នៅថ្ងៃទី០៩ ខែមិថុនា២០១៦ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូន និងជាប្រធានក្រុមការងារថ្នាក់ជាតិចុះជួយស្រុកកោះធំ បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់អគារថ្មីនៃសាលាបឋមសិក្សាពិជ័យសាគរ ដែលមានទីតាំងស្ថិតនៅខាងក្នុងបរិវេណវត្ត ពិជ័យសាគរ ឃុំពោធិបាន ស្រុកកោះធំ ខេត្តកណ្តាល។
អគារថ្មីនេះមានកំពស់ពីរជាន់ មានចំនួនប្រាំបីបន្ទប់ ការសាងសង់បានចាប់ផ្តើមនៅថ្ងៃទី០១ ខែមេសាឆ្នាំ២០១៥ និងបានបញ្ចប់រួចរាល់នៅថ្ងៃទី៣០ ខែឧសភា ឆ្នាំ២០១៦ ដោយចំណាយថវិកាអស់ប្រមាណ ប្រាំមួយម៉ឺនដុល្លារ។
អគារថ្មីនេះជួយសម្រួលដល់ការរៀនសូត្ររបស់សិស្ស និងបាននាំមកនូវស្នាមញញឹមជូនដល់លោកគ្រូអ្នកគ្រូ សិស្សានុសិស្ស ឪពុកម្តាយ និងប្រជាជននៅក្នុងស្រុក។
ឯកឧត្តមទេសរដ្ឋមន្រ្តី ស៊ុន ចាន់ថុល បានគូសបញ្ជាក់ថាអគារថ្មីនេះ បូករួមជាមួយនឹងអគារសិក្សាប្រមាណ១៦៦ខ្នងផ្សេងទៀតនៅស្រុកកោះធំ គឺជាថ្នាលបណ្តុះគ្រាប់ពូជសន្តិភាព និងស្ថេរភាព ដែលបាននាំមកជូនដោយរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោហ៊ុនសែន។
