នៅព្រឹកថ្ងៃទី១០ ខែតុលា ឆ្នាំ២០១៦ នៅបណ្ឌិត្យសភានគរបាលកម្ពុជា ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានធ្វើបទបង្ហាញ មន្ត្រីនគរបាល និងនិស្សិតប្រមាណ៨៥០រូប។
ឯកឧត្តមឧត្តមសេនីយ៍ សេង ផល្លី ប្រធានបណ្ឌិត្យសភានគរបាលកម្ពុជា បានសម្តែងការកោតសរសើរ ចំពោះឯកឧត្តមទេសរដ្ឋមន្ត្រី ដែលបានអញ្ជើញចូលរួមពិធីសំណេះសំណាលនេះ និងបានជម្រាបជូនឯកឧត្តមទេសរដ្ឋមន្ត្រី និងសិក្ខាកាមទាំងអស់ អំពីទិសដៅជាយុទ្ធសាស្រ្តសំខាន់ៗ ចក្ខុវិស័យ សកម្មភាព សមិទ្ធិផល តួនាទី និងភារកិច្ចដែលទាក់ទងនឹងបណ្ឌិត្យសភានគរបាលកម្ពុជា។
ឯកឧត្តមទេសរដ្ឋមន្រ្តី បានជម្រាបជូនលម្អិតអំពី គំនិតផ្តួចផ្តើមកំណែទម្រង់សំខាន់ៗ សកម្មភាពនានា ដែលបានអនុវត្ត និងកំពុងអនុវត្តបន្ត នៅក្រសួងសាធារណការ និងដឹកជញ្ជូន។ ឯកឧត្តមទេសរដ្ឋមន្ត្រី បានគូសបញ្ជាក់អំពី កិច្ចខិតខំប្រឹងប្រែងកំណែទម្រង់ពាក់ព័ន្ធនឹង ការកាត់បន្ថយការចំណាយ លើការដឹកជញ្ជូន មណ្ឌលប្តូរ និងពន្យារបណ្ណបើកបរ នៅផ្សារទំនើប AEON Mall ប្រព័ន្ធស្វ័យប្រវត្តកម្មចុះបញ្ជីយានយន្ត ត្រួតពិនិត្យលក្ខណៈបច្ចេកទេសយានយន្ត ប្រឡង និងចេញប័ណ្ណបើកបរយានយន្ត ម៉ាស៊ីនត្រួតពិនិត្យ លក្ខណៈបច្ចេកទេសយានយន្តចល័ត ការគ្រប់គ្រងការដឹកជញ្ជូនលើសទម្ងន់ កម្រិតកំណត់ បញ្ហាសុវត្ថិភាពចរាចរណ៍ផ្លូវគោក និងវិធានការ និងចំណាត់ការសំខាន់ផ្សេងទៀត ដែលកំពុងត្រូវបានអនុវត្ត ដើម្បីស្តារ និងធ្វើឲ្យប្រសើរឡើងបន្ថែមទៀត ដល់ហេដ្ឋារចនាសម្ព័ន្ធផ្លូវថ្នល់ និងការតភ្ជាប់ ផ្លូវដែក ដឹកជញ្ជូនតាមផ្លូវទឹក និងកំពង់ផែ។
ឯកឧត្តមទេសរដ្ឋមន្រ្តី ស៊ុន ចាន់ថុល បានកត់សម្គាល់អំពី សារៈសំខាន់ នៃការអនុវត្តច្បាប់ដើម្បីប្រជាជាតិកាន់តែមានសុវត្ថិភាព និងវិបុលភាពថែមទៀត និងបានលើកទឹកចិត្តឲ្យសិក្ខាកាមទាំងអស់ ចូលរួមឲ្យបានសស្រាក់សស្រាំ ក្នុងការអនុវត្តច្បាប់ចរាចរណ៍ផ្លូវគោក ដើម្បីជួយកាត់បន្ថយគ្រោះថ្នាក់ចរាចរណ៍ និងការកកស្ទះចរាចរណ៍ នៅកម្ពុជា។
