នៅថ្ងៃទី៣ ខែឧសភា ឆ្នាំ២០១៦ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធី ចុះហត្ថលេខាលើកិច្ចព្រមព្រៀងគម្រោង សម្រាប់ការជួសជុល ស្ពានមិត្តភាពកម្ពុជា-ជប៉ុន (ជ្រោយចង្វារ) រវាង ក្រសួងសាធារណការ និងដឹកជញ្ជូន និងសាជីវកម្ម Central Consultant Inc, ដែលតំណាងដោយលោក Teruo Nakagawa ប្រធានទីប្រឹក្សា។

ឯកឧត្តមទេសរដ្ឋមន្រ្តី បានសម្តែងការកោតសរសើរចំពោះកិច្ចសហប្រតិបត្តិការ និងអបអរសាទរចំពោះក្រុមហ៊ុន ដែលត្រូវបានជ្រើសរើស ជាក្រុមហ៊ុន ទីប្រឹក្សាជំនាញ សម្រាប់គម្រោងនេះ ដោយអង្គការ JICA។

ស្ពានមិត្តភាពកម្ពុជា-ជប៉ុន (ជ្រោយចង្វារ) ត្រូវបានកសាងឡើង ពីឆ្នាំ១៩៦០ រហូតដល់ឆ្នាំ ១៩៦៣ ដែល មានប្រវែង ១.០៨០ម៉ែត្រ និងទទឹង ១៣ម៉ែត្រ។ ស្ពាននេះត្រូវបានបំផ្លាញនៅក្នុង ឆ្នាំ១៩៧២ និងត្រូវបានជួសជុលឡើងវិញនៅឆ្នាំ១៩៩៤។ នៅឆ្នាំ២០១៤ អ្នកជំនាញអង្គការ JICA បានរកឃើញថា៖ ស្ពាននេះត្រូវបានខូចខាតផ្នែកខ្លះ ដែលចាំបាច់ត្រូវជួសជុលឡើងវិញ។ ដោយសារស្ពាននេះ ដើរតួនាទីជាសរសៃឈានដ៏មានសំខាន់ សម្រាប់ការដឹកជញ្ជូន រាជរដ្ឋាភិបាលកម្ពុជា និងរដ្ឋាភិបាលជប៉ុន បានព្រមព្រៀងគ្នាដើម្បីជួសជុលស្ពាននេះឡើងវិញក្រោមគម្រោងជំនួយឥតសំណងរបស់ជប៉ុន។ គម្រោងដែលត្រូវ ចំណាយជាទឹកប្រាក់ ៣០លានដុល្លារសហរដ្ឋអាមេរិកនេះ ត្រូវបានអនុវត្តដោយអង្គការJICA ដែលនឹងត្រូវបញ្ចប់ក្នុងរយៈពេល ២២ខែ។

នៅថ្ងៃទី០៣ ខែឧសភា ឆ្នាំ២០១៦ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានជួបពិភាក្សាការងារជាមួយ លោក George Yeo ប្រធាន ក្រុមហ៊ុន Kerry Logistics Network។

ឯកឧត្តមទេសរដ្ឋមន្រ្តី បានគូសបញ្ជាក់អំពីរបៀបដែល វិស័យដឹកជញ្ជូន ដើរតួនាទីយ៉ាងសំខាន់ ក្នុងការអភិវឌ្ឍកម្ពុជា។ ឯកឧត្តមទេសរដ្ឋមន្ត្រី បានស្វែងរកការគាំទ្រ និងកិច្ចសហការពីក្រុមហ៊ុនដើម្បីកាត់បន្ថយចំណាយលើការដឹកជញ្ជូននៅកម្ពុជា។

ឯកឧត្តមទេសរដ្ឋមន្ត្រី ស៊ុន ចាន់ថុល បានសម្តែងការប្តេជ្ញាចិត្ត ក្នុងការធ្វើការយ៉ាងជិតស្និទ្ធ ជាមួយវិស័យឯកជន ដើម្បីកាត់បន្ថយ ការចំណាយលើការដឹកជញ្ជូន និងបានជម្រាបជូន លោកប្រធានក្រុមហ៊ុនថា៖ ក្រសួងកំពុងបង្កើតក្រុមប្រឹក្សាផ្តល់យោបល់ ពិសេសមួយ ដែលជាក្រុមប្រឹក្សាដឹកជញ្ជូន ដើម្បីសម្របសម្រួលកិច្ចសហប្រតិបត្តិការ រវាងក្រសួងពាក់ព័ន្ធ ក្នុងការលើកកម្ពស់ និងពង្រឹងការដឹកជញ្ជូន នៅក្នុងប្រទេសកម្ពុជា។

លោក Yeo បានសម្តែងការគាំទ្រ និងការប្តេជ្ញាចិត្តយ៉ាងមុតមាំរបស់ខ្លួន ដើម្បីជួយដល់ក្រសួង ក្នុងការកាត់បន្ថយការចំណាយដឹកជញ្ជូន និងការពង្រឹងហេដ្ឋារចនាសម្ព័ន្ធដឹកជញ្ជូន នៅក្នុងប្រទេសកម្ពុជា។

ដោយហេតុថាហេដ្ឋារចនាសម្ព័ន្ធ កំពុងក្លាយជាផ្នែកមួយដ៏មានសារៈសំខាន់ ឆ្ពោះទៅកាន់ ការអភិវឌ្ឍប្រទេសប្រកបដោយជោគជ័យ ក្រុមហ៊ុន Kerry Logistics Network សហការជាមួយក្រុមហ៊ុន Worldbridge Networks បានបង្កើតតំបន់សេដ្ឋកិច្ចពិសេស Kerry Worldbridge (KW SEZ) នៅក្រុងតាខ្មៅ ខេត្តកណ្តាល។

នៅថ្ងៃពុធ ទី០៤ ខែឧសភា ឆ្នាំ២០១៦ នៅទីស្តីការក្រសួងសាធារណការ និងដឹកជញ្ជូន ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្រ្តីក្រសួងសាធារណការ និងដឹកជញ្ជូន បានដឹកនាំកិច្ចប្រជុំសបា្តហ៍ដែលប្រព្រឹត្តទៅជាទៀងទាត់ ជាមួយថ្នាក់ដឹកនាំរបស់ក្រសួង។

កិច្ចប្រជុំនេះបានពិភាក្សាអំពី ការវិវឌ្ឍនៃដំណើរការរៀបចំ ទីតាំងប្តូរប័ណ្ណបើកបរនៅផ្សារទំនើបអ៊ីអន(AEON) ដែលនឹងដាក់ដំណើរការ នៅដើមខែមិថុនា ឆ្នាំ២០១៦ខាងមុខនេះ។ កិច្ចប្រជុំនេះ ក៏បានរាយការណ៍ជូនផងដែរ ពីការសិក្សារៀបចំប្រព័ន្ធស័្វយប្រវត្តិកម្ម ក្នុងការចុះបញ្ជីប័ណ្ណបើកបរ, ការចុះបញ្ជីយានយន្ត, និងការត្រួតពិនិត្យបច្ចេកទេសយានយន្ត ដើម្បីធ្វើឲ្យប្រសើរឡើងដល់សេវាសាធារណៈជូនប្រជាពលរដ្ឋ ។ ប្រព័ន្ធនេះ នឹងក្លាយជាទៅជាគន្លឹះដោះស្រាយបញ្ហា ក្នុងការជំរុញឲ្យមានតម្លាភាព សន្សំពេលវេលា និងកាត់បន្ថយការចំណាយរបស់ប្រជាពលរដ្ឋចំពោះសេវាសាធារណៈ ដែលផ្តល់ដោយក្រសួងសាធារណការ និងដឹកជញ្ជូន។

ឯកឧត្តមទេសរដ្ឋមន្រ្តី បានជំរុញក្រុមការងារ ដែលទទួលបន្ទុកអោយដាក់បន្ថែមសេវាត្រួតពិនិត្យបច្ចេកទេសយានយន្ត ដល់ថ្នាក់ខេត្តបន្ថែមទៀត ដើម្បីបង្ខិតសេវាឱ្យទៅជិតប្រជាពលរដ្ឋ។ គំនិតផ្តួចផ្តើមនេះ នឹងជួយសម្រួលដល់ម្ចាស់យានយន្តទាំងអស់ ក្នុងការស្នើសុំសេវាត្រួតពិនិត្យបច្ចេកទេសយានយន្ត នៅទីតាំងក្នុងខេត្តរបស់ខ្លួន ឬនៅខេត្តជិតៗនោះ។ ឯកឧត្តមទេសរដ្ឋមន្រ្តីបានបន្ថែមថា សកម្មភាពទាំងនេះ គឺជាផ្នែកមួយនៃផែនការ ១០០ថ្ងៃ របស់ក្រសួងសាធារណការ និងដឹកជញ្ជូន។

ដំណើរការកសាងច្រកព្រំដែនស្ទឹងបត់ ក៏ត្រូវបានលើកយកមកពិភាក្សាផងដែរ។ រថយន្តដឹកទំនិញ នឹងតម្រូវឱ្យឆ្លងកាត់ច្រកថ្មីនេះ ដើម្បីពិនិត្យ បំពេញសំណុំបែបបទផ្លូវការ និងបង់ពន្ធគយ។ ច្រកនេះ នឹងជួយកាត់បន្ថយការកកស្ទះ នៅច្រកព្រំដែនប៉ោយប៉ែតផងដែរ។

របៀបវារៈសំខាន់មួយទៀត គឺការពិភាក្សាអំពី របាយការណ៍ស្តីពី សំណូមពរ និងមតិយោបល់របស់សាធារណជន និងដំណោះស្រាយរបស់ក្រសួងសាធារណការ និងដឹកជញ្ជូន ដែលឆ្លុះបញ្ចាំងពី គោលនយោបាយថ្នាក់ជាតិរបស់រាជរដ្ឋាភិបាល ទាក់ទងនឹងវិស័យសាធារណការ និងដឹកជញ្ជូន។

ឯកឧត្តមទេសរដ្ឋមន្រ្តី ក៏បានស្នើឱ្យនាយកដ្ឋានទាំងអស់ពិនិត្យឡើងវិញ និង រៀបចំនីតិវិធីការងារក្នុងនាយកដ្ឋានរបស់ខ្លួន ដើម្បីកាត់បន្ថយពេលវេលា និងការរាំងស្ទះនានា។

ជាកិច្ចបញ្ចប់ ឯកឧត្តមទេសរដ្ឋមន្រ្តី បានប្រកាសពីគម្រោងចុះពិនិត្យផ្លូវជាតិលេខ១១ ពីអ្នកលឿង ខេត្តព្រៃវែង ដល់ស្រុកថ្នល់ទទឹង ខេត្តត្បូងឃ្មុំ និងផ្លូវជាតិលេខ៧១C ពីស្រុកស្រឡប់
ខេត្តត្បូងឃ្មុំ ដល់ស្រុកចំការលើ ខេត្តកំពង់ចាម នៅថៃ្ងទី១៦ ខែឧសភា ឆ្នាំ២០១៦។

នៅថ្ងៃទី៤ ខែឧសភាឆ្នាំ២០១៦ នៅទីស្តីការក្រសួងសាធារណការ និងដឹកជញ្ជូន ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានជួបពិភាក្សាការងារជាមួយលោក Xu Jie អ្នកគ្រប់គ្រងទូទៅនៃក្រុមហ៊ុន Shanghai Huangpu Cruise Co., Ltd.

លោក Xu បានសម្តែងចំណាប់អារម្មណ៍យ៉ាងមុតមាំ ចំពោះការស្វែងរកឱកាសអភិវឌ្ឍគម្រោងហេដ្ឋារចនាសម្ព័ន្ធ ដែលពាក់ព័ន្ធនឹងការបង្កើតកន្លែងកម្សាន្ត នៅលើផ្លូវទឹករបស់កម្ពុជានៅតាមដងទន្លេមេគង្គ។ លោកក៏បានប្តេជ្ញា ដើម្បីរួមចំណែកដល់ការអភិវឌ្ឍ ហេដ្ឋារចនាសម្ព័ន្ធផ្លូវទឹក ក្នុងស្រុក និងបណ្តាញដឹកជញ្ជូនផ្លូវគោក តាមរថយន្ដក្រុងនៅកម្ពុជាផងដែរ។

ឯកឧត្តមទេសរដ្ឋមន្រ្តី បានសម្តែងនូវការស្វាគមន៍យ៉ាងកក់ក្តៅដល់គណៈប្រតិភូ និងបានផ្តល់ការគាំទ្រ និងលើកទឹកចិត្តយ៉ាងខ្លាំងចំពោះក្រុមហ៊ុន Shanghai Huangpu ដែលអារម្មណ៍ លើការរួមចំណែកដល់ការអភិវឌ្ឍ ហេដ្ឋារចនាសម្ព័ន្ធផ្លូវទឹកនៅកម្ពុជា។ ឯកឧត្តមទេសរដ្ឋមន្ត្រី បានលើកទឹកចិត្តឱ្យគណៈប្រតិភូធ្វើការយ៉ាងជិតស្និទ្ធ ជាមួយនឹងក្រសួង ដើម្បីធ្វើយ៉ាងណាឲ្យគម្រោងនេះដើរទៅមុខ។ ជាមួយគ្នានេះផងដែរ ឯកឧត្តមទេសរដ្ឋមន្រ្តី ក៏បានស្នើឲ្យក្រុមហ៊ុននេះពិចារណាលើការផ្ដល់សេវារថយន្ដក្រុងមួយ ដែលប្រកបទៅដោយផាសុខភាព សុវត្ថិភាព និងគុណភាព សម្រាប់ការធ្វើដំណើរចេញពីទីក្រុង ទៅកាន់បណ្តាខេត្តនានា។

នៅថ្ងៃទី០៤ ខែឧសភា ឆ្នាំ២០១៦ នៅទីស្តីក្រសួងសាធារណការ និងដឹកជញ្ជូន ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានជួបជាមួយលោក Yuji Kumamaru ឯកអគ្គរាជទូតជប៉ុន ប្រចាំកម្ពុជាដើម្បីពិភាក្សាអំពីការគាំទ្រ និងកិច្ចសហប្រតិបត្តិការ បន្តលើគម្រោងហេដ្ឋារចនាសម្ព័ន្ធសំខាន់ៗ នៅកម្ពុជា។

ឯកឧត្តមទេសរដ្ឋមន្រ្តី ស៊ុន ចាន់ថុល បានសម្តែងការកោតសរសើរយ៉ាងជ្រាលជ្រៅចំពោះគម្រោងហេដ្ឋារចនាសម្ព័ន្ធជាច្រើន របស់រដ្ឋាភិបាលជប៉ុន នៅប្រទេសកម្ពុជាដូចជា៖ ការសាងសង់ផ្លូវជាតិលេខ១ និងលេខ៥ ស្ថានីយ៍ពហុបំណងថ្មី ការតភ្ជាប់ស្ពានជ្រោះចង្វាឡើងវិញ ការធ្វើឱ្យប្រសើរនូវកំពង់ផែស្វយ័ត ក្រុងព្រះសីហនុ ការសិក្សាអំពីលទ្ធភាពអភិវឌ្ឍ ហេដ្ឋារចនាសម្ព័ន្ធផ្លូវដែក រថភ្លើងអាកាស និងការកសាងស្ថានីយ៍ផ្សេងទៀត ដើម្បីដោះស្រាយបញ្ហាដឹកជញ្ជូននៅកម្ពុជា។

ឯកឧត្តម Kumamaru បានអះអាងជាថ្មីអំពី ការប្តេជ្ញាចិត្តក្នុងការបន្តការគាំទ្រ និងកិច្ចសហប្រតិបត្តិការរបស់ខ្លួន ជាមួយនឹងរាជរដ្ឋាភិបាលកម្ពុជា ដើម្បីជួយកសាងហេដ្ឋារចនាសម្ព័ន្ធនៅកម្ពុជាឡើងវិញ ជាមួយគ្នានេះ ឯកឧត្តមបានក៏សម្តែងឆន្ទៈ គាំទ្រដល់ការផ្តួចផ្តើមរបស់ក្រសួងឡើងវិញ។

នៅថ្ងៃទី៥ ខែឧសភា ឆ្នាំ២០១៦ នៅទីស្តីការ ក្រសួងសាធារណការ និងដឹកជញ្ជូន ឯកឧត្តមទេសរដ្ឋមន្ត្រី ស៊ុន ចាន់ថុល បានជួបពិភាក្សាការងារជាមួយឯកឧត្តម Naveen Srivastava ឯកអគ្គរដ្ឋទូត នៃសាធារណរដ្ឋឥណ្ឌា ប្រចាំនៅព្រះរាជាណាចក្រកម្ពុជា។

ឯកឧត្តមទេសរដ្ឋមន្រ្តី បានសម្តែង ការកោតសរសើរចំពោះ កិច្ចសហការកន្លងមក រវាងរាជរដ្ឋាភិបាលកម្ពុជា និងរដ្ឋាភិបាលនៃប្រទេសឥណ្ឌា។ ជាមួយគ្នានេះ ឯកឧត្តមទេសរដ្ឋមន្ត្រី បានស្នើឱ្យរដ្ឋាភិបាលឥណ្ឌា ពិចារណាផ្តល់ការគាំទ្រផ្នែកហិរញ្ញវត្ថុ ស្តីពីការតភ្ជាប់ផ្លូវ ហាយវេ អាស៊ានពីប្រទេសឥណ្ឌា មីយ៉ាន់ម៉ា ថៃ ឡាវ វៀតណាម និងកម្ពុជា។

ឯកឧត្តមឯកអគ្គរដ្ឋទូត Srivastava បានសម្តែងនូវការគាំទ្រ និងការប្តេជ្ញាចិត្តយ៉ាងមុតមាំរបស់ខ្លួន ក្នុងការស្វែងរកមធ្យោបាយដើម្បីពង្រឹង និងធ្វើឲ្យកាន់តែប្រសើរឡើង ដល់ការគាំទ្រពីរដ្ឋាភិបាលឥណ្ឌាចំពោះគម្រោងទាក់ទង នឹងហេដ្ឋារចនាសម្ព័ន្ធនាពេលអនាគតរបស់កម្ពុជា។

នៅថ្ងៃទី ០៩ ខែឧសភា ឆ្នាំ ២០១៦ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតី ក្នុងកម្មវិធីសិក្ខាសាលាស្តីអំពី ស្ថានភាពភស្តុភារ និងបញ្ហាប្រឈមនៅកម្ពុជា ដែលរៀបចំឡើងដោយ ទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA) នៅកម្ពុជា។ សិក្ខាសាលានេះ មានគោលបំណងដើម្បីសិក្សាស្វែងយល់អំពី ឧបសគ្គនានាទាំងរូបិយ និងអរូបិយ ដែលកំពុងប្រឈម នៅក្នុងវិស័យភស្តុភារ និងដឹកជញ្ជូនកម្ពុជា។

កម្មវិធីសិក្ខាសាលានេះ មានការអញ្ជើញចូលរួមពីសំណាក់គណអធិបតីមួយចំនួន ដូចជា ឯកឧត្តម Takahisa Tsugawa រដ្ឋមន្ត្រី ស្ថានទូតជប៉ុន ឯកឧត្តម Itsu Adachi ប្រធានតំណាងការិយាល័យ JICA កម្ពុជា ព្រមទាំង តំណាងក្រសួងនានា ដៃគូអភិវឌ្ឍន៍ និងអ្នកចូលរួមជាច្រើនរូបទៀត មកពីវិស័យសាធារណៈ និងវិស័យឯកជន។

ថ្លែងនៅក្នុងសុន្ទរកថា ឯកឧត្តមទេសរដ្ឋមន្ត្រីបាន លើកឡើងអំពីសារៈសំខាន់ នៃកំណើនសេដ្ឋកិច្ចនៅកម្ពុជា ក៏ដូចជាកំណើនគួរឲ្យកត់សម្គាល់ ក្នុងការប្រើប្រាស់កំពង់ផែ និងច្រកដឹកជញ្ជូនឆ្លងកាត់ព្រំដែន ព្រមទាំងទស្សនវិស័យ រយៈពេលវែង ដើម្បីលើកកម្ពស់ភស្តុភារ និងការដឹកជញ្ជូននៅកម្ពុជា។

ឯកឧត្តមបានសង្កត់ធ្ងន់ថា “គោលនយោបាយអភិវឌ្ឍន៍ឧស្សាហកម្ម” បានចង្អុលបង្ហាញពីហេដ្ឋារចនាសម្ព័ន្ធគាំទ្រ ដែលល្អប្រសើរជាងមុន និងប្រព័ន្ធដឹកជញ្ជូនដែលមានប្រសិទ្ធភាពកាន់តែប្រសើរ ជាគន្លឹះដោះស្រាយបញ្ហាប្រឈមសំខាន់មួយក្នុ ង ចំនោមបញ្ហាប្រឈមនានា នៃគោលនយោបាយអភិវឌ្ឍន៍ឧស្សាហកម្ម ដែលនឹងជំរុញឲ្យកម្ពុជាធ្វើដំណើរឆ្ពោះ ទៅរកភាពរីកចម្រើនកាន់តែប្រសើរ មួយកម្រិតថែមទៀត។
ឯកឧត្តមទេសរដ្ឋមន្ត្រី បានជម្រាបជូនសិក្ខាកាមទាំងអស់ អំពីគម្រោងជាច្រើនដែលនឹងត្រូវអនុវត្តន៍ ដើម្បីពង្រឹងសម្ថភាពកំពង់ផែ ផ្លូវដែក ផ្លូវទឹក និងការតភ្ជាប់បណ្តាញផ្លូវគោកនានា ក្នុងគោលបំណងធានាឲ្យបាននូវ តម្លៃដឹកជញ្ជូន កាន់តែមានភាពប្រកួតប្រជែងថែមទៀត។ ឯកឧត្តមក៏បានកត់សម្គាល់ផងដែរ អំពីគំនិតផ្តួចផ្តើមដែលជាដំណោះស្រាយគន្លឹះ និងសកម្មភាពបន្ទាន់មួយចំនួន ដែលក្រសួងសាធារណការ និងដឹកជញ្ជូនបានធ្វើ ដូចជា ការកាត់បន្ថយចំណាយលើថ្លៃដឹកជញ្ជូន ដូចដែលបានព្រមព្រៀងជាមួយ កំពង់ផែស្វ័យយ័តក្រុងព្រះសីហនុ កំពង់ផែភ្នំពេញ ភ្នាក់ងារកម្ពុជា នាវាចរ កាំសាប និងសមាគមដឹកជញ្ជូន កម្ពុជាជាដើម ដែលទាំងនេះ គឺជាផ្នែកមួយនៃផែនការ១០០ថ្ងៃ។

ឯកឧត្តមទេសរដ្ឋមន្ត្រី បានលើកទឹកចិត្តឲ្យវិស័យឯកជន ដៃគូ និងអ្នកពាក់ព័ន្ធទំាងអស់ ឲ្យចូលរួមយ៉ាងសកម្ម នៅក្នុងកិច្ចពិភាក្សា និងផ្តោតលើកិច្ចខិតខំប្រឹងប្រែងរួមគ្នាជាមួយនិងរាជរដ្ឋាភិបាល ដើម្បីលើកឡើងពីបញ្ហាប្រឈមនានា ដែលពាក់ព័ន្ធនឹង វិស័យភស្តុភារ និងដឹកជញ្ជូនកម្ពុជា។

នៅថ្ងៃទី០៩ ខែឧសភា ឆ្នាំ២០១៦ នៅទីស្តីការក្រសួងសាធារណការ និងដឹកជញ្ជូន ឯកឧត្តមទេសរដ្ឋមន្ត្រី ស៊ុន ចាន់ថុល បានជួបពិភាក្សាការងារជាមួយលោក Jin Tai Choi ប្រធាននិងនាយកប្រតិបត្តិរបស់ក្រុមហ៊ុន HK Twins Transportation Co., Ltd.

លោក Jin បានសម្តែងនូវចំណាប់អារម្មណ៍យ៉ាងមុតមាំ ក្នុងការស្វែងរកឱកាសថ្មីមួយ ដើម្បីចូលរួមចំណែកក្នុងការ ផ្តល់សេវាត្រួតពិនិត្យយានយន្តនៅកម្ពុជា។ លោកបានណែនាំសេវាត្រួតពិនិត្យយានយន្ត តាមស្តង់ដាកូរ៉េ ឲ្យកម្ពុជាបានស្គាល់ ពោលគឺសេវាត្រួតពិនិត្យយានយន្តចល័តបំពាក់ដោយបច្ចេកវិទ្យាទំនើប ដែលសេវានេះ អាចត្រួតពិនិត្យយានយន្ត របស់ប្រជាពលរដ្ឋ នៅតាមទីជនបទ តាមរយៈការប្រើប្រាស់ រថយន្តចល័ត)។

ឯកឧត្តមទេសរដ្ឋមន្រ្តី បានសម្តែងនូវការកោតសរសើរ ចំពោះការផ្តល់ព័ត៌មាន ស្តីអំពីសេវាទាំងនេះ ហើយឯកឧត្តម បានស្នើឲ្យក្រុមហ៊ុននេះ ដាក់សំណើមកក្រសួងដើម្បីធ្វើការពិនិត្យ និងពិចារណា។

នៅថ្ងៃទី១២ ខែឧសភា ឆ្នាំ២០១៦ នៅទីស្តីការក្រសួងសាធារណការ និងដឹកជញ្ជូន ឯកឧត្តមទេសរដ្ឋមន្រ្តី ស៊ុន ចាន់ថុល បានទទួលជួបសម្តែងការគួរសម និងជម្រាបលាពីឯកឧត្តម Kevin Cheok ឯកអគ្គរដ្ឋទូតនៃប្រទេសសិង្ហបូរីប្រចាំកម្ពុជា។

ឯកឧត្តមឯកអគ្គរដ្ឋទូតបានសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅ ចំពោះការគាំទ្រជាបន្តនិងកិច្ចសហប្រតិបត្តិការរវាងប្រទេសកម្ពុជា និងសិង្ហបូរី។

ឯកឧត្តមទេសរដ្ឋមន្រ្តី បានសម្តែងការកោតសរសើរ ចំពោះការគាំទ្រពីស្ថានទូត ដែលចូលរួមនៅក្នុងការរៀបចំសិក្ខាសាលាជួយកសាងសមត្ថភាពរបស់ប្រទេស។

នៅព្រឹកថ្ងៃទី១២ ខែឧសភា ឆ្នាំ២០១៦ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានដឹកនាំកិច្ចប្រជុំ ស្តីពី ការដឹកជញ្ជូនលើសទម្ងន់ និងការពង្រឹងវិធានការទប់ស្កាត់។ កិច្ចប្រជុំនេះ មានការអញ្ជើញចូលរួម ពីតំណាងសាលារាជធានីខេត្ត មន្ទីរសាធារណការ និងដឹកជញ្ជូនរាជធានីខេត្ត តំណាងកងកម្លាំងនគរបាល និង យោធាថា្នក់ជាតិ កំពង់ផែភ្នំពេញ ភ្នាក់ងារកម្ពុជានាវាចរ (កាំសាប) ព្រមទាំង មន្ត្រីក្រសួងសាធារណការ និងដឹកជញ្ជូនផងដែរ។

កិច្ចប្រជុំនេះ មានគោលបំណង ដើម្បីពិភាក្សាអំពី បញ្ហាដែលទាក់ទងទៅនឹង ការផ្ទុកលើសចំណុះ ការកែច្នៃ តម្លើងយានយន្តខុសបទដ្ឋាន ស្ដង់ដារបច្ចេកទេស ដែលមានចែងនៅក្នុងច្បាប់ និងពិភាក្សាពីវិធានការសមស្របដែលត្រូវអនុវត្ត។

អង្គប្រជុំបានពិភាក្សា និងផ្លាស់ប្តូរគំនិតយោបល់ យ៉ាងសកម្ម អំពីវិធីដើម្បីគ្រប់គ្រង រថយន្តផ្ទុកលើទម្ងន់ និងការកែច្នៃយានយន្ត ខុសបទដ្ឋានស្តង់ដារបច្ចេកទេស ដោយមិនទទួលបានការផ្តល់សិទ្ធិអនុញ្ញាត្រឹមត្រូវ។ អង្គប្រជុំបានឯកភាពថា នឹងជួបប្រជុំជាថ្មីម្តងទៀត នាខែក្រោម ដើម្បីពិនិត្យឡើងវិញនូវស្ថានភាព ការងារដូចខាងក្រោម៖

- ការធ្វើប្រតិភូកម្មការងារ ទៅឲ្យមន្ទីរសាធារណការ និងដឹកជញ្ជូនរាជធានីខេត្ត ក្នុងការចុះបញ្ជីយានដ្ឋានជួសជុល និងកែច្នៃយានយន្ត ដែលផ្ទៃក្រឡាទីតាំងមានទំហំ ចាប់ពី ២៥០ម៉ែត្រការ៉េឡើងទៅ។

- ធ្វើយុទ្ធនាការផ្សព្វផ្សាយ ការយល់ដឹងអំពីបច្ចេកទេស នៃការជួលជុល កែច្នៃ អនុឡោមតាមបទដ្ឋានស្តង់ដារ និងត្រូវជំរុញលើកទឹកចិត្ត ដល់យានដ្ឋាន ដែលមិនទាន់ចុះបញ្ជី នៅសេសសល់ ទាំង ១.៩២៣ យានដ្ឋាន ឲ្យមកចុះបញ្ជីជាមួយ ក្រសួងសាធារណការ និងដឹកជញ្ជូន។

- លទ្ធភាពនៃការដាក់ដំណើរការឡើងវិញ នៃជញ្ជីងថ្លឹងរថយន្តចល័ត ដើម្បីថ្លឹងរថយន្ត ធ្វើដំណើរតាមបណ្តោយផ្លូវជាតិ និងនៅទីតាំងដែល លើកដាក់ទំនិញចូលក្នុងរថយន្ត។

- រៀបចំសារឡើងវិញ នូវរចនាសម្ព័ន្ធ នៃគណកម្មការ គ្រប់គ្រងការដឹកជញ្ជូនលើសទម្ងន់ និងស្ថានីយ៍ជញ្ជីងថ្លឹងរថយន្ត។

- ការរៀបចំ ចេញស្ទីគ័រ អនុញ្ញាតពិសេស សម្រាប់បិទសម្គាល់រថយន្តដឹកទំនិញ ដែលបានត្រួតពិនិត្យត្រឹមត្រូវ និងទទួលបានការអនុញ្ញាតពីក្រសួង។

- ការកែសម្រួលខ្លឹមសារ អនុក្រឹត្យលេខ ១៨០ ពាក់ព័ន្ធនឹង ការដឹកលើសទម្ងន់ និងបទដ្ឋានបច្ចេកទេស នៃការកែច្នៃយានយន្ត។

- ការលុបបំបាត់ភ្លើងរថយន្ត ដែលបាញ់បញ្ចាសទៅក្រោម ធ្វើឲ្យប៉ះពាល់ដល់ការមើលផ្លូវ របស់អ្នកបើកបរយានយន្ត នៅពីក្រោយ នាពេលយប់។

នៅរសៀលថ្ងៃទី១២ ខែឧសភា ឆ្នាំ២០១៦ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្រ្តី និងជាអគ្គលេខាធិការនៃក្រុមប្រឹក្សាអភិវឌ្ឍន៍កម្ពុជា និងឯកឧត្តម វង្សី វិសុទ្ធ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ព្រមទាំងសមាជិកដទៃទៀត នៃគណៈកម្មាធិការផ្លូវល្បឿនលឿន បានអញ្ជើញចូលរួមស្តាប់ការធ្វើបទបង្ហាញមួយស្តីពី ការសិក្សា វាយតម្លៃព័ត៌មានទីផ្សារ និងសេចក្តីព្រាងលក្ខខណ្ឌកិច្ចសន្យា ដែលរៀបចំដោយក្រុមហ៊ុន Ernst & Young ដែលជាក្រុមហ៊ុនផ្តល់សេវាប្រឹក្សាយោបល់សម្រាប់ការសិក្សាគម្រោងផ្លូវល្បឿនលឿននេះ។

ទីប្រឹក្សាក្រុមហ៊ុនErnst & Young បានពិពណ៌នា និងបកស្រាយការវិភាគរបស់ខ្លួនអំពីទិដ្ឋភាពផ្សេងៗនៃគម្រោងសម្រាប់ផ្លូវល្បឿនលឿនពីរាជធានីភ្នំពេញទៅខេត្តព្រះសីហនុ ដែលមានប្រវែង១៩១.៦គីឡូម៉ែត្រ ក្រោម កិច្ចសន្យាសម្បទាន នៃគម្រោងBOT(កសាង ប្រតិបត្តិ ផ្ទេរ)។

ឯកឧត្តមទេសរដ្ឋមន្រ្តី ស៊ុន ចាន់ថុល និងអ្នកចូលរួមទាំងអស់បានពិភាក្សាលើលទ្ធផលនៃការសិក្សានេះ និងបានជំរុញឱ្យក្រុមហ៊ុន Ernst & Young ពិនិត្យមើលឡើងវិញនូវគម្រោងនេះ ហើយផ្តល់ព័ត៌មាន និងអំណះអំណាងបន្ថែមទៀតមកឲ្យគណៈកម្មាធិការវិញ ដើម្បីឲ្យគណៈកម្មាធិការនេះអាចធ្វើការសម្រេចចិត្ត និងអាចចរចាជាមួយសាជីវកម្មស្ពានថ្នល់ចិន (CRBC) ឲ្យកាន់តែប្រសើរជាងមុន ដើម្បីធ្វើឲ្យគម្រោងនេះមានការរីកចម្រើនទៅមុខ ដោយយកចិត្តទុកដាក់លើការពិនិត្យមើលជាសំខាន់នូវបញ្ហាហានិភ័យ និងអត្ថប្រយោជន៍ សម្រាប់ប្រជាពលរដ្ឋកម្ពុជា។

នៅថ្ងៃទី១៦ ខែឧសភា ឆ្នាំ២០១៦ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន សហការជាមួយ ឯកឧត្តម ប្រាជ្ញ ចន្ទ អភិបាលនៃគណៈអភិបាលខេត្តត្បូងឃ្មុំ ឯកឧត្តម លន់ លឹមថៃ អភិបាលនៃគណៈអភិបាលខេត្តកំពង់ចាម និង ឯកឧត្តម ជា សុមេធី អភិបាល នៃគណៈអភិបាលខេត្តព្រៃវែង បានអញ្ជើញចុះត្រួតពិនិត្យកំណត់ផ្លូវជាតិលេខ ៧១C និង ផ្លូវជាតិលេខ១១។ គោលបំណងនៃការចុះត្រួតពិនិត្យនេះ គឺដើម្បីសិក្សាអំពីលទ្ធភាពក្នុងការសាងសង់ និងជួសជុលពង្រីកផ្លូវទាំងពីរខ្សែ ក្រោមប្រាក់កម្ចីពីរដ្ឋាភិបាលនៃសាធារណៈប្រជាមានិតចិន។

ផ្លូវជាតិលេខ ៧១C ជាផ្លូវដែលចេញពី ឃំុស្រឡប់ ស្រុកត្បូងឃ្មុំ ខេត្តត្បូងឃ្មុំ ទៅស្រុកស្ទឹងត្រង់ និងទៅស្រុកចំការលើខេត្តកំពង់ចាម។ ផ្លូវនេះគឺជាផ្លូវសេដ្ឋកិច្ចដ៏សំខាន់មួយ តភ្ជាប់ពីខេត្តត្បូងឃ្មុំ ទៅខេត្តកំពង់ចាម។ លើលពីនេះទៀត ស្ពានឆ្លងទន្លេមេគង្គ ពីស្រុកស្ទឹងត្រង់ ខេត្តត្បូងឃ្មុំ ភ្ជាប់ទៅស្រុកក្រូចឆ្មារ ខេត្តកំពង់ចាម ក៏នឹងត្រូវសាងសង់ផងដែរ ដើម្បីជំនួសឲ្យការធ្វើដំណើរឆ្លងសាឡាងសព្វថ្ងៃនេះ។

ចំណែកឯផ្លូវជាតិលេខ១១ ជាកំណត់ផ្លូវជាតិ ចេញពីស្ពានអ្នកលឿង ស្រុកពាមរក៍ ខេត្តព្រៃវែង ទៅដល់ ថ្នល់ទទឹង ឃុំជប់ ស្រុកត្បូងឃ្មុំ ខេត្តត្បូងឃ្មុំ។ កំណត់ផ្លូវជាតិលេខ១១ ជាកំណត់ផ្លូវសេដ្ឋកិច្ច សំខាន់មួយ ដែលចាំបាច់ ត្រូវពង្រីក ដើម្បសម្រួលដល់ការធ្វើចរាចរបន្ថែមទៀត រវាងខេត្តព្រៃវែង និងខេត្តត្បូងឃ្មុំ។

កំណត់ផ្លូវជាតិលេខ១១ នឹងត្រូវអ៊ុតកៅស៊ូប្រភេទ AC ដែលជាប់បានយូរជាងចាក់កៅស៊ូ DBST។ រីឯផ្លូវជាតិលេខ៧១C នឹងត្រូវអ៊ុតកៅស៊ូប្រភេទ DBST សិន ហើយនៅពេលមានកំណើនចរាចរកាន់តែច្រើន និងមានថវិកាជាតិគ្រប់គ្រាន់ ផ្លូវនេះនឹងត្រូវអ៊ុតកៅស៊ូប្រភេទ AC វិញ។ សូមបញ្ជាក់ថា ការអ៊ុតកៅស៊ូប្រភេទ AC មានតម្លៃថ្លៃជាងការចាក់កៅស៊ូប្រភេទ DBST និងត្រូវការការថែរទាំ ជួសជុលតិចជាងផងដែរ។

ថ្ងៃទី១៦ ខែឧសភា ឆ្នាំ២០១៦ នៅទីស្តីការក្រសួងសាធារណការ និងដឹកជញ្ជូន ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានសហពន្ធ័ខ្មែរកីឡាហែលទឹក បានអនុញ្ញ្ញាតឲ្យក្រុមគ្រួសារ និងកីឡាករលោតទឹក ជម្រើសជាតិអាមេរិក ឈ្មោះ Jordan Pisey ដែលមានសញ្ជាតិខ្មែរ ចូលជួប និងសំណេះសំណាល មុននឹងវិលត្រលប់ ទៅសហរដ្ឋអាមេរិកវិញ។

នៅក្នុងកិច្ចសំណេះសំណាលនេះ ឯកឧត្តមទេសរដ្ឋមន្ត្រី បានសួរពីជីវៈប្រវត្តិរបស់ Jordan Pisey រួមនឹងការហ្វឹកហាត់របស់គាត់ យ៉ាងមានភាពស្និទ្ធស្នាលជាក្រៃលែង។

នាឱកាសនោះដែរ ឯកឧត្តមបានស្នេីសុំទៅ ឪពុក និងកីឡាករ Jordan Pisey ដើម្បីឲ្យ Jordan Pisey មកចូលរួម ជាក្រុមលោតទឹកជម្រើសជាតិកម្ពុជា សំរាប់ចូលរួមប្រកួតតំណាងឲ្យ ប្រទេសកម្ពុជានៅលើឆាកអន្តរជាតិ។ ជាការឆ្លើយតប ដោយភាពត្រេកអរក្រៃលែង កីឡាករ Jordan Pisey បានសន្យាថានឹងមកចូលរួម ជាកីឡាករជម្រើសជាតិ លោតទឹករបស់កម្ពុជា នាថ្ងៃអនាគតខាងមុខនេះ ហេីយបានប្តេជ្ញា ដណ្តេីមយកមេដាយជូនកម្ពុជាឲ្យខានតែបាន។

ជាចុងក្រោយឯកឧត្តម បានជូនវត្ថុអនុស្សាវរីយ៍ ហេីយក៏បានជូនពរក្រុមគ្រួសារ Jordan Pisey ត្រលប់ទៅសហរដ្ឋអាមេរិកវិញ ប្រកបដោយសុខសុវត្ថិភាព។

នៅថ្ងៃទី១៨ ខែឧសភា ឆ្នាំ២០១៦ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញចូលរួម កិច្ចប្រជុំកំពូល “ខ្សែក្រវាត់មួយ វិថីមួយ” រៀបចំឡើងដោយរដ្ឋាភិបាលទីក្រុងហុងកុង ដោយមានការអញ្ជើញចូលរួមពី មន្រ្តីរដ្ឋាភិបាលជាន់ខ្ពស់ ពីបណ្តាប្រទេសនានា វិនិយោគិន និងភ្នាក់ងារម្ចាស់ជំនួយនានា ប្រមាណជាង២០០០នាក់ ។

ឯកឧត្តមទេសរដ្ឋមន្រ្តី ស៊ុន ចាន់ថុល បានជួបពិភាក្សាការងារជាមួយឯកឧត្តម Paul CHAN រដ្ឋមន្ត្រីក្រសួងអភិវឌ្ឍន៍ទីក្រុងហុងកុង ឯកឧត្តម Gregory SO រដ្ឋមន្ត្រីក្រសួងអភិវឌ្ឍន៍សេដ្ឋកិច្ច និងពាណិជ្ជកម្មទីក្រុងហុងកុង លោកជំទាវ Margaret Fong នាយកប្រតិបត្តិនៃក្រុមប្រឹក្សាអភិវឌ្ឍន៍ពាណិជ្ជកម្មនៃទីក្រុងហុងកុង និងអ្នកចូលរួមដទៃទៀត ដើម្បីពិភាក្សាអំពីមធ្យោបាយផ្តល់ហិរញ្ញប្បទានដល់ការអភិវឌ្ឍហេដ្ឋារចនាសម្ព័ន្ធនៅកម្ពុជា។

ឯកឧត្តម Paul Chan បានអញ្ជើញឯកឧត្តមទេសរដ្ឋមន្រ្តី ស៊ុន ចាន់ថុល ដឹកនាំគណៈប្រតិភូមួយក្រុម អញ្ជើញទៅបំពេញទស្សនកិច្ចនិងសិក្សាស្វែងយល់អំពីរបៀប ដែលទីក្រុងហុងកុងបានអភិវឌ្ឍហេដ្ឋារចនាសម្ព័ន្ធទីក្រុងរបស់ខ្លួន ប្រកបដោយប្រសិទ្ធភាព ។

គំនិតផ្តួចផ្តើម ខ្សែក្រវាត់មួយ វិថីមួយ របស់ប្រទេសចិន ត្រូវបានបង្កើតឡើង ដើម្បីជំរុញកិច្ចសហប្រតិបត្តិការសេដ្ឋកិច្ចនៃបណ្តាប្រទេសជាង៦០នៅតំបន់អាស៊ី អឺរ៉ុប និងអាហ្វ្រិក។ គំនិតផ្តួចផ្តើម ដែលបានលើកឡើងនេះ គឺជាការបង្កើនកិច្ចសហប្រតិបត្តិការលើកិច្ចសម្របសម្រួលគោលនយោបាយ ការតភ្ជាប់ ពាណិជ្ជកម្មនិងការវិនិយោគ ការធ្វើសមាហរណកម្មហិរញ្ញវត្ថុ និងផ្លាស់ប្តូរវប្បធម៌ទៅវិញទៅមក។

នៅថ្ងៃទី២៣ ខែឧសភា ឆ្នាំ២០១៦ ឯកឧត្តម តូច ចាន់កុសល រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំ ជាមួយក្រុមហ៊ុន COSMOS Group នៃសាធារណរដ្ឋកូរ៉េ ដើម្បីពិភាក្សាអំពីការផ្ទេរភារកិច្ច ចុះបញ្ជីនាវាសញ្ជាតិកម្ពុជា (Flag of Convenience) ឱ្យទៅក្រសួងសាធារណការ និងដឹកជញ្ជូន។

កិច្ចប្រជុំនេះធ្វើឡើង ជាការឆ្លើយតបទៅនឹងសេចក្តីសម្រេច ចុះថ្ងៃទី១៧ ខែសីហា ឆ្នាំ២០១៥ របស់រាជរដ្ឋាភិបាលកម្ពុជាដែលបានលុបចោលកិច្ចព្រមព្រៀងជាមួយ ក្រុមហ៊ុនទាក់ទងនឹងការចុះបញ្ជីនាវាសញ្ជាតិកម្ពុជា។

យោងតាមរបាយការណ៍របស់ក្រុមហ៊ុន រហូតមកដល់សព្វថ្ងៃនេះ នាវាដែលដាក់ទង់ជាតិកម្ពុជាជាច្រើន បានផ្លាស់ប្តូរទៅដាក់ទង់ជាតិផ្សេងទៀត ហើយមានតែ នាវាចំនួន១៩៤គ្រឿងប៉ុណ្ណោះ នៅកំពុងដំណើរការរហូតដល់ ចុងខែសីហាឆ្នាំនេះ។ នៅដើមខែកញ្ញា ឆ្នាំ២០១៦ នឹងលែងមាននាវា ដាក់ទង់ជាតិកម្ពុជាបើកបរ យ៉ាងសកម្មលើសមុទ្រតទៅទៀតហើយ។

នៅក្នុងកិច្ចប្រជុំនេះ ក្រសួងបានស្នើឱ្យក្រុមហ៊ុន COSMOS Group បំពេញការងារយ៉ាងជិតស្និទ្ធជាមួយ ក្រសួងដើម្បីដោះស្រាយបញ្ហាទាំងឡាយ ដែលកើតឡើងពីនាវាដាក់ទង់ជាតិកម្ពុជារហូតដល់វិញ្ញាបនបត្រ ចុះបញ្ជីនាវាទាំងនោះផុតសុពលភាព។

ក្រសួងបានស្នើឱ្យក្រុមហ៊ុន ដោះស្រាយបញ្ហាសមាជិកភាព របស់កម្ពុជាក្នុងអង្គការសមុទ្រអន្តរជាតិ (IMO) និងផ្ទេរកិច្ចព្រមព្រៀង ដែលកំពុងអនុវត្តបច្ចុប្បន្ន ជាមួយក្រុមហ៊ុនLRIT មកឱ្យក្រសួងសាធារណការ និងដឹកជញ្ជូន ដើម្បីឱ្យកម្ពុជាអាចបន្តប្រើប្រាស់សេវានេះបាន។ ជាការឆ្លើយតប ក្រុមហ៊ុនបានបញ្ជាក់ថា ខ្លួនទទួលយកសំណើនេះ ហើយនឹងពិភាក្សាជាមួយក្រុមហ៊ុន LRIT លើបញ្ហានោះផងដែរ។

នៅថ្ងៃទី២៣ ខែឧសភា ឆ្នាំ២០១៦ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន និងជាប្រធានគណៈកម្មការអន្តរក្រសួង ស្តីពីការបើកច្រកព្រំដែនថ្មីនៅ ស្ទឹងបត់ (ICONBSB) បានអញ្ជើញដឹកនាំកិច្ចប្រជុំ ICONBSB នៅទីស្តីការក្រសួងសាធារណការ និងការដឹកជញ្ជូន ។

កិច្ចប្រជុំនេះបានពិភាក្សាអំពីបញ្ហាសំខាន់ៗ ដែលពាក់ព័ន្ធនឹងការសាងសង់ ច្រកព្រំដែនអន្តរជាតិថ្មីនៅស្ទឹងបត់។

កិច្ចប្រជុំនេះបានពិនិត្យមើលនូវសេចក្តីព្រាង អនុស្សរណៈ នៃការយោគយល់ ដែលជាលទ្ធផល នៃកិច្ចប្រជុំចុងក្រោយ នៅទីក្រុងបាងកក រវាងគណៈប្រតិភូ ក្រសួងសាធារណការ និងដឹកជញ្ជូន នៃព្រះរាជាណាចក្រកម្ពុជា និងនាយកដ្ឋានផ្លូវហាយវ៉េ របស់ក្រសួងដឹកជញ្ជូន នៃព្រះរាជាណាចក្រថៃ។

ការសាងសង់ច្រកព្រំដែននៅស្ទឹងបត់នេះ អាចធ្វើទៅបាន ក្រោមការផ្តល់ប្រាក់កម្ចីសម្បទាន ដោយរដ្ឋាភិបាលថៃ ឯចំណែកស្ពានឆ្លងស្ទឹងបត់ កសាងឡើងក្រោមថវិកា ចំណាយដោយរាជរដ្ឋាភិបាលថៃ។ ច្រកព្រំដែនថ្មីនេះនឹងដើរតួនាទីយ៉ាងសំខាន់ ដើម្បីជួយសម្រួលចរាចរណ៍ របស់រថយន្តដឹកទំនិញឆ្លងកាត់ រវាងកម្ពុជា និងថៃ និងជួយកាត់បន្ថយការកកស្ទះ នៅច្រកព្រំដែនប៉ោយប៉ែតនាពេលបច្ចុប្បន្ន។

នាចុងបញ្ចប់ នៃការពិភាក្សា ឯកឧត្តមទេសរដ្ឋមន្រ្តី បានជំរុញឲ្យក្រុមការងារ បញ្ជូនសេចក្តីព្រាងអនុស្សរណៈនៃការយោគយល់ ដែលបានកែសម្រួលរួចទៅភាគីថៃ ធ្វើការពិនិត្យមុនពេលចុះហត្ថលេខា រវាងរដ្ឋាភិបាលទាំងពីរ ដើម្បីចាប់ផ្ដើមការសាងសង់ឱ្យបានឆាប់តាមដែលអាចធ្វើទៅបាន។

នាថ្ងៃពុធ ទី២៥ ខែឧសភា ឆ្នាំ២០១៦ នៅទីស្តីការក្រសួងសាធារណការ និងដឹកជញ្ជូន ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្រ្តីក្រសួងសាធារណការ និងដឹកជញ្ជូន បានដឹកនាំកិច្ចប្រជុំសបា្តហ៍ ជាមួយថ្នាក់ដឹកនាំរបស់ក្រសួង។កិច្ចប្រជុំនេះបានពិភាក្សា លើប្រធានបទមួយចំនួនដូចជា៖ (១) ការប្រកាសសុពលភាពមន្ត្រីតែងតាំងថ្មី (២)ការធ្វើវិមជ្ឍការគ្រប់គ្រងយានយន្ត ទៅឲ្យរដ្ឋបាលថ្នាក់ក្រោមជាតិ (៣)ការគ្រប់គ្រងយានយន្ត ដឹកជញ្ជូនលើសទម្ងន់ (៤)ការងារជំរុញអនុវត្ត បទដ្ឋានបច្ចេកទេសស្តង់ដាផ្លូវថ្នល់ និងវិធានការទប់ស្កាត់ ការបាក់ច្រាំងទន្លេ និងការប៉ះពាល់ដល់បណ្តាញផ្លូវថ្នល់ និង (៥)បញ្ហាផ្សេងៗ ដែលពាក់ព័ន្ធទៅនឹង ផែនការ១០០ថ្ងៃរបស់ក្រសួង។ ក្រៅពីនេះទៀត ឯកឧត្តម ទេសរដ្ឋមន្ត្រី ក៍បានជំរាបជូនអង្គប្រជុំអំពី ការរៀបចំវេទិការសេដ្ឋកិច្ចពិភពលោក ស្តីពីអាស៊ាន ដែលកម្ពុជា នឹងត្រូវទទួលធ្វើជាម្ចាស់ផ្ទះ នៅឆ្នាំ២០១៧ខាងមុខនេះ។

នៅថ្ងៃទី២៥ ខែឧសភា ឆ្នាំ២០១៦ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្រ្តីក្រសួងសាធារណការ និងដឹកជញ្ជូន បានទទួលជួបពិភាក្សាការងារ ជាមួយគណៈប្រតិភូ ដែលដឹកនាំដោយលោក Jonas Lind នាយកប្រតិបត្តិ និងលោក Ahmad Faudzil Hashim ប្រធានក្រុមហ៊ុន Hei Tech Global Services លោក Ong Chin Wei នាយកហិរញ្ញវត្ថុរបស់ ក្រុមហ៊ុនប្រឹក្សាយោបល់ Vantagepoint Consulting លោក Bernt Ola Bernsten, នាយកគ្រប់គ្រងនៃក្រុមហ៊ុន Silverlake Group និងលោក Tan Khee Kheng ប្រធានគ្រប់គ្រងដៃគូ នៃក្រុមហ៊ុន Baker Tilly MH Audit Ltd។

ក្រុមការងារនេះ បានធ្វើបទបង្ហាញអំពី ប្រព័ន្ធស្វ័យប្រវត្តកម្ម ប្តូរ ពន្យារ និងចុះបញ្ជីប័ណ្ណបើកបរ ចុះបញ្ជីយានយន្ត និង ត្រួតពិនិត្យបច្ចេកទេសយានយន្ត(ឆៀក) ដែលត្រូវបានដាក់ឲ្យដំណើរការ ដោយជោគជ័យ នៅប្រទេសម៉ាឡេស៊ី និងប្រទេសដទៃទៀត នៅទូទាំងពិភពលោក ។

ក្រុមការងារនេះ បានពិភាក្សាជាមួយ ឯកឧត្តមទេសរដ្ឋមន្ត្រី អំពីបញ្ហាប្រឈមក្នុងការធ្វើសមាហរណកម្មប្រព័ន្ធ និងបញ្ហាផ្សេងទៀតទាក់ទងទៅនឹង ប្រព័ន្ធថ្នាក់ជាតិ ដែលអាចផ្តល់សេវាជូនសាធារណៈជន ទាន់ពេលវេលា និងមានប្រសិទ្ធភាព នៅគ្រប់រាជធានីខេត្តទូទាំងប្រទេស។

នាថ្ងៃទី២៥ ខែឧសភា ឆ្នាំ២០១៦ នៅទីស្តីការក្រសួងសាធារណការ និងដឹកជញ្ជូន ឯកឧត្តមទេសរដ្ឋមន្ត្រី ស៊ុន ចាន់ថុល បានទទួលជួបសំដែងការគួរសមពី ឯកឧត្តម Bill Longhurst ឯកអគ្គរាជទូតចក្រភពអង់គ្លេស ប្រចាំនៅកម្ពុជា អមដំណើរដោយឯកឧត្តម Cashel Gleeson អនុប្រធានបេសកកម្មអមស្ថានទូត ចក្រភពអង់គ្លេស។

ឯកឧត្តម Longhurst បានសម្តែងនូវការកោតសរសើររបស់ខ្លួន ចំពោះទំនាក់ទំនងដ៏ល្អរវាងកម្ពុជា និងចក្រភពអង់គ្លេស និងបានឆ្លៀតឱកាស សម្តែងនូវការអបអរសាទរផងដែរ ចំពោះឯកឧត្តមទេសរដ្ឋមន្រ្តី ដែលបានទទួលការតែងតាំងថ្មី ជារដ្ឋមន្រ្តីក្រសួងសាធារណការ និងដឹកជញ្ជូន។

ឯកឧត្តមឯកអគ្គរដ្ឋទូត បានណែនាំឲ្យ ឯកឧត្តមទេសរដ្ឋមន្ត្រី បានស្គាល់ឯកឧត្តម Cashel Gleeson ជាអនុប្រធានបេសកកម្មអម ស្ថានទូតចក្រភពអង់គ្លេសប្រចាំនៅកម្ពុជា ដែលទើបទទួលការតែងតាំងថ្មី និងបានស្នើសុំយោបល់ពី ឯកឧត្តមទេសរដ្ឋមន្រ្តី អំពីគម្រោងហេដ្ឋារចនាសម្ព័ន្ធ ទាក់ទងនឹងការដឹកជញ្ជូន ដែលមានសក្កានុពល សម្រាប់ក្រុមហ៊ុនអង់គ្លេស មកធ្វើការវិនិយោគ។

ឯកឧត្តមទេសរដ្ឋមន្ត្រី បានសម្តែងនូវអំណរគុណយ៉ាងជ្រាលជ្រៅ និងការកោតសរសើរដោយស្មោះ ចំពោះកិច្ចសហប្រតិបត្តិការ និងការគាំទ្រជាបន្តរវាងប្រទេសកម្ពុជា និងចក្រភពអង់គ្លេស។

នៅថ្ងៃទី២៦ ខែឧសភា ឆ្នាំ២០១៦ នៅទីស្តីការក្រសួងសាធារណការ និងដឹកជញ្ជូន ឯកឧត្តមទេសរដ្ឋមន្ត្រី ស៊ុន ចាន់ថុល បានជួបពិភាក្សាការងារជាមួយលោក Samiuela Tukuafu នាយកធនាគារអភិឌ្ឍន៍អាស៊ី ដែលមាននិវេសដ្ឋាន ប្រចាំនៅកម្ពុជា (CARM) លោក Hideaki Iwasaki នាយកផ្នែកដឹកជញ្ជូន និងទំនាក់ទំនង (SETC) នៃទីស្នាក់ការកណ្តាល ធនាគារអភិវឌ្ឍន៍អាស៊ី លោក Jan Hansen អ្នកសេដ្ឋកិច្ចជាន់ខ្ពស់នៃ CARM លោកស្រី Erdene Oyunchimeg អ្នកឯកទេសជាន់ខ្ពស់ផ្នែកដឹកជញ្ជូននៃ SETC នៅទីស្នាក់កណ្តាល ធនាគារអភិវឌ្ឍន៍អាស៊ី និងលោក Nida Ouk មន្ត្រីគម្រោងជាន់ខ្ពស់នៃ CARM។

គោលបំណងនៃកិច្ចប្រជុំនេះ គឺដើម្បីពិភាក្សាអំពីវិធីធ្វើឲ្យ កាន់តែប្រសើរឡើងដល់កិច្ចសហប្រតិបត្តិការរវាង រាជរដ្ឋាភិបាលកម្ពុជា និងធនាគារអភិវឌ្ឍន៍អាស៊ី។ លោក Tukuafu បានស្នើដល់ឯកឧត្តមទេសរដ្ឋមន្ត្រីជួយផ្តល់យោបល់ ចំពោះគម្រោងហេដ្ឋារចនាសម្ព័ន្ធ ពាក់ព័ន្ធនឹងការដឹកជញ្ជូន ដែលធនាគារអភិវឌ្ឍន៍អាស៊ីអាចជួយដល់ការរួមចំណែក អភិវឌ្ឍប្រទេសកម្ពុជាបាន។

ឯកឧត្តមទេសរដ្ឋមន្រ្តី បានសម្តែងការកោតសរសើរ ចំពោះការគាំទ្រជាបន្ត ពីសំណាក់ធនាគារអភិវឌ្ឍន៍អាស៊ី និងបានជម្រាបជូនគណៈប្រតិភូ អំពីទិដ្ឋភាពជាច្រើន ដែលចាំបាច់ត្រូវធ្វើឱ្យប្រសើរឡើងដូចជា៖ ការចំណាយលើការដឹកជញ្ជូន ការត្រួតពិនិត្យរថយន្តដឹកលើសទម្ងន់ ការគ្រប់គ្រងទ្រព្យសម្បត្តិផ្លូវថ្នល់ និងការដឹកជញ្ជូនតាមផ្លូវទឹក ព្រមទាំងហេដ្ឋារចនាសម្ព័ន្ធ កំពង់ផែនៅកម្ពុជាផងដែរ។

លោក Tukuafu និងក្រុមការងារ បានសម្តែងការគាំទ្រ និងការប្តេជ្ញាចិត្តយ៉ាងមុតមាំ ក្នុងការចូលរួមចំណែកអភិវឌ្ឍន៍ ហេដ្ឋារចនាសម្ព័ន្ធរបស់កម្ពុជា បន្ថែមទៀតដល់។