នៅថ្ងៃទី២៧ ខែកញ្ញា ឆ្នាំ២០១៦ នៅទីស្តីការក្រសួងសាធារណការនិងដឹកជញ្ជូន ឯកឧត្តមទេសរដ្ឋមន្ត្រី ស៊ុន ចាន់ថុល បានជួបពិភាក្សាការងារជាមួយសិល្បករសិល្បការនីខ្មែរនិងអ្នកជំនាញខាងផ្នែកផលិតកម្ម រួមទាំងតារាល្បីៗចំនួនដូចជា៖ លោកស្រី ឌីសាវ៉េត លោក ខេមរៈ សេរីមន្ត កញ្ញា សុគន្ធនីសា លោកស្រី ឡូរ៉ា ម៉ម និងលោកស្រី ណាក់ ស្រីណា និងលោក ណាខន។
កិច្ចប្រជុំនេះ ក៏មានការអញ្ជើញចូលរួមផងដែរ ពីអ្នកតំណាងមកពីសហភាពសហព័ន្ធយុវជនកម្ពុជា(UYFC) ក្រុមហ៊ុនខ្មែរមេគង្គKMF(Khmer Mekong Films) ផលិតកម្មOctopus និងក្រុមហ៊ុនផ្នែកទំនាក់ទំនងសាធារណៈ Brains Communication (តំណាងឱ្យAPISWA – សមាគមស្រាអន្តរជាតិអាស៊ីប៉ាស៊ីហ្វិច ដែលជាអ្នកឧបត្ថម្ភធំប្រកបដោយសក្តានុពលនៃគំនិតផ្តួចផ្តើមនេះ)។
គោលបំណងនៃកិច្ចប្រជុំនេះ គឺដើម្បីពិភាក្សាអំពីការត្រៀមរៀបចំគំនិតផ្តួចផ្តើមយល់ដឹង អំពី សុវត្ថិភាពចរាចរណ៍ផ្លូវគោកថ្នាក់ជាតិមួយ នៅក្នុងគោលបំណងដើម្បីអប់រំពលរដ្ឋឱ្យមានការយល់ដឹងអំពីសុវត្ថិភាពចរាចរណ៍ផ្លូវគោកមានគោលដៅកាត់បន្ថយគ្រោះថ្នាក់ចរាចរណ៍ ការរងរបួស និងស្លាប់ដោយសារគ្រោះថ្នាក់ចរាចរណ៍។
ឯកឧត្តមទេសរដ្ឋមន្រ្តី បានសម្តែងអំណរគុណ និងការកោតសរសើរចំពោះអ្នកចូលរួមទាំងអស់ ដែលបានផ្តល់មតិយោបល់ ប្រកបដោយការច្នៃប្រឌិតនេះ មកឱ្យក្រសួងវិញ និងរៀបចំបង្កើតកម្មវិធីសុវត្ថិភាពចរាចរណ៍ ដែលបង្កផលប៉ះពាល់យ៉ាងខ្លាំងនេះ។
