីតរដ្ឋមន្ត្រី ក្រសួងសាធារណការ និងដឹកជញ្ជូន បានមានប្រសាសន៍ថា ក្នុងរយៈពេល៣៧ឆ្នាំ ដែលរូបឯឧ បានបំរើការងារក្នុងវិស័យសាធារណការ និងដឹកជញ្ជូន ឯកឧត្តម ពិតជាមានមោទនភាពណាស់ និងមានមនោសញ្ចេតនាយ៉ាងជ្រាល់ជ្រៅ និងអនុស្សាវរីយ៍យ៉ាងច្រើន ដែលមិនអាចបំភ្លេចបាន ជាមួយនឹងសហសេវឹក មន្ត្រីរាជការក្រសួងសាធារណការ និងដឹកជញ្ជូន នៅទូទាំងប្រទេស ដែលបាននឹងកំពុងខិតខំបំពេញ និងអនុវត្តន៍ភារកិច្ចជំនាញយ៉ាងសកម្ម ក្នុងការសាងសង់ ថែទាំងជួសជុលផ្លូវស្ពាន ផ្លូវគោក ផ្លូវដែក ផ្លូវទឹក កំពង់ផែ ការគ្រប់គ្រងការងារពាក់ព័ន្ធ នឹងការដឹកជញ្ជូន និងសុវត្ថិភាពចរាចរណ៍។ ឯឧ ត្រាំ អ៊ីវតឹក មានប្រសាន៍បញ្ជាក់ថា បច្ចុប្បន្នយើងមានផ្លូវស្ពាន ដែលចាក់កៅស៊ូ ប្រទាក់ក្រឡាខ្វាត់ខ្វែង តភ្ជាប់ទៅគ្រប់ទីកន្លែងជិតឆ្ងាយ នៅទូទាំងប្រទេស និងភ្ជាប់ទៅនឹងប្រទេសជិតខាងក្នុងតំបន់។រាជរដ្ឋាភិបាលកម្ពុជា តែងចាត់ទុកវិស័យសាធារណការ និងដឹកជញ្ជូន គឺជាវិស័យអាទិភាព គឺជិតជាបានរួមចំណែក ជួយដល់រាជរដ្ឋាភិបាលក្នុងការសំរេចជោគជ័យលើកម្មវិធីនយោបាយ យុទ្ធសាស្ត្រចតុកោណដំណាក់កាលទី៣ នៃនីតិកាលទី៥ អាណត្តិរដ្ឋសភាជាតិ ក្នុងគោលដៅសមាហរណកម្ម និងការតភ្ជាប់ផ្ទៃក្នុងប្រទេស និងជាមួយប្រទេសក្នុងតំបន់ ដើម្បីបង្កើនភាពងាយស្រួល ក្នុងការធ្វើចរាចរណ៍ដឹកជញ្ជូន និងការអភិវឌ្ឍន៍លើគ្រប់វិស័យ ដែលនាំឲ្យសេដ្ឋកិច្ចជាតិ និងសេដ្ឋកិច្ចគ្រួសារ មានការរីកចំរើនពីមួយឆ្នាំទៅមួយឆ្នាំ យ៉ាងពិតប្រាកដ។
នៅក្នុងឱកាសនេះ ឯកឧត្តម ប៊ិន ឈិន ឧបនាយករដ្ឋមន្ត្រីប្រចាំការ បានអញ្ជើញទទួលត្រាពីឯឧ ត្រាំ អ៊ីវតឹក ព្រមទាំងបានអញ្ជើញប្រគល់ត្រា ដល់ឯកឧត្តម ស៊ុន ចាន់ ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ដែលទើបតែងតាំងថ្មី។
ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ថា ដោយបានទំនុកចិត្តពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សម្តេចបានចាត់តាំងឲ្យរូបឯឧ មកទទួលកិច្ចការបន្តពី ឯកឧត្តម ត្រាំ អ៊ីវតឹក ដែលនឹងត្រូវទទួលភារកិច្ចថ្មីនៅក្រសួងប្រៃសណីយ៍ និងទូរគមនាគមន៍។ នៅក្នុងឱកាសនេះ ឯឧទេសរដ្ឋមន្ត្រី ដែលទើបទទួលបានការតែងតាំងថ្មី បានធ្វើការប្តេជ្ញាចិត្តថា នឹងបន្តការងារ ដែលនៅសេសសល់ ដែលបានធ្វើហើយ តែមិនទាន់បានសម្រេចសព្វគ្រប់នៅឡើយ នឹងថែរក្សាស្នាដៃ និងសមិទ្ធិផលនានា ដែលឯឧ បានបន្សល់ទុក ជាមរតក សម្រាប់សង្គមជាតិយើង នឹងបន្តស្មារតី រួបរួមសាមគ្គីផ្ទៃក្នុងរឹងមាំ ជាមួយថ្នាក់ដឹកនាំគ្រប់រូប ឯឧ លោកជំទាវ លោកស្រី និងមន្ត្រីរាជការទាំងអស់ ក្នុងទិសដៅ ធ្វើយ៉ាងណាយើងរួមគ្នា ដើម្បីសម្រេចប្រយោជន៍ជូនសង្គមជាតិ របស់យើងទាំងអស់គ្នា នឹងបន្តជំរុញ ដឹកនាំក្រសួងសាធារណការ និងដឹកជញ្ជូន ឲ្យកាន់តែរីកចម្រើនថែមទៀត ប្រកបដោយការឆ្នាំប្រឌិត និងកែទម្រង់ស៊ីជម្រៅ ដើម្បីឆ្លើយតបនឹងតំរូវការរបស់សាធារណៈជនយើង ទន្ទឹមនឹងនេះ ឯឧក៏សុំការណែនាំ កិច្ចសហការណ៍ និងការជ្រោមជ្រែង ពីសំណាក់ ឯកឧត្តម លោកជំទាវ រដ្ឋលេខាធិការ ឯកឧត្តម លោកជំទា អនុរដ្ឋលេខាធិការ ឯកឧត្តម លោកជំទាវ លោក លោកស្រី មន្ត្រីរាជការទាំងអស់ផងដែរ។ ឯឧទេសរដ្ឋមន្ត្រី មានប្រសាសន៍បញ្ជាក់បន្តថា សម្តេចតេជោនាយករដ្ឋមន្ត្រី មានក្តីកង្វល់ជាខ្លាំ ទាក់ទងសេវាតម្រូវការរបស់ប្រជាពលរដ្ឋ ដូច្នេះ ដើម្បីឆ្លើយតបនឹងកង្វល់របស់ប្រមុខរាជរដ្ឋាភិបាល ឯកឧត្តម សូមស្នើ ឯកឧត្តម លោកជំទាវ លោក លោកស្រី និងមន្ត្រីរាជការក្រសួងសាធារណការ និងដឹកជញ្ជូនទាំងអស់ រួមគ្នាបង្កើតផែនការ ១០០ថ្ងៃ ជាយុទ្ធនាការ និងបេសកកម្មពិសេស ដើម្បីធ្វើឲ្យប្រសើរឡើងនូវ ការផ្តល់សេវាតម្រូវការជូនប្រជាពលរដ្ឋ។
នៅក្នុងឱកាសនេះ ឯកឧត្តម ប៊ិន ឈិន ឧបនាយករដ្ឋមន្ត្រីប្រចាំការ បានកោតសរសើរ និងវាយតម្លៃខ្ពស់ ចំពោះសន្ទរកថាលើកឡើងរបស់ឯឧរដ្ឋមន្ត្រី ត្រាំ អ៊ីវតឹក ហើយនិងការប្តេជ្ញាចិត្ត ក៏ដូចជាផែនការ១០០ថ្ងៃរបស់ ឯកឧត្តមទេសរដ្ឋមន្ត្រី ស៊ុន ចាន់ថុល ដែលឯកឧត្តម ទេសរដ្ឋមន្ត្រី ត្រូវបាទទួលតំណែងជារដ្ឋមន្ត្រីក្រសួងសាធារណការ និងដឹកជញ្ជូន នាថ្ងៃនេះ។ ឯឧ ឧបនាយករដ្ឋមន្ត្រីប្រចាំការ មានប្រសាសន៍បញ្ជាក់ថា កាលពីថ្ងៃទី៤ ខែមេសាកន្លងទៅនេះ គឺរដ្ឋសភាជាតិ បានគាំទ្រនៅការកែសម្រួលរាជរដ្ឋាភិបាលកម្ពុជា ហើយជាធម្មតាការកែការសម្រួលវាមិនមែនជារឿងដែលធំដុំនោះទេ ហើយវាក៏មិនមែនជារឿងផ្លាស់ប្តូរនោះទេ គឺគ្រាន់តែជារឿងផ្ទេរមុខដំណែងរវាង ឯកឧត្តម ត្រាំ អ៊ីវតឹក និងឯកឧត្តម ទេសរដ្ឋមន្ត្រី ស៊ុន ចាន់ថុល តែប៉ុណ្ណោះ។ ឯកឧត្តម ឧបនាយករដ្ឋមន្ត្រីប្រចាំការ ប៊ិន ឈិន បានមានប្រសាសន៍បញ្ជាក់ថា លើការងារដឹកនាំ គ្រប់គ្រង គឺមិនសំដៅតែទៅលើកម្រិតជំនាញខ្ពស់តែមួយមុខ ប៉ុណ្ណោះទេ គឺយើងត្រូវមានការស្វែងយល់ខ្ពស់ពីកម្រិតនយោបាយ និងត្រូវដឹងថា អ្វីដែលជាកត្តាដែលនាំឲ្យយើងមានជ័យជំនៈ។ ទន្ទឹមនឹងនេះ ក្រសួងមួយ អាចសម្រេចការងារជោគជ័យបាន គឺរដ្ឋបាល ត្រូវតែមានការត្រួតពិនិត្យ រដ្ឋបាលត្រូវតែមានផែនការ ហើយរឿងដែលធ្វើឲ្យយើងទទួលបានជោគជ័យមួយទៀត គឺមិនអត្តណោម័ត ហើយកត្តាមួយដែលសំខាន់មួយទៀត គឺប្រមូលផ្តុំសាមគ្គី។ នៅក្នុងឱកាសនេះ ឯឧបនាយករដ្ឋមន្ត្រីប្រចាំការ មានប្រសាសន៍បញ្ជាក់បន្ថែមថា ជោគជ័យ រឺបរាជ័យ បើគ្មានការចូលរួមពីថ្នាក់ដឹកនាំ មន្ត្រីរាជការ ក្រោមឱវាទ ហើយបើគ្មានការប្រមូលផ្តុំសាមគ្គីគ្នា និងការបំពេញការងារ ដោយឆន្ទៈទេនោះ ជោគជ័យគឺមិនអាចកើតមានឡើងបានឡើយ។ ឯឧឧបនាយករដ្ឋមន្ត្រីប្រចាំការ បានមានប្រសាសន៍បញ្ជាក់បន្ថែមទៀតថា ក្រសួងមួយ រឺអង្គភាពមួយ បើសិនជាថ្នាក់ដឹកនាំអាចប្រមូលផ្តុំសាមគ្គីគ្នាបាន វាគឺជាគំរូ សម្រាប់ថ្នាក់អគ្គនាយកដ្ឋាន ថ្នាក់នាយកដ្ឋាន និងដល់មន្ត្រីក្រោមឱវាទថ្នាក់មន្ទីរសាធារណការខេត្តក្រុង រឺក៏អាចរហូតដល់ស្រុកថែមទៀតផង ដូច្នេះការងារនេះ គឺយើងមិនមើលរំលងបានឡើយ។ ឆ្លៀតក្នុងឱកាសនេះ ឯកឧត្តម ឧបនាយករដ្ឋមន្ត្រីប្រចាំការ ប៊ិន ឈិន បានស្នើរឲ្យ ថ្នាក់ដឹកនាំ មន្ត្រីរាជការ នៃក្រសួងសាធារណការ និងដឹកជញ្ជូន ទាំងអស់ ត្រូវបន្តរូបរួមសាមគ្គី ឯកភាពផ្ទៃក្នុងឲ្យរឹតតែល្អប្រសើរឡើងថែមទៀត ដើម្បីសម្រេចបាន ជោគជ័យថ្មីៗថែមទៀត ទៅតាមផែនការកំណត់របស់រាជរដ្ឋាភិបាល គឺធ្វើឲ្យឆាប់ ធ្វើឲ្យបាន ធ្វើឲ្យឆាប់ ធ្វើឲ្យលឿន ហើយនិងធ្វើឲ្យមានតម្លាភាព។
