ថ្ងៃទី១៦ ខែធ្នូ ឆ្នាំ២០១៦ នៅក្នុងកំឡុងពេលនៃកិច្ចប្រជុំលើកទី៥ នៃគណៈកម្មាធិការរួមសម្រាប់កិច្ចព្រមព្រៀងសម្របសម្រួលការដឹកជញ្ជូនឆ្លងកាត់ព្រំដែន នៃមហាអនុតំបន់មេគង្គ នៅទីក្រុងឈៀងម៉ៃ ប្រទេសថៃ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្រ្តីក្រសួងសាធារណការ និងដឹកជញ្ជូន និងឯកឧត្តម Arkhom Termpittayapaisith រដ្ឋមន្រ្តីដឹកជញ្ជូនថៃ បានចុះហត្ថលេខាលើ កិច្ចព្រមព្រៀង និងសេចក្តីបន្ថែម នៃអនុស្សរណៈយោគយល់គ្នា ។
ដូចខាងក្រោម៖
១. កិច្ចព្រមព្រៀងរវាងរាជរដ្ឋាភិបាលកម្ពុជា និងរដ្ឋាភិបាលនៃព្រះរាជាណាចក្រថៃ ស្តីពីការ សាងសង់ស្ពានឆ្លងកាត់ព្រំដែន ស្ទឹងបត់-បានណងអៀង។
រដ្ឋាភិបាលនៃព្រះរាជាណាចក្រថៃ បានផ្តល់ជំនួយឥតសំណងសម្រាប់សាងសង់ស្ពាន ផ្នែកស្ថិតនៅលើទឹកដីកម្ពុជា និងកម្ចីសម្បទានសម្រាប់សាងសង់ហេដ្ឋារចនាសម្ព័ន្ធ និង បរិក្ខារនៅច្រកទ្វារព្រំដែនថ្មី និងផ្លូវតភ្ជាប់ពីច្រកនេះទៅផ្លូវជាតិលេខ ៥ ដែលជាផ្នែក មួយនៃផ្លូវអាស៊ានហាយវ៉េលេខ ១។
២. សេចក្តីបន្ថែមទី២ នៃអនុស្សរណៈយោគយល់គ្នា រវាងរាជរដ្ឋាភិបាលកម្ពុជា និងរដ្ឋាភិបាល នៃព្រះរាជាណាចក្រថៃ ស្តីពីការផ្លាស់ប្តូរសិទ្ធិធ្វើចរាចរណ៍ដឹកជញ្ជូនឆ្លងកាត់ព្រំដែន តាមច្រកទ្វារព្រំដែន ប៉ោយប៉ែត-អារញ្ញប្រាថេត។
