នៅថ្ងៃពុធ ទី២៦ ខែមេសា ឆ្នាំ២០១៧ ឯកឧត្តមទេសរដ្ឋមន្រ្តី ស៊ុន ចាន់ថុល បានអញ្ជើញដឹកនាំកិច្ចប្រជុំប្រចាំសប្តាហ៍ទីបួន ជាមួយនឹងមន្រ្តីជាន់ខ្ពស់ក្រសួងសាធារណការ និងដឹកជញ្ជូន។
កិច្ចប្រជុំនេះផ្តោតជាសំខាន់លើបញ្ហា និងភាពប្រឈមមួយចំនួនទាក់ទងនឹងការបង្កើតក្រុមប្រឹក្សាជាតិភស្តុភារកម្មនិងគណៈកម្មការតម្រង់ទិសភស្តុភារកម្ម។
ឯកឧត្តមទេសរដ្ឋមន្ត្រី បានពិភាក្សាអំពីនីតិវិធីនានាទាក់ទងនឹងការចេញអាជ្ញាបណ្ណផ្លូវថ្នល់ និងបានគូសបញ្ជាក់ថា៖ ក្រុមហ៊ុនពាក់ព័ន្ធទាំងឡាយចាំបាច់ត្រូវអនុវត្តភារកិច្ចរបស់ខ្លួនប្រកបដោយតម្លាភាព និងដោយគ្មានការរើសអើង។
ឯកឧត្តមទេសរដ្ឋមន្ត្រី បានជំរុញឱ្យមន្ត្រីក្រសួងសាធារណការនិងដឹកជញ្ជូនធ្វើការផ្សព្វផ្សាយព័ត៌មានស្តីអំពីប្រព័ន្ធស្វ័យប្រវត្តិកម្មក្រសួងឱ្យបានច្រើនបន្ថែមទៀតដើម្បីឱ្យបងប្អូនប្រជាពលរដ្ឋមកទទួលយកសេវាសាធារណៈ ដែលកាន់តែមានភាពងាយស្រួល និងលឿនជាងមុន។
