នៅព្រឹកថ្ងៃទី២៤ ខែកុម្ភៈ ឆ្នាំ២០១៧ ឯកឧត្តម តូច ចាន់កុសល រដ្ឋលេខាធិការក្រសួងសាធារណការនិងដឹកជញ្ជូន បានដឹកនាំកិច្ចប្រជុំទ្វេភាគីអំពីកិច្ចសហប្រតិបត្តិការបច្ចេកទេសក្នុងវិស័យប្រព័ន្ធទឹកកខ្វក់រវាងក្រសួងសាធារណការ និងដឹកជញ្ជូនកម្ពុជា និងក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន ដែលរៀបចំឡើងនាយកដ្ឋានសំណង់ប្រព័ន្ធចម្រោះទឹកកខ្វក់។
ឯកឧត្តម តូច ចាន់កុសល បានគូសបញ្ជាក់ថា៖ សំណង់ប្រព័ន្ធចម្រោះទឹកកខ្វក់ដើរតួយ៉ាងសំខាន់ក្នុងការលើកស្ទួយសុខមាលភាពនិងជីវិតរបស់រស់នៅប្រចាំថ្ងៃរបស់ប្រជាពលរដ្ឋ។ ក្រោយពីនាយកដ្ឋានសំណង់ប្រព័ន្ធចម្រោះទឹកកខ្វក់រៀបចំរចនាសម្ព័ន្ធគ្រប់គ្រង និងប្រតិបត្តិរួចរាល់ហើយ ប្រព័ន្ធចម្រោះទឹកនិងសំណង់ប្រព្រឹត្តិកម្មចម្រោះទឹកកខ្វក់ថ្មីនេះនឹងរួមចំណែកដល់យុទ្ធសាស្ត្ររបស់រាជរដ្ឋាភិបាលកម្ពុជាក្នុងការពន្លឿនកំណើនប្រកបដោយវិជ្ជមាននៃសុខភាព និងសុមាលភាពរបស់ប្រជាជនកម្ពុជា។
វាគ្មិនមកពីមន្ទីរសាធារណការរាជធានីភ្នំពេញ វាគ្មិនមកពីក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន និងមកពីទីក្រុងគីតាគ្យឺសឺ បានផ្តោតសំខាន់ទៅលើវិធីសាស្ត្រប្រព្រឹត្តកម្មទឹកកខ្វក់ ក្នុងនោះមាន៖វិធីសាស្ត្រប្រព្រឹត្តកម្មទឹកកខ្វក់តាមប្រព័ន្ធCASP និងPTF។
