នៅថ្ងៃទី១៩ ខែកញ្ញា ឆ្នាំ២០១៦ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន ដោយមានការចូលរួមពី ឯកឧត្តម អ៊ុយ រី ប្រធានក្រុមប្រឹក្សា ខេត្តបាត់ដំបង និងឯកឧត្តម ច័ន្ទ សុផល អភិបាល នៃគណៈអភិបាលខេត្តបាត់ដំបង បានអញ្ជើញជួបសំណេះសំណាល ជាមួយមន្ត្រី នៃមន្ទីរសាធារណការ និងដឹកជញ្ជូនខេត្តបាត់ដំបង។
ឯកឧត្តមទេសរដ្ឋមន្រ្តី ស៊ុន ចាន់ថុល បានធ្វើបច្ចុប្បន្នភាព អំពីសមិទ្ធិផលការងារ សម្រេចបានសំខាន់ៗ និងកំណែទម្រង់ កំពុងបន្តរបស់ក្រសួងសាធារណការ និងដឹកជញ្ជូន។ សមិទ្ធិផលការងារសម្រេចបានទាំងនេះរួមមាន៖ បិតផ្លាកសុវត្ថិភាព (ស្ទីគ័រចំណាំងផ្លាតពន្លឺពេលយប់)ចំនួន៣.៤លានសន្លឹក យុទ្ធនាការបង្ក្រាបរថយន្ត ដឹកជញ្ជូនលើសទម្ងន់ កម្រិតកំណត់ រថយន្តត្រួតពិនិត្យលក្ខណៈបច្ចេកទេសចល័ត និងការដាក់ឲ្យដំណើរការមណ្ឌល ប្តូរ និងពន្យារបណ្ណបើកបរ នៅផ្សារទំនើប AEON Mall ភ្នំពេញ (ចំណាយពេលប្រមាណ១៥នាទី ដើម្បីទទួលបានបណ្ណបើកបរ)។
ជាមួយគ្នានេះផងដែរ ឯកឧត្តមទេសរដ្ឋមន្ត្រី បានគូសបញ្ជាក់អំពី ការអភិវឌ្ឍប្រព័ន្ធស្វ័យប្រវត្តកម្ម ក្នុងការផ្តល់សេវាសាធារណៈតាមអនឡាញ ដូចជា៖ ការចុះបញ្ជីប័ណ្ណបើកបរ ការចុះបញ្ជីយានយន្ត និងការផ្ទេរកម្មសិទ្ធិយានយន្ត ព្រមទាំងការត្រួតពិនិត្យ លក្ខណៈបច្ចេកទេសយានយន្ត ការសាងសង់ច្រកព្រំដែនស្ទឹងបត់ សម្រាប់នីតិវិធីគយ ការជួសជុល និងការតភ្ជាប់ហេដ្ឋារចនាសម្ព័ន្ធផ្លូវដែក ការធ្វើឲ្យប្រសើរឡើង ដល់គុណភាព នៃការសាងសង់ផ្លូវថ្នល់ និងការប្តូរនីតិវិធីនៃការជួសជុលផ្លូវថ្នល់ ទៅធ្វើនៅពេលយប់ តាមទីតាំងទាំងឡាយណា ដែលមានការកកស្ទះចរាចរណ៍ខ្លាំង។
ឯកឧត្តមទេសរដ្ឋមន្រ្តី បានជំរុញលើកទឹកចិត្ត ឲ្យមន្ត្រីទាំងអស់ បន្តផ្តល់សេវាសាធារណៈ ជូនប្រជាពលរដ្ឋកម្ពុជា ឲ្យបានឆាប់រហ័ស និងប្រកបដោយតម្លាភាព។
ក្រោយពិធីជួបសំណេះសំណាលរួចមក ឯកឧត្តមទេសរដ្ឋមន្ត្រី ស៊ុន ចាន់ថុល បានប្រគល់កៅស៊ូត្រជាក់ Cold Mix Asphalt Concrete ចំនួន៥តោន ដល់មន្ទីរសាធារណការ និងដឹកជញ្ជូន ខេត្តបាត់ដំបង ព្រមទាំងបានដឹកនាំធ្វើការសាកល្បង ជួសជុលសំបុកមាន់ មួយចំនួននៅក្នុងទីក្រុង។ ផលិតផលនេះ ផលិតនៅប្រទេសជប៉ុន អាចប្រើដើម្បីប៉ះសំបុកមាន់ នាគ្រប់រដូវ និងប្រើពេលតិចជាងវិធីសាស្ត្រ និងវត្ថុធាតុដែលធ្លាប់បានប្រើ នាពេលកន្លងមក។
