នៅថ្ងៃទី១៥ ខែសីហា ឆ្នាំ២០១៧ នៅទីស្តីការក្រសួងសាធារណៈការ និងដឹកជញ្ជូន ឯកឧត្តមទេសរដ្ឋមន្ត្រី ស៊ុន ចាន់ថុល បានជួបពិភាក្សាការងារជាមួយលោក Sugano Yuichi ប្រធានតំណាងអង្គការJICAប្រចាំកម្ពុជា ដោយមានការអញ្ជើញចូលរួមពីមន្ត្រីតំណាងមកពីក្រសួងសាធារណការនិងដឹកជញ្ជូន ធនាគារអភិវឌ្ឍន៍អាស៊ី ធនាគារពិភពលោក និងដៃគូអភិវឌ្ឍន៍ដទៃទៀត។
កិច្ចប្រជុំនេះផ្តោតជាសំខាន់លើផែនការមេនៃហេដ្ឋារចនាសម្ព័ន្ធដឹកជញ្ជូនរបស់កម្ពុជានិង របាយការណ៍សិក្សាបឋមដែលត្រូវបានធ្វើបង្ហាញដោយក្រុមជំនាញការរបស់អង្គការJICA។
ឯកឧត្តមទេសរដ្ឋមន្រ្តី ស៊ុន ចាន់ថុល បានជំរុញឱ្យក្រុមជំនាញរបស់អង្គការJICA ពន្លឿនការសិក្សា ផ្តល់ការវិភាគ និងលទ្ធផលរបស់ខ្លួនឱ្យបានឆាប់រហ័ស ដើម្បីអាចកំណត់នូវបញ្ហាអាទិភាពនានា ទាក់ទងនឹងការជួយបង្កើតផែនការមេភស្តុភារកម្មសម្រាប់កម្ពុជា។
