នៅថ្ងៃទី២៧ ខែកញ្ញា ឆ្នាំ២០១៦ នៅទីស្តីការក្រសួងសាធារណការ និងដឹកជញ្ជូន ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញដឹកនាំកិច្ចប្រជុំគណៈកម្មាធិការអន្តរក្រសួងជាមួយគណៈប្រតិភូវេទិកាសេដ្ឋកិច្ចពិភពលោកសម្រាប់ការត្រៀមរៀបចំវេទិកាសេដ្ឋកិច្ចពិភពលោក ស្តីពី អាស៊ាន ដែលកម្ពុជាគ្រោងធ្វើជាម្ចាស់ផ្ទះនៅក្នុងខែឧសភា ឆ្នាំ២០១៧ខាងមុខនេះ។
គោលបំណងនៃកិច្ចប្រជុំនេះ គឺដើម្បីកែសម្រួល និងបញ្ចប់សេចក្តីព្រាងនៃកិច្ចព្រមព្រៀងមេ និងកិច្ចព្រមព្រៀងបន្ថែមសម្រាប់វេទិកាសេដ្ឋកិច្ចពិភពលោកស្តីពីអាស៊ាន។
ឯកឧត្តមទេសរដ្ឋមន្រ្តី បានស្នើឱ្យគណៈកម្មាធិការ និងអនុគណៈកម្មាធិការជំនាញជួបប្រជុំពិភាក្សាជាមួយសមភាគីរបស់ខ្លួនមកពីវេទិកាសេដ្ឋកិច្ចពិភពលោក ដើម្បីពិភាក្សានិងការផ្លាស់ប្តូរយោបល់បន្ថែមទាក់ទងនឹងការរៀបចំវេទិកាសេដ្ឋកិច្ចពិភពលោក ស្តីពីកិច្ចប្រជុំកំពូលអាស៊ាន ដែលនឹងប្រព្រឹត្តទៅនៅរាជធានីភ្នំពេញ ក្នុងខែឧសភា ឆ្នាំ២០១៧។
