នៅថ្ងៃទី១៦ ខែវិច្ឆិកា ឆ្នាំ២០១៧ នៅសណ្ឋាគារសាន់វេ រាជធានីភ្នំពេញ ឯកឧត្តម សេង ឈួន អនុរដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងសិក្ខាសាលាស្តីអំពី “គោលនយោបាយចំណូលរយៈពេលមធ្យម និងយុទ្ធសាស្ត្រកៀរគរចំណូល” ដោយមានការចូលរួមពី មន្ត្រីជាន់ខ្ពស់ក្រសួងសាធារណការនិងដឹកជញ្ជូន តំណាងក្រសួងសេដ្ឋកិច្ចនិងហិរញ្ញវត្ថុ គ្រូបង្គោល និងមន្រ្តីនៃមន្ទីរសាធារណការនិងដឹកជញ្ជូនរាជធានីខេត្ត។
សិក្ខាសាលានេះ រៀបចំឡើងដោយក្រសួងសាធារណការ និងដឹកជញ្ជូន សហការជាមួយក្រសួងសេដ្ឋ កិច្ច និងហិរញ្ញវត្ថុ ដើម្បីផ្សព្វផ្សាយទូលំទូលាយ សំដៅបង្កើនការយល់ដឹង និងរួមចំណែកក្នុងការ រៀបចំការអនុវត្តចំណូល ការតាមដានគ្រប់គ្រង ការកត់ត្រានូវចំណូលដែលប្រមូលបាន ព្រមទាំង ពង្រីកការផ្តល់សេវាសាធារណៈប្រកបដោយតម្លាភាព គណនេយ្យភាព ប្រសិទ្ធភាព សន្សំសំចៃ និងទាន់ពេលវេលា សមស្របតាមជំហាននៃកម្មវិធីកែទម្រង់ហិរញ្ញវត្ថុសាធារណៈ ដំណាក់កាលទី៣។
ថ្លែងនៅក្នុងសុន្ទរកថានោះដែរ ឯកឧត្តម ឈួន វិន បានជំរុញឱ្យមានការចូលរួមពីក្រុមការងាររៀបចំ ថវិការបស់អគ្គនាយកដ្ឋាន និងនាយកដ្ឋានពាក់ព័ន្ធក្រោមឱវាទក្រសួង ដើម្បីសម្រេចឲ្យបានតាម ទិសដៅ ដែលបានដាក់ចេញនៅក្នុងយុទ្ធសាស្ត្រកៀរគរចំណូលរយៈពេលមធ្យម(ឆ្នាំ២០១៤-២០១៨) ស្របតាមក្របខណ្ឌនៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ។
វគ្គសិក្ខាសាលានេះ មានការពិភាក្សាយ៉ាងផុលផុស ដើម្បីស្វែងយល់បញ្ហាជាគន្លឺះទាំងឡាយ ក្រោយបញ្ចប់វគ្គសិក្ខាសាលានេះ សិក្ខាកាមទាំងអស់ទទួលបាននូវការយល់ដឹងថ្មីបន្ថែមទៀត សម្រាប់យកទៅអនុវត្តការងារចំណូលសំដៅលើកកម្ពស់គុណភាព និងពង្រីកការទទួលបាននូវភាពពេញចិត្ត និងប្រសិទ្ធភាពនៃសេវាសាធារណៈថែមទៀត ស្របតាមការកែទម្រង់របស់ក្រសួង។
