ថ្ងៃព្រឹកទី២៨ ខែមករា ឆ្នាំ ២០១៥ មានបើកសិក្ខាសាលាស្តីពីច្បាប់ បទបញ្ញត្តិពាក់ព័ន្ធនានា និងការប្រព្រឹត្តទៅនៃការត្រួតពិនិត្យយានយន្តដឹក​ជញ្ជូន​​លើស​ទម្ងន់កម្រិត កំណត់ ព្រមទាំងការផ្សព្វផ្សាយនូវច្បាប់ចរាចរណ៍ផ្លូវគោក  បាន​ប្រារព្វ​បើក​នៅ​ នាសាលា​ខេត្តត្បូងឃ្មុំ ក្រោមអធិបតីភាព ឯកឧត្តម ត្រាំ អ៊ីវតឹក រដ្ឋមន្ត្រី ក្រសួង​សាធារ​ណ​ការ និងដឹកជញ្ជូន ។ ពិធីនេះក៏មានការអញ្ជើញ​ចូល​រួមពីឯឧ ប្រាជ្ញ ចន្ទ អភិបាល​ខេត្តត្បូងឃ្មុំ មន្ត្រី​រាជការ មកពីមន្ទីរពាក់ព័ន្ធនានា តំណាង​ក្រុមហ៊ុនដឹក​ជញ្ជូន​​ឯកជន អាជីវករ សរុប​ប្រមាណជា​១៨០នាក់។

ឯកឧត្តម ប្រាជ្ញ ចន្ទ  បានមានប្រសាសន៍ថា សិក្ខាសាលានេះពិតជាមានសារៈសំខាន់ណាស់ ដើម្បី​ផ្តល់នូវ​ចំណេះដឹងផ្សេងៗ ពាក់ព័ន្ធទៅនឹងច្បាប់ បទបញ្ញត្តិ ពាក់ព័ន្ធនានា និងការ​ប្រព្រឹត្តទៅនៃការត្រួតពិនិត្យ​ការ​ដឹកជញ្ជូនលើសទម្ងន់កម្រិតកំណត់ ព្រមទាំងច្បាប់ចរាចរណ៍ផ្លូវគោក ទៅដល់​អ្នកចូលរួម​ទាំងអស់ឲ្យ​បាន​យល់​ដឹង កាន់តែប្រសើរឡើងថែមទៀត។ ឯឧ អភិបាលខេត្តបានមានប្រសាសន៍បញ្ជាក់ថា  នៅខេត្តត្បូងឃ្មុំ កន្លងមកនេះសកម្មភាពដឹកជញ្ជូនលើសទម្ងន់កម្រិតកំណត់ ជាទូទៅ លើកសិផល ភោគផលកសិកម្ម និង​ទំនិញ​ដទៃទៀត ដែលបង្កឲ្យមានការប៉ះពាល់ខ្លាំង និងក្នុងកម្រិតដែលគួរឲ្យព្រួយបារម្មណ៍ ដល់ការទ្រុឌ ទ្រោម បាក់ស្រុត ខូចខាតផ្លូវថ្នល់ ប៉ះពាល់ដល់សណ្តាប់ធ្នាប់សាធារណៈ សុវត្ថិភាពអ្នកធ្វើដំណើរ បាត់បង់​នូវ​សោភ័ណភាពជាដើម។ការដឹកជញ្ជូនទាំងនេះ មួយផ្នែក ដឹកចេញពីមូលដ្ឋាន ក្នុងខេត្ត និងមួយផ្នែកទៀត ដឹកជញ្ជូនមកពីបណ្តាខេត្តនានា បន្តឆ្ពោះទៅតំបន់ព្រំដែនកម្ពុជា-វៀតណាម និងទៅកាន់មូលដ្ឋានដទៃទៀត នៅក្នុងព្រះរាជាណាចក្រ កម្ពុជា។ឯឧអភិបាលខេត្តត្បូងឃ្មុំ មានប្រសាសន៍បញ្ជាក់ទៀតថា កន្លងមកនេះ រដ្ឋបាលខេត្តត្បូងឃ្មុំ រួមទាំងមន្ទីរ អង្គភាពពាក់ព័ន្ធបានខិតខំរួមគ្នា ក្នុងការផ្សព្វផ្សាយ បញ្ជ្រាប​លើក​កម្ពស់​ការយល់ដឹង និងឈានទៅរកកាទប់ស្កាត់ បង្ក្រាប និងមានវិធានការតាមផ្លូវច្បាប់ ចំពោះការ​ដឹកជញ្ជូនលើស​ទម្ងន់កម្រិតកំណត់ ដើម្បីរួមចំណែក ក្នុងការរឹតបន្តឹងការអនុវត្តច្បាប់ បទបញ្ញត្តិពាក់ព័ន្ធនានា និងការ​ប្រព្រឹត្ត​ទៅ​នៃការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ប៉ុន្តែទោះជាយ៉ាងណា យើង​សង្កេត​ឃើញ​​​ការប្រព្រឹត្តបទល្មើស និងការមិនគោរពច្បាប់នៅតែបន្តកើតមាន និងតម្រូវឲ្យមានការគិតគូរយកចិត្ត ដោះស្រាយឲ្យបានម៉ឺងម៉ាត់ហ្មតចត់ និងឲ្យមាន ការចូលរួមអនុវត្តពីគ្រប់សមត្ថកិច្ច ដែលមានការ​ពាក់ព័ន្ធ​ទាំងអស់។

ឯកឧត្តមរដ្ឋមន្ត្រី ត្រាំ អ៊ីវតឹក បានមានប្រសាសន៍ថា ដោយប្រទេសជាតិកំពុងមាន​ការ​អភិវឌ្ឍន៍​ វិស័យ​ដឹក​ជញ្ចូនក៏កំពុងមានការរីកចំរើន ក្នុងនោះវិស័យហេដ្ឋា​រចនា សម្ព័ន្ធ​ដែល​បំរើឲ្យវិស័យដឹកជញ្ជូន ក៏មានការរីក​ដុះ​ដាល​គួរជាទីមោទនៈ។ ប៉ុន្តែប្រការ​ដែលគួរយកចិត្ត​ទុកដាក់នោះ គឺគួរអ្នកប្រើប្រាស់ផ្លូវថ្នល់ ជួយថែរក្សា​ផ្លូវថ្នល់ឲ្យ មានអាយុកាលប្រើ​ប្រាស់​បាន​យូរ​អង្វែង។ ឯឧ មានប្រសាសន៍បញ្ជាក់ថា ការអនុវត្ត និងការ​គោរព​ច្បាប់ គឺជាផ្នែកមួយ ប៉ុន្តែសំខាន់បំផុត វាទាមទារឲ្យមានការចូលរួម​ពីអ្នកប្រើប្រាស់ផ្លូវថ្នល់​ទាំង​ឡាយ ជា​ពិសេស​ម្ចាស់រថយន្ត ឫក្រុមហ៊ុនដឹកជញ្ជូនធុនធ្ងន់ទាំងអស់ ចូលរួមសហការថែរក្សា ទើបផ្លូវថ្នល់របស់យើង អាចប្រើប្រាស់បានយូរ ទៅតាមអាយុកាលរបស់ផ្លូវថ្នល់បាន។ឯឧរដ្ឋមន្ត្រី បានមាន​ប្រសា​សន៍​លើកឡើងថា តាម​ព័ត៌មានបណ្តោះអាសន្នរបស់ក្រសួងមហាផ្ទៃ បានឲ្យដឹងថា ជនរងគ្រោះដោយ​គ្រោះ​ថ្នាក់​ចរា​ចរណ៍​ផ្លូវគោក​នៅឆ្នាំ២០១៤ បានកើនឡើង ដោយគិតជាមធ្យមមានជនរងគ្រោះស្លាប់ជាង៦នាក់ក្នុង១ថ្ងៃ លើស​ពីឆ្នាំ​២០១៣ ដែលអ្នកស្លាប់ក្នុងគ្រោះថ្នាក់ ចរាចរណ៍គិតជាមធ្យមមានតែជាង៥នាក់​ប៉ុណ្ណោះក្នុងមួយ​ថ្ងៃ និងបានធ្វើឲ្យខាតបង់ដល់សេដ្ឋកិច្ចជាតិ ច្រើនពាន់លានរៀល ហើយមូលហេតុ ដែល​បង្ក​ឲ្យ​មាន​​​​គ្រោះ​ថ្នាក់ នោះ បណ្តាលមកពីកត្តាសំខាន់ៗដូចជា ការបើកបរលឿន​ហួសល្បឿនកំណត់ ការបើកបរ​ក្រោម​​ឥទ្ធិ​ពល​គ្រឿងស្រវឹង មិនគោរពសិទ្ធិអាទិភាព និងកត្តាផ្សេងៗទៀត។ ​ក្នុងឱកាស​នេះ ឯឧរដ្ឋមន្រ្តី ត្រាំ អ៊ីវតឹក បាន​ជំរុញណែនាំដល់អ្នកចូលរួមទាំងអស់ ត្រូវ​យក​ចំណេះដឹង ដែល​ទទួល​បាន​ពី​កិច្ច​ប្រជុំ​នេះ យក​ទៅផ្សព្វ​ផ្សាយ​​បន្តដល់​អង្គភាព របស់ខ្លួន ឲ្យបាន​យល់​ដឹងគ្រប់ៗគ្នា ដើម្បីឲ្យ​ដំណើរ​ការដឹក​ជញ្ជូន​រ​បស់យើងមិន​ល្មើស​​​ច្បាប់ មិនបង្កឲ្យផ្លូវថ្នល់ខូច មិនឲ្យ​ខាត​បង់ថវិកាជាតិ​ដោយ​សារ​ការ​​ខូចផ្លូវ ដោយ​មូល​ហេតុ​ការដឹក​ជញ្ជូន​លើសទម្ងន់កម្រិតកំណត់ និង​បញ្ហា​គ្រោះ​ថ្នាក់ចរាចរណ៍៕

នៅព្រឹកថ្ងៃទី២៩ ខែមករា ឆ្នាំ២០១៥ មានប្រារព្វធ្វើ ពិធីប្រកាសផ្សព្វផ្សាយច្បាប់ស្តីពីចរាចរណ៍ផ្លូវគោក ក្រោមអធីបតីភាព ឯកឧត្តម ត្រាំ អ៊ីវតឹក រដ្ឋមន្ត្រីក្រសួង សាធារណការ និងដឹក​ជញ្ជូន នៅទីស្តីការ​ក្រសួង។ពិធីនេះក៏មានការអញ្ជើញចូលរួមពី ឯឧ លោកជំទាវ ជារដ្ឋលេខាធិការ អនុរដ្ឋលេខាធិការ ឯឧ លោកជំរាវ អស់លោក លោកស្រី ជាថ្នាក់ដឹកនាំ មន្ត្រីរាជការ ក្រោមឱវាទក្រសួងសាធារណការ ព្រមទាំងឯឧ លោកជំទាវ អស់លោក លោកស្រី មកពីក្រសួង ស្ថាប័នពាក់ព័ន្ធមួយចំនួនទៀត។បន្ទាប់ពីបានស្តាប់ការធ្វើបទបង្ហាញរបស់លោក ព្រាប ច័ន្ទវិបុល ប្រធាននាយកដ្ឋាន​ដឹក​ជញ្ជូន​ផ្លូវ​គោក លើដំណើរការរៀបចំសេចក្តីព្រាងច្បាប់ថ្មីស្តីពីចរាចរណ៍ផ្លូវគោក និងពីដំណើរការនៃការដាក់ឆ្លង សេចក្តី​​ព្រាងច្បាប់ ជូនដល់ស្ថាប័នកំពូល និងព្រះមហាក្សត្រជាទីសក្ការៈរបស់ព្រះរាជាណាចក្រកម្ពុជា ពិនិត្យ និងអនុម័តយ៉ាងក្រឹត្យក្រម តាមនីតិវិធី រួចមក ។

ឯកឧត្តមរដ្ឋមន្ត្រី ត្រាំ អ៊ីវតឹក បានមានប្រសាសន៍ថា បច្ចុប្បន្ននេះគ្រោះថ្នាក់ចរាចរណ៍ដែល​បានបណ្តាល​ឲ្យមានមនុស្សស្លាប់ របួស និងពិការ នៅតែបន្តកើត​មាន​ឡើង ដោយបានបន្សល់ទុកនូវសោកនាដកម្ម ដែលជាផលប៉ះពាល់ដោយផ្ទាល់ចំពោះប្រជាពលរដ្ឋ បង្ក​ឲ្យ​រងនូវការនិរាសព្រាត់ប្រាស់កូនចៅបងប្អូន ឪពុក​ម្តាយ មិត្តភក្តិ ព្រម ទាំងខាតបង់ទ្រព្យសម្បត្តិរដ្ឋ និងឯកជន​សរុបអស់រាប់លានដុល្លារអាមេរិក​ក្នុងមួយ​ឆ្នាំៗ​។ ​ក្នុងគោលដៅលប់បំបាត់ផលប៉ះពាល់អវិជ្ជមាននេះ រាជរដ្ឋា​ភិបាល តាមរយៈ គណៈកម្មាធិការ​ជាតិសុវត្ថិភាព​ចរាចរណ៍ផ្លូវគោក ក្រសួងសាធារណការ និងដឹកជញ្ជូន ក្រសួង ស្ថាប័នពាក់ព័ន្ធ អង្គការមិនមែនរដ្ឋាភិបាល និងវិស័យ ឯកជននានា បាន សិក្សាស្វែងយល់អំពី​យុទ្ធសាស្ត្រគន្លឹះនានា រួមទាំងការស្រាវជ្រាវ រកឫសគល់​ជាប្រភពនៃបញ្ហាបង្កឲ្យមានគ្រោះថ្នាក់ចរាចរណ៍​ដ៏​កាច​សាហាវនេះ ហើយបានដាក់ចេញ នូវវិធានការនានា ដើម្បីទប់ស្កាត់ កាត់បន្ថយឲ្យបាននូវគ្រោះថ្នាក់ ដែលជាមហន្តរាយសំរាប់សង្គម និងជាឧបសគ្គក្នុងការ​រា​រាំង​ដល់​ដំណើរការនៃការអភិវឌ្ឍន៍ ប្រទេស របស់​រាជរដ្ឋាភិបាលកម្ពុជា ឲ្យថយចុះមកនៅកំរឹតទាបបំផុត។ ​វិធាន​ការទាំងនោះរួមមាន គោលនយោបាយសុវត្ថិ​ភាព​ចរាចរណ៍ផ្លូវគោក ផែនការសកម្មភាពសុវត្ថិភាព​ចរាចរណ៍​ផ្លូវគោក ដែលរាជរដ្ឋាភិបាលបាន​អនុម័ត​កាលពីដើមឆ្នាំ២០១៤កន្លងមក និងច្បាប់ចរាចរណ៍ផ្លូវគោក ដែល​ទើប​តែត្រូវបានស្ថាប័នកំពូល និងព្រះ​មហាក្ស​ត្រ​ជាទីសក្ការៈរបស់កម្ពុជា បានពិនិត្យ និងអនុម័ត​យ៉ាង​ក្រឹត្យ​ក្រម​តាមនីតិវិធី។ឯឧរដ្ឋមន្ត្រី បានមាន​ប្រសាសន៍ថា ច្បាប់ចរាចរណ៍ផ្លូវគោកនេះ មានបង្កើនទោស​ពិន័យ​ជា​ទឹកប្រាក់ និងការដាក់ពន្ធនាគារបន្ថែម ជាពិសេសព្រមទាំងមានចំណុចសំខាន់ៗរួមមាន ការមិនបើកបរ​លើស​​ល្បឿនកំណត់៨០គីឡូម៉ែត្រ ក្នុងមួយម៉ោងនៅក្រៅ ទីប្រជុំជនដែលច្បាប់មុនបានកំណត់ដល់​៩០​គីឡូ​ម៉ែត្រ អ្នករួមដំណើរតាមម៉ូតូត្រូវតែពាក់មួកសុវត្ថិភាពទាំងអស់គ្នាគិតចាប់ពីកុមារអាយុ៣ឆ្នាំឡើងទៅ ក្នុង​ពេល​​​​​​បើកបរ មិនអនុញ្ញាតឲ្យប្រើទូរស័ព្ទដៃ ម្ចាស់យានយន្តត្រូវតែស្នើលប់ចេញពីបញ្ជីនូវយានយន្ត​ដែល​ឈប់​ប្រើប្រាស់ នគរបាលចរាចរណ៍មាន​សិទ្ធិ​ស្ទូចយករថយន្តដែល ចតខុស ច្បាប់យកទៅអង្គភាព​នគរបាលចរា​ចរណ៍​ដើម្បីពិន័យ រឹតបន្តឹងការគ្រប់​គ្រង​យាន​ដ្ឋានជួសជុល និងតម្លើងយានយន្ត ដោយបន្ថែមសមត្ថ​កិច្ច​ក្រសួង​ឧស្សាហកម្ម និង សិប្បកម្ម។ ក្នុង​រយៈ៥ឆ្នាំ ក្រោយពីច្បាប់នេះចូលជាធរមាន នឹងមានការតំរូវ​ឲ្យអ្នក​រួម​ដំណើរតាមរថយន្ត មានចំណុះក្រោម​៩កៅអី ពាក់ខ្សែក្រវ៉ាត់សុវត្ថិភាព នៅក្រៅ ទីប្រជុំជន និងរថយន្ត​ដែល​មានទម្ងន់សរុបលើសពី១៦តោន ត្រូវ​មាន​ជំនួយការបើកបរ១នាក់។ ឯឧរដ្ឋមន្ត្រី ត្រាំ អ៊ីវតឹក បានអំពាវ​នាវ​ដល់​គ្រប់ក្រសួង ស្ថាប័ន អង្គការ ជាតិ អន្តរ​ជាតិ ដៃគូរអភិវឌ្ឍន៍ វិស័យឯកជន និងបណ្តាញសារព័ត៌មាន ជួយផ្សព្វផ្សាយ ពន្យល់​ណែ​នាំ​ឲ្យបាន​ទូលំ​ទូលាយអំពីខ្លឹមសារនៃច្បាប់ ចរាចរណ៍ផ្លូវគោក នេះ ឲ្យបានជ្រួត​ជ្រាប​នៅ​ក្នុងចំណោម​មន្ត្រីរាជ​ការ និយោជិត​ក្នុងក្រសួង ស្ថាប័នផ្ទាល់ និងប្រជាពលរដ្ឋគ្រប់លំដាប់ថ្នាក់ ដើម្បី​ជំរុញឲ្យមានការចូលរួម​គោរព​ឲ្យមាន​ប្រសិទ្ធិ​ភាពខ្ពស់នូវច្បាប់គោលនេះ ហើយខិតខំប្រុងប្រយ័ត្ន ក្នុង​ការធ្វើដំណើរតាមដងផ្លូវ ធ្វើ​យ៉ាង​ណា​បញ្ជៀស​ឲ្យបាននូវគ្រោះថ្នាក់ចរាចរណ៍ និងការទទួលទោសពិន័យ​ដែល​មានចែងក្នុងច្បាប់៕

នៅរសៀលថ្ងៃទី២៩ ខែមករា ឆ្នាំ២០១៥​ មានពិធីចុះហត្ថលេខាលើគម្រោងស្តារឡើងវិញផ្លូវជាតិលេខ២១ រវាង ឯកឧត្តម ត្រាំ អ៊ីវតឹក រដ្ឋមន្ត្រីក្រសួងសាធារណការ និង ដឹកជញ្ជូន និងលោក Park Soo Dong ​តំណាងក្រុមហ៊ុន Hanshin Engineering and Construction Co., Ltd នៅទីស្តីការក្រសួង។គម្រោងស្តារឡើងវិញផ្លូវជាតិលេខ២១ ដែលបានចុះហត្ថលេខា នាពេលនេះ មានប្រវែងជាង​៦៣​គីឡូ​ម៉ែត្រ សាងសង់ដោយចាក់​កៅស៊ូ​ប្រភេទ​បេទីមីណឺ អាសេ(AC) ក្នុងនោះមានស្ពានចំនួន៥៨កន្លែង ចំណាយ​ថវិកា​សរុបចំនួន៦១​លាន៦​សែន​ដុល្លារអាមេរិក ក្នុងនោះកម្ចីឥណទានរដ្ឋាភិបាលនៃសាធារ​ណរដ្ឋ​កូរ៉េ ចំនួន​ជាង៥២លាន ដុល្លារអាមេរិក និង​ថវិកាបដិភាគរបស់រាជរដ្ឋាភិបាលកម្ពុជា ចំនួនជាង៩លាន​ដុល្លារ​អា​មេរិក។ គម្រោងនេះ សិក្សាលំអិត​ដោយ​ក្រុម​ហ៊ុនអន្តរជាតិកូរ៉េ DASAN Consultants Co., Ltd។ ដោយ​ឡែក​ចំពោះ​វឌ្ឍនភាពនៃគម្រោងនេះ៖ កាល​ពី​ថ្ងៃទី១៤ ខែវិច្ឆិកា ឆ្នាំ២០១១ បានចុះហត្ថ​លេខា​លើ​​​កម្ចីឥណ​ទាន រវាង​រាជ​រដ្ឋា​ភិបាលកម្ពុជា ជាមួយធនា​គារ​​នៃសាធា​រ​ណរដ្ឋកូរ៉េ បានបញ្ចប់ការងារវាស់ស្ទង់ សិក្សា​ផ្សេង​ៗ ហើយ​បាន​សហ​ការជាមួយIRC ដើម្បី​ពិនិត្យ​​លើផល​ប៉ះពាល់។ ប្រភពថវិកាសម្រាប់កា រអភិវឌ្ឍ និងសហប្រតិបត្តិ​ការ​​សេដ្ឋកិច្ច(EDCF) ក៏បាន​ឯកភាព​កំណត់​ឲ្យធ្វើការ​ដេញថ្លៃគម្រោង​នូវកំណាត់ផ្លូវ ដូច​បានកំណត់​ក្នុង​គ្រោង​ការ​ទី១ ប្រវែង​៥៥គីឡូ​ម៉ែត្រ ដើម្បី​ធា​នាកញ្ចប់ថវិកា​គ្រប់គ្រាន់​​​ក្នុង​ប្រតិបត្តិការ។​ ចំណែក​កំណាត់ផ្លូវ​ប្រវែង​ជាង​៨គីឡូម៉ែត្រទៀត ត្រូវស្វែងរក​ប្រភព​ថវិកាជាតិ ឫថវិកាគម្រោង​បន្ទាប់ពី​ធ្វើលទ្ធ​កម្ម ហើយ   គម្រោងនេះ​មាន​ការ​ពាក់ព័ន្ធ​បែប​បទ​ការដោះ​ស្រាយ​ផលប៉ះពាល់តាមលក្ខ័ខ័ណ្ឌ​របស់ធនាគារ​នៃ​សាធារណរដ្ឋ​កូរ៉េ ការ​ងារ​​​សាងសង់​អាច​ចាប់​ផ្តើម​បាន លុះ​​ត្រាតែការដោះស្រាយ​ផលប៉ះ​ពាល់សំណងថវិកា​ជូន​ប្រជាពលរដ្ឋត្រូវ​បាន​​បញ្ចប់​​ជាស្ថាពរ។ ​ក្នុង​វឌ្ឍន​ភាព​​នៃគម្រោងនេះដែរ ក៏បានរៀបចំ​​​​ជ្រើសរើសទីប្រឹក្សាក្នុងស្រុក ដើម្បី​រៀប​ចំ​ឯកសារRPថ្មី បានដាក់​ដេញ​ថ្លៃ​ចាប់​​ពីថ្ងៃទី១២ ខែកញ្ញា ឆ្នាំ២០១៤ ដល់ថ្ងៃទី២៩ ខែតុលា ឆ្នាំ២០១៤ បានប្រជុំ នៅ​ថ្ងៃ​ទី​២៩ ខែកញ្ញា ឆ្នាំ២០១៤ បានចុះពិនិត្យ​ការ​ដ្ឋានជាមួយក្រុមហ៊ុនដេញថ្លៃ នៅថ្ងៃទី៣០ ខែកញ្ញា ឆ្នាំ២០១៤ បានបើកឯក​សារ​​​ដេញថ្លៃ នៅថ្ងៃទី៣០ ខែតុលា ឆ្នាំ២០១៤ បាន​ជ្រើស​រើស​ក្រុមហ៊ុន Hanshin E&C Co., Ltd ជាក្រុម​ហ៊ុន​សាង​សង់ នៅថ្ងៃទី១៥ ខែធ្នូ ឆ្នាំ២០១៤ បានធ្វើការចរ​ចារតម្លៃ​នៅ​ថ្ងៃ​ទី២៤ ខែធ្នូ ឆ្នាំ២០១៤ ហើយប្រភពថវិកាសម្រាប់ការអភិវឌ្ឍ និងសហប្រតិបត្តិ​ការ​​សេដ្ឋកិច្ច(EDCF) បាន​ឯក​ភាពនៅថ្ងៃទី២៩ ខែមករា ឆ្នាំ២០១៥ ដែលមានតម្លៃនៃកិច្ចសន្យា ប្រមាណ​ជាង៤០លាន​ដុល្លារ​​អាមេរិក៕

នៅព្រឹកថ្ងៃទី៤ ខែកុម្ភៈ ឆ្នាំ២០១៥ នៅទីស្តីការក្រសួង មាន បើកកិច្ចប្រជុំបូកសរុប និងត្រួតពិនិត្យ លទ្ធផលពាក់ កណ្តាលទសវត្សស្តីពីការអនុវត្តផែនការសកម្មភាព​សុវត្ថិ​ភាពចរាចរណ៍ផ្លូវគោកឆ្នាំ២០១១-២០២០ ក្រោម​អធិប​​តី ភាព ឯកឧត្តម ត្រាំ អ៊ីវតឹក រដ្ឋមន្ត្រីក្រសួងសាធារណការ និងដឹក​ជញ្ជូន ។ បន្ទាប់ពីបានស្តាប់របាយការណ៍វាស់វែង ស្តីពីការអនុវត្តសកម្មភាពសុវត្ថិភាពចរាចរណ៍ផ្លូវគោក​ឆ្នាំ ២០១០-២០១៤ របស់លោក ពា គីមវង ទីប្រឹក្សាជាតិ ផ្នែកសុវត្ថិភាព ចរាចរណ៍ ស្តីពីលទ្ធផលការ​ងារ ​ដែល​សម្រេចបាននាពេលកន្លងមក អំពីចំនុចខ្វះខាត ដែលមិនបានអនុវត្ត និងបញ្ហាប្រឈម រួចមក ឯកឧត្តមរដ្ឋមន្ត្រី ត្រាំ អ៊ីវតឹក  បាន​មាន​ប្រសាសន៍ថា គោលបំណងនៃកិច្ចប្រជុំនាពេលនេះ គឺសំដៅរួមគ្នាត្រួតពិនិត្យ វាយតម្លៃ​លើ​លទ្ធ​ផលការងារ​ទប់​ស្កាត់គ្រោះថ្នាក់ចរាចរណ៍ នាពាក់កណ្តាលទសវត្ស នៃផែនការសកម្មភាពទស្សវត្ស​របស់​អង្គការសហ​ប្រជា​ជាតិ ដែលត្រូវបាន​កំណត់ប្រទេសប្រមាណជាង១០០ប្រទេស ក្នុងកិច្ចប្រជុំ​សកល​កាល​ពីឆ្នាំ២០១០ នៅប្រទេស រុស្សី ហើយកាលនោះប្រទេសទាំងអស់ក៏បានឯកភាពថា នឹងមានការជួប​ប្រជុំ​ស្តាប់របាយ​ការណ៍​ ស្តីពីការត្រួតពិនិត្យវាយតម្លៃលើលទ្ធផលការងារទប់ស្កាត់គ្រោះថ្នាក់ ចរាចរណ៍នៅពាក់​កណ្តាល​​ទសវត្ស ដែល​បានមកដល់នៅក្នុងឆ្នាំ២០១៥នេះ ដើម្បីរកឲ្យឃើញនូវបញ្ហាប្រឈម និងចែក​រំលែក​បទពិសោធន៍ ដែលនាំឲ្យសំរេច ឫុមិនអាច សំរេចគោលដៅផែនការទសវត្ស​សុវត្ថិភាពចរាចរណ៍ផ្លូវ​គោក​សកល ដែល​បាន​កំណត់ថា នឹងត្រូវកាត់បន្ថយឲ្យបាននូវចំនួន​អ្នកស្លាប់ក្នុងគ្រោះថ្នាក់ចរាចរណ៍ឲ្យបាន​៥០% នៅក្នុង​ឆ្នាំ​២០២០ ធៀបទៅនឹង​ចំនួនអ្នក​ស្លាប់​ក្នុង​ឆ្នាំ២០១១ ។  ឯកឧត្តមរដ្ឋមន្ត្រី មានប្រសាសន៍បញ្ជាក់ថាកន្លងមកនេះ ​មាន​សកម្មភាព​ប្រមាណ​៤៥ ដែលជា សកម្មភាពអាទិភាពដើម្បីអនុវត្តឲ្យបានសម្រេច​គោល​ដៅ​នេះ។ ​ក្នុង​ឱកាស​នេះ ឯឧរដ្ឋមន្ត្រី បានជំរុញឲ្យអង្គប្រជុំរួមគ្នាពិនិត្យពិភាក្សា វាយតម្លៃដោយផ្អែកលើ​សកម្ម​ភាព អាទិ​ភាព​នេះ ដើម្បី កំណត់ ឲ្យមានការ​ឯកភាពគ្នា ថាតើយើងសំរេចបានប៉ុន្មានចំណុច ហើយ​នៅ​សល់​ប៉ុន្មាន​ចំណុច​ទៀត ដែលអនុវត្ត មិនបាន ដោយសារមូល ហេតុអ្វី? ហើយត្រូវធ្វើយ៉ាង​ណា ដើម្បីអនុវត្ត​ឲ្យ​បាន​សំរេច​លើ​សកម្មភាពទាំងនេះ។  ឯកឧត្តមរដ្ឋមន្ត្រី ត្រាំ អ៊ីវតឹក បានកោតសរសើរ និងវាយតម្លៃខ្ពស់ចំពោះ​ការចូលរួម​ជ្រោម​ជ្រែងយ៉ាងសកម្ម របស់ក្រសួង ស្ថាប័នពាក់ព័ន្ធ អាជ្ញាធរគ្រប់ជាន់ថ្នាក់ អង្គការមិន​មែន​រដ្ឋា​ភិបាល និងវិស័យឯកជននានា ជា ពិសេសកាកបាទក្រហមកម្ពុជា កាយរិទ្ធ សហភាពសហព័ន្ធយុវជនកម្ពុជា អង្គការ​ដៃ​គូ​សុវត្ថិភាពចរាចរណ៍ ផ្លូវគោកសកល ដែលបានសហការ និងសហប្រតិបត្តិការយ៉ាងជិតស្និទ្ធ និងយ៉ាង​សកម្ម​ជាមួយ គណៈកម្មាធិការជាតិសុវត្ថិភាពចរាចរណ៍ផ្លូវគោក ក្នុងការចុះអប់រំផ្សព្វផ្សាយ​អំពី​សុវត្ថិ​ភាព​ចរា​ចរណ៍​ទៅដល់អ្នកប្រើប្រាស់ផ្លូវទាំងអស់នៅរាជធានីភ្នំពេញ និងខេត្ត ក្នុងគោលបំណងរួមគ្នា គឺ​ដើម្បី​ទប់​ស្កាត់ កាត់បន្ថយសោកនាដកម្មលើផ្លូវថ្នល់ នៅព្រះរាជាណាចក្រកម្ពុជា៕

រសៀលថ្ងៃទី ៥ ខែកុម្ភៈ ឆ្នាំ២០១៥ នៅទីស្តីការក្រសួងសាធារណការ និង ដឹកជញ្ជូន មានបើក កិច្ចប្រជុំក្រុមការងារបច្ចេកទេសចំរុះ ស្តីអំពីហេដ្ឋារចនាសម្ព័ន្ធ និង សមាហរណកម្មក្នុងតំបន់ ​ក្រោមអធិបតីភាព ឯកឧត្តម ត្រាំ អុីវតឹក រដ្ឋមន្រ្តី ក្រសួងសាធារណការ និង ដឹកជញ្ជូន ។

នៅព្រឹកថ្ងៃទី ១១ ខែកុម្ភៈ ឆ្នាំ២០១៥ នៅទីស្តីការក្រសួង មានប្រារព្វធ្វើ ពិធីចុះហត្ថលេខាលើកិច្ចព្រមព្រៀង ស្តីពី ការពង្រឹងយន្តការត្រួតពិនិត្យយានយន្តដឹកជញ្ជូន​លើស​ទម្ងន់កម្រិត​កំណត់ រវាង​ក្រសួង​សា​ធារ​ណ​ការ និងដឹក ជញ្ជូន និងក្រសួងមហាផ្ទៃ ដោយ ឯកឧត្តម ត្រាំ អ៊ីវតឹក រដ្ឋមន្ត្រី​ក្រសួង​សា​ធារ​ណ​ការ និងដឹកជញ្ជូន និងឯកឧត្តម ឯម សំអាន រដ្ឋលេខាធិកា តំណាងឯកឧត្តមឧបនាយករដ្ឋមន្ត្រី ស ខេង រដ្ឋមន្ត្រី​ក្រសួងមហាផ្ទៃ ។​

ពិធីនេះក៏​មានការ អញ្ជើញចូលរួមពី ឯកឧត្តម រដ្ឋលេខាធិការ អនុរដ្ឋ​លេខាធិការ អគ្គនាយក អគ្គនាយករង និងឯកឧត្តម អស់លោក លោកស្រី ជា មន្ត្រី​រាជ​ការ​​មកពីមន្ទីរ​សាធារ​ណ​ការខេត្តនានា និងដោយ មានការញ្ជើញចូលរួមពី ឯកឧត្តម អភិ​បាល​នៃ គណៈអភិបាលខេត្ត អភិបាលរងខេត្ត ព្រម​ទាំង​អស់លោក លោកស្រី មកពីអង្គ​ភាព ពាក់​ព័ន្ធ​នានា ។នៅព្រឹកថ្ងៃទី ១១ ខែកុម្ភៈ ឆ្នាំ២០១៥ នៅទីស្តីការក្រសួងមានប្រារព្វធ្វើ ពិធីចុះហត្ថលេខាលើកិច្ចព្រមព្រៀង ស្តីពីការពង្រឹងយន្តការត្រួតពិនិត្យ យានយន្ត ដឹកជញ្ជូន​លើស​ទម្ងន់កម្រិត​កំណត់ រវាង​ក្រសួង​សា​ធារ​ណ​ការ និងដឹកជញ្ជូន និងក្រសួងមហាផ្ទៃ ដោយ ឯកឧត្តម ត្រាំ អ៊ីវតឹក រដ្ឋមន្ត្រី​ក្រសួង​សា​ធារ​ណ​ការ និងដឹក ជញ្ជូន និងឯកឧត្តម ឯម សំអាន រដ្ឋលេខាធិកា តំណាងឯឧឧបនាយករដ្ឋមន្ត្រី ស ខេង រដ្ឋមន្ត្រី​ក្រសួងមហាផ្ទៃ ។​ ពិធីនេះក៏​មានការអញ្ជើញចូលរួមពី ឯឧ រដ្ឋលេខាធិការ អនុរដ្ឋ​លេខាធិការ អគ្គនាយក អគ្គនាយករង និងឯឧ អស់លោក លោកស្រី ជាមន្ត្រី​រាជ​ការ​​មកពីមន្ទីរ​សាធារ​ណ​ការខេត្តនានា និងដោយមានការញ្ជើញចូលរួមពី ឯកឧត្តម អភិ​បាល​នៃគណៈអភិបាលខេត្ត អភិបាលរងខេត្ត ព្រម​ទាំង​អស់លោក លោកស្រី មកពីអង្គ​ភាពពាក់​ព័ន្ធ​នានា ។

នៅក្នុងឱកាសនេះ ឯកឧត្តមរដ្ឋមន្រ្តី ត្រាំ អ៊ីវតឹក បានអញ្ជើញប្រគល់ជញ្ជីងជានិមិត្តរូប ជូនដល់តំណាង ខេត្តទាំង ៥ រួមមានខេត្តកំពង់ចាម ខេត្តកំពង់ធំ ខេត្តព្រៃវែង ខេត្តក្រចេះ និង​ខេត្តកំពង់ស្ពឺ។

ឆ្លៀតក្នុងឱកាសនេះ ឯកឧត្តមរដ្ឋមន្ត្រី ត្រាំ អ៊ីវតឹក បានមានប្រសាសន៍ថា គោលបំណងនៃ​ការធ្វើប្រតិភូកម្ម នាពេលនេះ គឺដើម្បីបង្កើននូវយន្តការគ្រប់គ្រងការអនុវត្ត នូវ ការត្រួតពិនិត្យ​ការដឹកជញ្ជូនលើសទម្ងន់ ដែល​បច្ចុប្បន្ននេះ ស្ថានភាពនៃការអនុវត្ត​គឺស្ទើរតែគ្រប់​កន្លែង​ទៅ​ហើយ ហើយយើងក៏មិនអនុញ្ញាតិឲ្យការដឹក​ជញ្ជូន​លើសទម្ងន់ វាខុសនឹងច្បាប់ផ្លូវថ្នល់បន្តទៅទៀតទេ ព្រោះវាជាមូលហេតុដែលធ្វើឲ្យផ្លូវថ្នល់ដែល​បាន​សាង​សង់រួចហើយនោះ ត្រូវ​ខូច​ខាតឡើងវិញក្នុងរយៈពេលខ្លី មុនអាយុកាល កំណត់នៃការប្រើ​ប្រាស់​របស់​ផ្លូវថ្នល់។ ​ឯឧរដ្ឋមន្ត្រី បានមានប្រសាសន៍បន្តថា នៅឆ្នាំ២០១៤ កន្លងមកនេះ ក្រសួងសាធារណការ និងដឹកជញ្ជូន បានដាក់ឆ្លងរដ្ឋសភានូវ ច្បាប់ចំនួន២  ដែលពាក់ព័ន្ធនឹងការដឹកជញ្ជូន​ផ្លូវគោក​ ទី១ច្បាប់​ផ្លូវ​ថ្នល់ ទី២ច្បាប់ចរាចរណ៍ផ្លូវគោក ដែលច្បាប់ទាំងពីរនេះ គឺវាបំពេញឲ្យគ្នាទៅវិញ​ទៅមក ដើម្បីធានានូវ ការ​គ្រប់គ្រងផ្លូវថ្នល់ឲ្យបានល្អ ការធ្វើចរាចររណ៍ឲ្យមានសណ្តាប់ធ្នាប់ ហើយដើម្បីជៀសវៀង​នូវគ្រោះថ្នាក់​ចរា​ចរណ៍​ឲ្យបានជាអតិបរមា។ឯកឧត្តមរដ្ឋមន្ត្រី មាន ប្រសាសនទបញ្ជាក់ថា បច្ចុប្បន្ននេះ យើងមានស្ថានីយ៍អចល័ត ចំនួន ៩ នៅតាមបណ្តាផ្លូវថ្នល់ ដែលក្នុងនោះមានចំនួន៧ ជាជំនួយរបស់ធនាគារអភិវឌ្ឍន៍អាស៊ី និង២ ទៀត ជា​ជំនួយ​របស់រដ្ឋាភិបាលជប៉ុន លើសពីនេះទៀតយើងមានក្រុមចល័តពិសេស គឺជាក្រុមដែលចុះធ្វើការត្រួត ពិនិត្យម្តងម្កាល​ ដើម្បីឆ្មក់នៅទីតាំងកន្លែងណា ដែល មានយានយន្តដឹកជញ្ជូនលើសទម្ងន់ច្រើន និងមានក្រុម​ចល័តមួយទៀតដែលស្ថិតនៅក្រោមការគ្រប់គ្រងរបស់ខេត្ត ដែលថ្ងៃនេះយើងបានធ្វើប្រតិភូកម្ម  ជាផ្លូវការ​ដល់​ខេត្តចំនួន៥ ដែលមានការដឹកជញ្ជូនលើសទម្ងន់កម្រិតកំណត់ច្រើន ដែលបណ្តាលឲ្យផ្លូវថ្នល់ ឆាប់ខូច​។ ឯឧរដ្ឋមន្ត្រី​បានមានប្រសាសន៍បញ្ជាក់ថា ការធ្វើប្រតិភូកម្ម ទៅ ដល់ខេត្ត មានន័យថា ក្រសួងមានតួនាទី​មើលខុសត្រូវ តែនៅតាមស្ថានីយ៍អចល័ត ដែលនៅតាមបណ្តាញផ្លូវថ្នល់ ហើយនិងក្រុមចល័តពិសេស​ប៉ុណ្ណោះ ប៉ុន្តែចំពោះ ក្រុមជញ្ជីងចល័ត ដែលក្រសួងបានធ្វើប្រតិភូកម្មជូនខេត្ត គឺស្ថិតនៅក្នុងការគ្រប់គ្រង​របស់​ឯកឧត្តម​​​​​អភិបាលខេត្ត ដែលមានភារកិច្ចគ្រប់គ្រងក្រុមដែលចុះទៅត្រួតពិនិត្យ ទម្ងន់យានយន្តទាំងនេះ ដោយ​​​ផ្ទាល់  ដោយក្រសួងគ្រាន់តែជួយជាថវិកា ការងារបច្ចេកទេស និងសម្ភារៈតែប៉ណ្ណោះ។ ដោយឡែក​ចំពោះការ​លើក​ទឹកចិត្តទៅដល់ក្រុម ការងារចល័តរបស់ខេត្ត គឺក្រសួងមានអនុក្រឹត្យអនុញ្ញាតិរួចហើយ  ដោយ​​ក្រុម​​​ការងារ​ចល័តខេត្តនេះ គឺខេត្តជាអ្នកគ្រប់គ្រងផ្ទាល់ ដោយរាល់ថវិកាដែលទទួលបានពី​ការ ផាក​ពិន័យ​នេះ គឺខេត្ត​ជា​អ្នកចាត់ចែង បន្ទាប់ពីការបង់ថវិកានេះចូលរដ្ឋរួចរាល់។ ការលើកទឹកចិត្តនេះ គឺដើម្បី​ជៀស​វៀង​ឲ្យបាន​ជា​អតិ​ប​រមា មិនឲ្យមានអំពើពុករលួយ នៅក្នុងការងារ ដើម្បីឲ្យការបង្ក្រាប​នូវយាន​យន្ត​ដឹកជញ្ជូន​លើស​ទម្ងន់​កម្រិត​កំណត់ទទួលបានជោគជ័យ។ ឯកឧត្តមរដ្ឋមន្ត្រី​ ត្រាំ អ៊ីវតឹក បានលើកឡើងថា ជាការ​ពិត​ហើយ ​ការអនុវត្ត​ការ​ងារនេះ មានការលំបាក់ខ្លះ ដោយសារយើងនៅមានវប្បធម៌អន្តរាគម ហើយវប្បមធ៌​អន្តរាគមនេះ មាន​ទាំងផ្នែកខាងគ្រោះថ្នាក់ចរាចរណ៍ និងការ អន្តរាគម ខាងផ្នែកដឹកជញ្ជូនលើស​ទម្ងន់​ផង​ដែរ ប៉ុន្តែអ្វី​ដែល​ជាបង្អែក និង​ជាមូលដ្ឋានរបស់យើងសំរាប់អនុវត្តលើការងារនេះ គឺច្បាប់។ ឯកឧត្តមរដ្ឋមន្ត្រី ត្រាំ អ៊ីវតឹក បានមាន​ប្រសាសន៍បញ្ជាក់​ថា ជា​គោល​នយោបាយរបស់ក្រសួង ក៏ដូចជារបស់​រាជ​រដ្ឋាភិបាល គឺទី១នៅ​ក្នុង​ច្បាប់​ផ្លូវ​ថ្នល់ បានចែងរួច​ហើយពី​ការកម្រិតកំណត់ទម្ងន់ ហើយនិងវិធីដែលត្រូវ​ការ​ពារផ្លូវថ្នល់ ទី២នៅក្នុងយុទ្ធ​សាស្ត្រ​ចតុ​កោណ​ជំហានទី៣ គឺបានចែងច្បាស់អំពី​យន្តការនៃការថែទាំផ្លូវ ហើយ​​និង​ការ​គ្រប់​គ្រងការដឹក​ជញ្ជូន លើស​ទម្ងន់​កម្រិត​កំណត់ ឲ្យបានម៉ឺងម៉ាត់ ដូច្នេះ​យើងមានមូលដ្ឋានគិត្តិ​យុត្តិ​ដើម្បី​អនុវត្ត​ការងារនេះ ក្នុង​ការ​​ធានាឲ្យផ្លូវថ្នល់​យើងមានជីវិត  បានយូរអង្វែង បន្ថយ​នូវ​ការជួសជុល ការ​ថែ​ទាំ ដើម្បី​អាច​​ឲ្យយើង​ឈាន​ទៅកសាងនូវផ្លូវ​ថ្នល់​ផ្សេងៗ ជាបន្តបន្ទាប់ទៀត៕

នៅព្រឹកថ្ងៃទី ២៥ ខែកុម្ភៈ ឆ្នាំ២០១៥ នៅទីស្តីការក្រសួង បាន​ប្រារព្វធ្វើកិច្ចប្រជុំពិភាក្សាក្រុមការងាររាជរដ្ឋាភិបាល និងវិស័យឯកជន ផ្នែកហេដ្ឋារចនាសម្ព័ន្ធ និង ដឹកជញ្ជូនក្រោមអធិបតីភាព ឯកឧត្តម ត្រាំ អ៊ីវតឹក រដ្ឋមន្ត្រី​ក្រសួង​សា​ធា​រ​ណ​ការ និងដឹកជញ្ជូន ។

កិច្ចប្រជុំពិភាក្សា ដែលបានរៀបចំធ្វើឡើងនាពេលនេះ បានលើកយករបៀបវារៈសំខាន់ៗមួយចំនួន មក​ធ្វើការពិភាក្សា និងដោះស្រាយ រួមមាន ទី១បញ្ហាការបង់​ថ្លៃ​ចំណត​ឆ្លងកាត់​នៅខេត្តកំពង់ចាម បញ្ហា​ចំណត​​ឡានក្រុងនៅខេត្តបាត់ដំបង និងបញ្ហាចំណតឡានក្រុងនៅ​ខេត្តរតនគីរី៖ ដោយបញ្ហានេះ ផ្នែក​ឯក​ជន​ បានស្នើសុំឲ្យអ្នក ម៉ៅការ​ចំណត​ខេត្ត​កំពង់​ចាម អនុវត្តតាមសៀវ​ភៅបន្ទុក កិច្ចសន្យា និងការសន្យា ដូចខេត្តដទៃទៀត ស្នើសុំ​ឲ្យឡាន​ក្រុង​អាចចូលក្រុងបាត់​ដំបងនៅពេលយប់ពីម៉ោង ៩យប់ មកទល់ម៉ោង​៥ព្រឹក។ជាមួយនេះ ផ្នែក​ឯក​ជន ក៏បានស្នើ​សុំអនុវត្ត​ឲ្យស្មើភាពក្នុងការតម្រូវឡានឈ្នួលដទៃទៀត ចូលចត​ចំណត​​ក្រៅ​ក្រុង​ដូច​​​​​ឡាន​ក្រុង​ដែរ និង មួយទៀតស្នើសុំរឺម៉កកង់បី នៅខេត្តព្រះសីហនុ ដែលនៅចាំដឹក​អ្នក​ដំណើរ នៅ​ចំណត​ក្រៅក្រុងបញ្ចុះតំលៃជូនអតិថិជន ដែលធ្វើដំណើរទៅលេងឆ្នេរ​ក្នុង​ក្រុង។ បញ្ហាទី២ ការ​ប្រកួតប្រជែងមិនស្មើភាពនៅក្នុងវិស័យដឹកជញ្ជូនផ្លូវគោក៖ លើបញ្ហានេះ ផ្នែក​ឯក​​ជនសំណូមពរ សូមឲ្យ​ក្រសួង​សាធារណការ និងដឹកជញ្ជូន គិតគូរបង្កើតកម្មវិធីការ ផ្តល់​ការលើកទឹក​ចិត្តដ៏​ទូ​លំទូលាយមួយ ចំពោះ​ការ​ចូលជាសមាជិកសមាគមដឹកជញ្ជូន​ទំនិញ​ផ្លូវ​គោក​កម្ពុជា និងរបៀប​វារៈ ទី៣ បញ្ហារថយន្តឆ្លង​កាត់ក្រុង​លើកំណាត់ ផ្លូវលេខ៣៧១ និង​រថយន្ត​​ចូលឈៀក​ពេល​ថ្ងៃ៖ លើ​បញ្ហានេះ ផ្នែកឯកជន បាន​ស្នើ​សុំរថយន្ត​ធំ​អាច​​ឆ្លងកាត់​ផ្លូវ​៥៩៨ ដើម្បីចូលឈៀក ដោយមិនមានការផាកពិន័យ និងបានស្នើសុំឲ្យរថយន្តដឹក​ទំនិញ​អាច​​​ឆ្លងកាត់កំណាត់ផ្លូវលេខ ៣៧១ ,២៧១ ទៅកំពង់ផែភ្នំពេញពេលថ្ងៃត្រង់។

សូមបញ្ជាក់ថា កិច្ចប្រជុំដែលបានរៀបចំនាពេលនេះ គឺធ្វើឡើង​បន្ទាប់ពីក្រុមការងារ​វិស័យឯកជនផ្នែក​ហេដ្ឋារចនាសម្ព័ន្ធ និងដឹកជញ្ជូន បានប្រជុំពិភាក្សាគ្នាចំនួន២ដង​រួចមក​ហើយ ដែល​មាន​របៀប​វារៈចាស់ និង​ថ្មី និងសមាសភាពពាក់ព័ន្ធនានាចូលរួមជាច្រើន៕

នៅព្រឹកថ្ងៃទី៤ ខែមីនា ឆ្នាំ២០១៥ នៅទីស្តី​ការក្រសួង បានប្រារព្វធ្វើ ពិធីបណ្តុះបណ្តាលគ្រូបង្គោល ផ្សព្វផ្សាយច្បាប់ស្តីពីចរាចរណ៍ផ្លូវគោក ក្រោមអធិបតីភាព ឯកឧត្តម ត្រាំ អ៊ីវតឹក រដ្ឋមន្ត្រីក្រសួង​សា​ធារ​ណការ និងដឹកជញ្ជូន ។បន្ទាប់ពី លោក សូ ពិសី អនុប្រធាននាយកដ្ឋានដឹកជញ្ជូនផ្លូវគោក នៃអគ្គនាយកដ្ឋានដឹកជញ្ជូន បាន​ធ្វើ​បទ​បង្ហាញពី​ខ្លឹមសារច្បាប់ស្តី​ពី​ចរាចរណ៍​ផ្លូវគោករួចមក ឯឧរដ្ឋមន្ត្រី ត្រាំ អ៊ីវតឹក មានប្រសាសន៍ថា បច្ចុប្បន្ន​នេះ គ្រោះ​ថ្នាក់​ចរាចរណ៍​ដែល​បានបណ្តាល​ឲ្យមា​ន​មនុស្សស្លាប់ របួស និងពិការ នៅតែបន្ត​កើត​មាន​ឡើង ដោយបាន​បន្សល់​​ទុក នូវ​សោក​​នាដកម្ម ដែលជា​ផល​ប៉ះពាល់ដោយផ្ទាល់ចំពោះប្រជាពលរដ្ឋ បង្ក​ឲ្យ​រងនូវការនិរាស ព្រាត់​ប្រាស់​​កូន​ចៅ បងប្អូន ឪពុកម្តាយ មិត្តភក្តិ ព្រមទាំងខាត បង់ទ្រព្យសម្បត្តិរដ្ឋ និង​ឯក​ជន​​​សរុប​អស់រាប់រយលាន​ដុល្លារ​​​ក្នុង​មួយឆ្នាំៗ។ ឯកឧត្តមរដ្ឋមន្ត្រី ​មានប្រសាសន៍លើកឡើងថា តាមព័ត៌​មាន​បណ្តោះ​អាសន្នក្នុងឆ្នាំ​២០១៤ មាន​អ្នក​​ស្លាប់ចំនួន២១៤៨កើន​ឡើង​១៣% ធៀបទៅនឹងឆ្នាំ​២០១៣ និង​របួស​ចំនួន៨០៥៧នាក់។ ក្នុងគោលដៅ​លប់​បំបាត់ផលប៉ះពាល់​អវិជ្ជ​មាននេះ រាជ​រដ្ឋាភិបាល តាមរយៈគណៈ​កម្មា​ធិ​​ការជាតិសុវត្ថិភាពចរាចរណ៍ផ្លូវគោក ក្រសួង​​សាធារណ​ការ និងដឹកជញ្ជូន ក្រសួង ស្ថាប័នពាក់ព័ន្ធ អង្គការ​មិន​មែនរដ្ឋាភិបាល និងវិស័យ​ឯក​ជន​នានា បាន​សិក្សា​ស្វែងយល់អំពីយុទ្ធសាស្ត្រគន្លឹះនានា រួមទាំងការស្រាវ​ជ្រាវឫសគល់ជាប្រភពនៃ​បញ្ហា​បង្ក​ឲ្យ​មាន​គ្រោះ​ថ្នាក់​ចរាចរណ៍ដ៏កាច​សាហាវនេះ ហើយបាន ដាក់ចេញ​នូវ​វិធានការនានា ដើម្បី​ទប់ស្កាត់ កាត់​បន្ថយ​​​ឲ្យចុះមក​នៅ​កំរិតទាបបំផុត នូវគ្រោះថ្នាក់ដែលជាមហន្តរាយ​សំរាប់​សង្គម និងជាឧបសគ្គ​ក្នុងការរារាំង​ដល់ដំណើរ ការ​នៃ​ការ​អភិ​វឌ្ឃន៍ប្រទេសរបស់រាជរដ្ឋាភិបាលកម្ពុជា។ វិធានការទាំងនោះរួមមាន គោល​នយោ​បាយ​ជាតិសុវត្ថិ​ភាព​​​ចរា​ចរ​ណ៍​​​ផ្លូវគោក ផែនការសកម្មភាពសុវត្ថិភាព​ចរាចរណ៍ផ្លូវគោក ដែលរាជរដ្ឋាភិ​បាល​បាន​អនុម័ត​កាល​ពីដើមឆ្នាំ​២០១៤​កន្លងមក និងច្បាប់ចរាចរណ៍​ផ្លូវ​គោក​ដែលអង្គពិធីត្រូវទទួលបាន​ការ​បណ្តុះ​បណ្តាលឲ្យក្លាយជា​គ្រូ​បង្គោល​​​សំរាប់បន្តផ្សព្វ​ផ្សាយឲ្យ​បានទូលំ​ទូលាយដល់មន្ត្រីរាជការ និយោជិត និងប្រជាពលរដ្ឋ​គ្រប់មជ្ឈដ្ឋានឲ្យ​មាន​ការ​យល់​ដឹងអំពីខ្លឹមសារ និង​គោល​​បំណងនៃ ច្បាប់ ចរាចរណ៍ ហើយ​ចូល​រួមគោរព​ឲ្យ​មាន​ប្រសិទ្ធភាពខ្ពស់​នូវ​ច្បាប់​គោល​នេះ ហើយខិតខំ​ប្រុងប្រយ័ត្ន ក្នុងការធ្វើដំណើរ​តាមដង​ផ្លូវ ធ្វើយ៉ាងណា​បញ្ជៀសឲ្យបាន​នូវគ្រោះ​ថ្នាក់​ចរា​ចណ៍ និងការទទួល​ទោសពិន័យ ដែលមាន​ចែងក្នុង​ច្បាប់។ ​ក្នុងឱកាសនេះ ឯកឧត្តមរដ្ឋមន្ត្រី បានមាន​ប្រសា​សន៍​ជំរុញ​​ណែនាំ​ដល់​គណៈ​កម្មាធិការ សុវត្ថិភាពចរាចរណ៍ ត្រូវ​យក​ចិត្តទុកដាក់ និងរួមសហការជាមួយក្រសួង ស្ថាប័ន​ពាក់​ព័ន្ធ និង​ដៃគូអភិវឌ្ឍន៍នានា ទៅលើទិន្នន័យ​នៃគ្រោះថ្នាក់ចរាចរណ៍ នៅតាមខែ នីមួយៗ ថាតើវាមានការកើនឡើង រឺថយ​ចុះ ដើម្បី​យើង​ធ្វើ​ការ​ប្រៀបធៀប និងចាត់​វិធាន​ការ​ទប់​ស្កាត់ និងលើកទិសដៅបន្ត។ ឯកឧត្តមរដ្ឋមន្ត្រី ត្រាំ អ៊ីវតឹក បាន​មាន​ប្រសា​សន៍បញ្ជាក់ថា ដើម្បីចាត់​វិធាន​ការ​ក្នុង​ការកាត់បន្ថយនូវគ្រោះថ្នាក់ចរាចរណ៍ ចាំបាច់​យើង​ត្រូវ​មាន​តួ​លេខ​មួយឲ្យបានច្បាស់លាស់ ដើម្បីកំណត់ ថាតើយើង នឹងកំណត់ទិសដៅឲ្យថយចុះ មកនៅ​ត្រឹមប៉ុន្មាន ហើយ​ការ​ធ្វើឲ្យថយចុះនេះ តើយើងត្រូវមានវិធានការអ្វីខ្លះ ហើយត្រូវ​ធ្វើ​ដោយ​របៀប​ណា ដែលអាចឈាន់​ទៅកាត់​បន្ថយ​លើបញ្ហាគ្រោះថ្នាក់ចរាចរណ៍នេះឲ្យបានជោគជ័យ។ ឯកឧត្តមរដ្ឋមន្ត្រី​ ត្រាំ អ៊ីវតឹក បាន​ផ្តាំ​ផ្ញើរ​ដល់​សិក្ខា​​កាម​ទាំង​អស់ ត្រូវយកចិត្តទុក​ដាក់​ស្តាប់​បទ​បង្ហាញ និង​សកម្ម​ក្នុងការសាក​សួរ​លើចំណុច​ដែល​ស្រពិច​ស្រពិល និង​ផ្តល់អនុ​សាសន៍នានា ដើម្បី​ចូល​រួម​ចំណែក​ក្នុង​ការ​ជំរុញ​​ប្រសិទ្ធ​ភាព​នៃការផ្សព្វ​ផ្សាយ និងការ​អនុវត្តច្បាប់​ចរាច​​​រណ៍នេះ ទាំងជាក់ស្តែងនៅ​លើ​ផ្លូវ​ថ្នល់ ទាំង​ការ​កសាងនូវ​បទ​ដ្ឋានគតិយុត្តិ​ពាក់ព័ន្ធនានា៕

នៅព្រឹកថ្ងៃទី៥ ខែមីនា ឆ្នាំ​២០១៥ នៅទីស្តីការក្រសួង បាន ប្រារព្វធ្វើពិធីរំលឹកខួបលើកទី១០៤ ទិវាអន្តរជាតិនារី ៨ មីនា ឆ្នាំ២០១៥ ក្រោមអធិបតីភាព ​ឯកឧត្តម ត្រាំ អ៊ីវតឹក រដ្ឋមន្ត្រី ក្រសួងសាធារណការ និងដឹកជញ្ជូន ព្រមទាំង​មានការ​អញ្ជើញចូលរួមពី លោកជំទាវ ច័ន្ទ សូរីយ៍ រដ្ឋលេខាធិការ ក្រសួងកិច្ចការនារី លោកជំទាវ ជូ ប៊ុនអេង អនុប្រធាន គណកម្មការកណ្តាលសមាគមនារីកម្ពុជាដើម្បីសន្តិភាព និងអភិវឌ្ឍន៍ លោកជំទាវ ហ៊ូ សាមិត្ត តំណាងក្រុម ប្រឹក្សាជាតិកម្ពុជាដើម្បីស្ត្រី និងមានការចូលរួមពី​មន្ត្រី​រាជ​ការនិយោជិត ជាសមាជិកា ចំនួនប្រមាណ៣៥០នាក់ ។

លោកជំទាវ មឹន មាណវី បានមានប្រសាសន៍ថា  ពិធីរំលឹក​ខួបលើកទី១០៤ ទិវាអន្តរជាតិនារី ៨ មីនា ឆ្នាំ២០១៥នេះ ប្រព្រឹត្តទៅក្រោម​ប្រធានបទ ដំណើរឆ្ពោះទៅមុខ ស្ត្រីកម្ពុជាក្រោយ​សន្និ​សីទស្រ្តីពិភពលោក​ឆ្នាំ១៩៩៥។​ លោកជំទាវ មានប្រសាន៍​បញ្ជាក់ថា នៅប្រទេសកម្ពុជា ចាប់តាំងពីឆ្នាំ១៩៧៩ ដែល​បន្ទាប់​ពី​បាន​រំដោះប្រទេស កម្ពុជា ចេញពីរបបប្រល័យពូជសាសន៍ប៉ុលពត ថ្នាក់ដឹកនាំកំពូលទាំងបីរូប គឺសម្តេចអគ្គ​មហា​ធម្ម​​ពោធិសាល ជា ស៊ីម ប្រធានព្រឹទ្ធសភា សម្តេចអគ្គមហាពញាចក្រី ហេង សំរិន ប្រធានរដ្ឋសភា និង​សម្តេច​​អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានកំណត់ឲ្យមាន​ការ​​ប្រារព្វពិធីរំលឹកខួបនៃ ការទទួលស្គាល់ សិទ្ធិស្ត្រីនេះ នៅតាមស្ថាប័នគ្រប់លំដាប់ថ្នាក់នៅទូទាំងប្រទេស រហូរដល់បច្ចុប្បន្ននេះ រួមជាមួយនឹងការយកចិត្តទុកដាក់ផ្តល់តម្លៃយ៉ាងខ្ពស់ពីរាជ រដ្ឋាភិបាល ដែលមាន​សម្តេចតេជោ ហ៊ុន សែន ជាប្រមុខ បាន​បង្កលក្ខណៈឲ្យមានការតែងតាំង តម្លើងឋានៈតួនាទី​ស្ត្រី​ជាបន្ត​បន្ទាប់ និងបង្កើនអាយុចូលនិវត្ត​របស់​មន្ត្រី​រាជ​ការនិយោជិតនារី ដែលជាវិធានការបន្ទាន់ ដើម្បីលើក​កំពស់​ការ​​ចូលរួមរបស់ស្ត្រីនៅក្នុងសង្គមកម្ពុជា។ ជាក់ស្តែងក្នុងឆ្នាំ២០១៥នេះ ដោយមិនគិតបញ្ចូលមន្ទីរ សាធារណ​ការរាជធានី ខេត្ត មន្ត្រីរាជការ និយោជិត​នារី​មានចំនួន៧០៨នាក់ ស្មើនឹង១៤,៤០% ក្នុងចំនួនមន្ត្រីរាជ​ការ​សរុប​៤៩១៦នាក់ គឺមានការកើនឡើងជាង ឆ្នាំ២០១៤ ដែលមានមន្ត្រីរាជការ និយោជិតនារីមានតែ៦៧៩នាក់ ស្មើនឹង១៣,៤៤% ក្នុងចំនួនមន្ត្រីរាជ​ការ​សរុប៥០៤៩នាក់។ដោយឡែកការតែតាំងមន្រ្តីរាជការនារី បានកើន​ឡើង​​ជាបន្តបន្ទាប់ ទាំងថ្នាក់ កណ្តាល ថ្នាក់សហគ្រាសសាធារណៈ និងថ្នាក់ខេត្ត ក្នុងនោះមាន​ថ្នាក់​រដ្ឋ​លេ​ខា​ធិ​ការ អនុរដ្ឋលេខាធិការ អគ្គនាយករង ថ្នាក់ ប្រធាន អនុប្រធាននាយកដ្ឋាន ថ្នាក់ប្រធាន អនុប្រធាន​ការិ​យា​ល័យ អង្គភាព ផ្នែក និងក្រុម សរុបចំនួន ១២០នាក់ គឺមានការកើនឡើងជាងឆ្នាំ២០១៤ ដែលមាន​តែ៩៥​នាក់។

លោកជំទាវ ច័ន្ទ​ សូរីយ៍ មានប្រសាសន៍ថា ក្នុងឱកាសអបអរសាទរ ទិវាអន្តរជាតិនារី ៨ មីនា ឆ្នាំ​២០១៥​នេះ ក្រសួងកិច្ចការនារីបានជ្រើសរើសប្រធានបទ ស្របតាម ប្រធានបទសកល គឺដំណើរឆ្ពោះ​ទៅមុខ ស្ត្រីកម្ពុជាក្រោយ​សន្និ​សីទស្រ្តីពិភពលោក​ឆ្នាំ១៩៩៥ គឺក្នុងគោលបំណងរំលឹកពីការតស៊ូរបស់នារីទូទាំង​ពិភព​លោក ក្នុងការ ទាមទារសិទ្ធិសេរីភាព ប្រជាធិបតេយ្យ និងការអនុវត្តសិទ្ធិស្មើគ្នា រវាងបុរស និងស្ត្រី ត្រួត​ពិនិត្យ​នូវសមិទ្ធផលនានា ដែលកើតឡើងក្នុងរយៈពេល ២០ឆ្នាំក្រោយសន្និសីទ ព្រមទាំងធ្វើការបំផុសគៀគរ​ប្រជា​ពលរដ្ឋកម្ពុជា ឲ្យធ្វើការរួមគ្នា ដើម្បីឈានទៅសំរេចបាន នូវសកម្មភាពពិតប្រាកដ រវាងបុរស និងស្ត្រី។ លោកជំទាវ មានប្រសាសន៍ បន្តថា សេចក្តីប្រកាស់ផែនការសកម្មភាព នាទីក្រុងប៉េកាំង គឺជាការប្តេជ្ញាចិត្ត ដ៏ខ្ពស់ ក្នុងការដោះស្រាយបញ្ហារបស់ស្ត្រី អំពីភាពក្រីក្រ អំពីការអប់រំសុខភាព អំពើហឹង្សា នារីក្នុង​រចនា​សម្ព័ន្ធ​នយោបាយ និងសេដ្ឋកិច្ច តួនាទីនារីក្នុងការធ្វើសេចក្តីសំរេច យន្តការលើកកម្ពស់ការរីកចំរើន​របស់​នារី សិទ្ធិរបស់នារី នៅក្នុងប្រព័ន្ធផ្សព្វផ្សាយ និង បរិស្ថាន។លោកជំទាវ មានប្រសាសន៍បញ្ជាក់បន្តថា រាជរដ្ឋា​ភិ​បាល​កម្ពុជាបានបញ្ជាក់ថា ក្រសួងកិច្ច​ការនារី បានប្តេជ្ញាចិត្តខ្ពស់ ក្នុងការអនុវត្តសេចក្តីប្រកាស តែងតាំង និងសកម្មភាពនានាជាច្រើន ដែលបាន​ជ្រើសយកចំណុចកង្វល់ជាអាទិភាពចំនួន៦ ស្របតាមស្ថានភាព​របស់​ប្រទេសជាតិ ដោយដាក់​ចេញវិស័យ​អាទិ​ភាពនៅក្នុង ផែនការនារីរតនៈ របស់ក្រសួងកិច្ចការនារី។

ឯកឧត្តមរដ្ឋមន្រ្តី ត្រាំ អ៊ីវតឹក មានប្រសាសន៍ថា ពិធីរំលឹក​ខួបលើកទី១០៤ ទិវាអន្តរជាតិនារី ៨ មីនា ឆ្នាំ២០១៥នេះ ធ្វើឡើងក្រោម​ប្រធានបទ ដំណើរឆ្ពោះទៅមុខ ស្ត្រី កម្ពុជាក្រោយ​សន្និ​សីទស្រ្តីពិភពលោក​ឆ្នាំ១៩៩៥។ឯឧរដ្ឋមន្រ្តី មានប្រសាសន៍បញ្ជាក់ថា ប្រធានបទនេះ ពិតជាមានទំនាក់ទំនងទៅនឹងប្រធានបទ កាលពីឆ្នាំមុន សមភាពនៃការអប់រំ មានសារៈសំខាន់ក្នុងកិច្ចអភិវឌ្ឍន៍សង្គម និងក៏បានស្តែងឲ្យ​ឃើញអំពី​លទ្ធ​​​ផលដ៏មានមោទភាព  ដែលកើតចេញពីឆន្ទៈដ៏មុះមុតរបស់សម្តេចតេជោ ជាប្រមុខរាជរដ្ឋាភិបាល អា​ណ​ត្តិ​ទី៥ ក្នុងការលើកកំពស់ តួនាទី និងតម្លៃស្ត្រីយ៉ាងពិតប្រាកដ ដោយក្នុងអាណត្តិនេះ សម្តេច បានតែងតាំង និងតម្លើងឋានៈស្រ្តី ជារដ្ឋលេខាធិការចំនួន៣៨នាក់ និងអនុរដ្ឋលេខាធិការចំនួន៤៨នាក់។​ជាក់ស្តែង​កាល​ពី​ថ្ងៃ​ទី១៦ ខែកុម្ភៈ ឆ្នាំ២០១៥នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ក៏បាន​ដាក់​ចេញនូវអនុសាសន៍ថ្មីចំនួន១២ចំណុច សំរាប់ជំរុញ និងត្រួតពិនិត្យលើការអនុវត្តគោលនយោ​បាយពាក់ព័ន្ធ​នឹង​​ការលើកកំពស់តួនាទីស្ត្រី ដោយសម្តេច បានសង្ងត់ធ្ងន់ឲ្យបន្តការយកចិត្តទកដាក់ក្នុងការផ្សព្វ​ផ្សាយខ្លឹម​សារ​អនុសញ្ញាស្តីពីការលប់បំបាត់រាល់ទំរង់ រើសអើងប្រឆាំងនឹងនារីភេទ ឲ្យបានទូលំទូលាយដល់មូលដ្ឋាន។​បន្តការលើកកំពស់សមត្ថភាពចំណេះដឹងដល់ស្ត្រី ជាពិសេសស្ត្រីជាថ្នាក់ដឹកនាំ និងស្ត្រីវ័យក្មេង និងបង្ក​លទ្ធ​ភាព និងឱកាសក្នុងការសិក្សាដល់សិស្ស និស្សិតជាស្ត្រី លើកកំពស់ជីវភាព សេដ្ឋកិច្ច សុខមាលភាព និង​សុវត្ថិភាពទូទៅដល់ស្ត្រីទូទៅ ជាពិសេសស្ត្រីនៅជនបទ។ជាការពិតណាស់ថា ស្ថានភាពរបស់ស្ត្រីនៅកម្ពុជា ពិតជាត្រូវបានលើកកំពស់ និងយកចិត្តទុកដាក់តាមឆន្ទៈដ័ឧត្តុង្គឧត្តមរបស់ សម្តេចតេជោ ហ៊ុន សែន ជាប្រមុខដ៏ឆ្នើម និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលពីមួយថ្ងៃទៅមួយថ្ងៃ បានធ្វើឲ្យស្ត្រីកាន់ តែមានសក្តានុពល ក្នុងការចូលរួមលើគ្រប់វិស័យ ដើម្បីជំរុញល្បឿននៃកំណើនសេដ្ឋកិច្ច និងការអភិវឌ្ឍ​ប្រទេស និងសង្គមឲ្យមានការរីកចំរើនប្រកបដោយចិរភាព និងមានសុវត្ថិភាព និងសណ្តាប់ធ្នាប់ សីលធម៌​ល្អថ្លៃថ្នូរ។ក្នុងឱកាសនេះ ឯកឧត្តមរដ្ឋមន្ត្រី ត្រាំ អ៊ីវតឹក មានប្រសាសន៍បញ្ជាក់ទៀតថា នៅឆ្នាំ២០១៥នេះ កម្ពុជា នឹងមានស្ពានធំៗ ចំនួន៤កន្លែង ដែលនឹងត្រូវសម្ពោធដាក់ឲ្យប្រើប្រាស់ជាផ្លូវការ ទី១ ស្ពានឆ្លងកាត់​ទន្លេ​សាប  ទី២ ស្ពានតាខ្មៅ ឆ្លងកាត់ទន្លេបាសាក់ ទី៣ ស្ពានអ្នកលឿង និងទី៤ ស្ពានមេគង្គស្ទឹងត្រែង ព្រមទាំង​មានពិធីបើកការដ្ឋានស្ថាបនាផ្លូវមួយចំនួនទៀតផងដែរ ដែលនេះ គឺជាសមិទ្ធផល ដែលមិនអាច​កាត់ផ្តាច់​បានពីការ​ចូល​រួម​​ចំណែករបស់មន្ត្រីរាជការ និយោជិត កម្មករនារី ទាំងអស់ ដែលបានរួមចំណែកជាមួយ​មន្ត្រីរាជ​ការ​និយោ​ជិតជាបុរស បំពេញភារកិច្ចជំនាញប្រកបដោយការទទួលខុសត្រូវខ្ពស់ លើការអនុវត្ត​បេស​កកម្មរបស់ក្រសួង ឲ្យទទួលបានជោគជ័យគួរជាទីមោទនៈ។ ឯកឧត្តមរដ្ឋមន្ត្រី ក៏បានជំរុញឲ្យសមាគមនារី ក៏ដូចជា​មន្ត្រី​រាជការ និយោជិតជានារី​ ខិតខំអនុវត្តបន្ថែមនូវសកម្មភាពជួយអប់រំផ្សព្វផ្សាយ និងក្រើនរំលឹក​ឲ្យមាន​ការ​គោរពច្បាប់ចរាចរណ៍ផ្លូវគោកថ្មីនេះ ដោយត្រូវរលឹកឲ្យមានការប្រុងប្រយ័ត្ន និងអធ្យាស្រ័យគ្នាក្នុងពេល​ធ្វើ​ចរាចរណ៍តាមផ្លូវថ្នល់ មិនត្រូវបើកបរលើសល្បឿនកំណត់  ត្រូវពាក់ខ្សែក្រវ៉ាត់ ទាំងអ្នកនៅខាងមុខ និង​ខាង​ក្រោយពេកជិៈរថយន្ត ពាក់មួកសុវត្ថិភាពពេលជិៈម៉ូតូទាំងអ្នកបើកបរ និងអ្នករួមដំណើរ កុំពិសារគ្រឿង​ស្រវឹង​ពេលបើកបរ កុំបើកបរក្នុងភាពងោកងុយ កុំវ៉ាជែងទាំងប្រថុយប្រថាន និងកុំដឹកលើសទម្ងន់ ឫសំពីង​សំពោង។

ក្នុងឱកាសនេះ គណៈអធិបតី ក៏បានអញ្ជើញ ផ្តល់នូវកន្ត្រក់ផ្កា ដ៏ស្រស់ស្អាត  និង​វត្ថុ​អនុស្សាវរីយ៍ ជូន​ដល់​លោកជំទាវជាថ្នាក់ដឹកនាំ នៃក្រសួងសាធារណការ នឹ​ងដឹកជញ្ជូន និង​លោកជំទាវមកពី​ស្ថាប័ន​ពាក់​ព័ន្ធ​នានា និងតំណាងនារីមកពី មន្ទីរ អង្គភាពពាក់ព័ន្ធ ក្រោម​ឱវាទ​ក្រសួង  ព្រមទាំង​បាន​អញ្ជើញផ្តល់​នូវ​វត្ថុ​អនុស្សាវរីយ៍ ដល់មន្ត្រីរាជការ និយោជិត ​ សមាជិកាអង្គពិធីចំនួន ៣៥០នាក់ ដោយក្នុងម្នាក់ៗ ទទួល​បាន សំពត់​ស៊ឹង១ និងថវិកាចំនួន ២ ម៉ឺនរៀល ៕

នៅព្រឹកថ្ងៃទី៩ ខែមីនា ឆ្នាំ២០១៥ នៅទីស្តីការក្រសួងសាធារណការ និងដឹកជញ្ជូន  គណៈកម្មការចម្រុះអន្តរក្រសួង រួមមានក្រសួងពាណិជ្ជកម្ម ក្រសួងសាធារណការ និងដឹកជញ្ជូន ក្រសួងការបរទេស និងសហប្រតិបត្តិការអន្តរជាតិ ក្រសួងមហាផ្ទៃ ទីស្តីការគណៈរដ្ឋមន្ត្រី ក្រសួងសុខាភិបាល និងអាជ្ញាធរខេត្តបន្ទាយមានជ័យដឹកនាំ ដោយ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម និងជាអនុប្រធានប្រចាំការក្រុមប្រឹក្សាអភិវឌ្ឍន៍កម្ពុជា និងឯកឧត្តម ត្រាំ អ៊ីវតឹក រដ្ឋមន្ត្រីក្រសួង សាធារណការ និង ដឹកជញ្ជូន បានបើកកិច្ចប្រជុំពិនិត្យលើរបាយការណ៍បញ្ចប់ការសិក្សាគម្រោងសាងសង់អគារប៉ុស្តិ៍ព្រំដែនស្ទឹងបត់ និងហេដ្ឋារចនាសម្ព័ន្ធផ្លូវ  ថ្នល់ ស្ពាន ត្រង់ចំណុចស្ទឹងបត់ព្រំដែនកម្ពុជា-ថៃ និងផ្លូវតភ្ជាប់មកផ្លូវជាតិលេខ៥ស្ថិតក្នុងខេត្តបន្ទាយមានជ័យ ជាមួយទីប្រឹក្សាបច្ចេកទេស AEC និងទីភ្នាក់ងារអភិវឌ្ឍន៍ សេដ្ឋកិច្ចនៃប្រទេសជិតខាង NEDA នៃព្រះរាជាណាចក្រថៃ ដឹកនាំដោយ ឯកឧត្តម NUTTAVUTDH PHOTISARO ឯកអគ្គរាជទូតនៃព្រះរាជាណាចក្រថៃប្រចាំនៅ កម្ពុជា ។

កិច្ចប្រជុំនេះ បានរៀបចំឡើងក្នុងគោលបំណង ដើម្បីធ្វើការត្រួតពិនិត្យទៅលើរបាយការណ៍បញ្ចប់ការសិក្សា គម្រោងសាងសង់អគារប៉ុស្តិ៍ព្រំដែនស្ទឹងបត់ និងហេដ្ឋា រចនាសម្ព័ន្ធផ្លូវ ថ្នល់ ស្ពាន ត្រង់ចំណុចស្ទឹងបត់ព្រំដែនកម្ពុជា-ថៃ និងផ្លូវតភ្ជាប់មកផ្លូវជាតិលេខ៥ ស្ថិតក្នុងខេត្តបន្ទាយមានជ័យ និងដើម្បីប្រជុំពិភាក្សាបន្តនូវចំណុច ដែលត្រូវដាក់បញ្ចូលបន្ថែមទៀត ដើម្បីឲ្យគម្រោងប្លង់នេះ ប្រព្រឹត្តទៅដោយរលូន និងជោគជ័យ។
អង្គប្រជុំបានប្រព្រឹត្តទៅ ដោយភាគីទាំងពីរ បានធ្វើការពិភាក្សាលម្អិតទៅលើគម្រោងខាងលើ ដោយរួមមាន ការរៀបចំអគារបម្រើ ពហុសេវាកម្មឆ្លងកាត់ ព្រំដែន ការរៀបចំមជ្ឈមណ្ឌល ឃ្លាំង ចំណត់រថយន្តដឹកជញ្ជូន និងផ្លូវតភ្ជាប់មកផ្លូវជាតិលេខ៥ ការពិនិត្យទៅលើទិដ្ឋភាពបរិស្ថាន សេដ្ឋកិច្ចសង្គម ប្រសិទ្ធភាពសេដ្ឋកិច្ចរបស់ គម្រោងការជន់លិច តំបន់ស្ទឹងបត់ និងការចូលរួមពីផ្នែកឯកជនរបស់ប្រទេសទាំងពីរ ក្នុងការអភិវឌ្ឍន៍សេដ្ឋកិច្ចសង្គមតំបន់ព្រំដែន ជាពិសេស ក្នុងកិច្ចប្រជុំនេះដែរ តំណាងក្រសួង ស្ថាប័ន អង្គភាពពាក់ ព័ន្ធនានា របស់កម្ពុជា និងថៃ ក៏បានលើកឡើងពីគោលបំណងរបស់ខ្លួន ទាក់ទងទៅនឹងការសាងសង់អគារ បម្រើពហុសេវាកម្ម ឆ្លងកាត់ព្រំដែន នីមួយៗរបស់ខ្លួនផងដែរ។
បន្ទាប់ពីការលើកឡើងជាមតិយោបល់ និងសំណើរ ជាបន្តបន្ទាប់រួចមក អង្គពិធីក៏បានប្រជុំពិភាក្សា និងឯកភាព ទទួលយកនូវចំណុចដែលក្រសួង ស្ថាប័ន និងអង្គភាព ពាក់ព័ន្ធនានា របស់ប្រទេសកម្ពុជា និងថៃ បានលើកឡើង និងប្តេជ្ញាជំរុញគម្រោងបើកច្រកទ្វារអន្តរជាតិស្ទឹងបត់ ឲ្យបានឆាប់រហ័សបំផុត។

សូមបញ្ជាក់ថា តាមអ្នកជំនាញបច្ចេកទេស គ្រោងរៀបចំគម្រោងច្រកទ្វារព្រំដែនអន្តរជាតិស្ទឹងបត់នេះ ជាពីរដំណាក់កាល គឺដំណាក់កាលទី១ រៀបចំផ្លូវតភ្ជាប់មកផ្លូវ ជាតិលេខ៥ សាងសង់ច្រកទ្វារព្រំដែន អគាររដ្ឋបាល អគារស្នាក់នៅបណ្តោះអាសន្ន អគារឃ្លាំងសម្រាប់ត្រួតពិនិត្យ ទីលានស្តុកកុងទែរន័ត អគារជួសជុល ចំណត រៀបចំតំបន់បៃតង និងបំពាក់បរិក្ខាត្រួតពិនិត្យនិងលើកដាក់។ ដោយឡែកចំពោះការសាងសង់ និងបំពាក់ទុព្វសំភារៈ រួមមាន សំណង់សេវាត្រួតពិនិត្យឆ្លងកាត់ព្រំដែន អគារស្នាក់នៅបណ្តោះអាសន្ន ឃ្លាំងត្រួតពិនិត្យ ទីលានកុងទែរន័រ ផ្លូវបេតុង និងស្ពានរំលងផ្លូវជាតិលេខ៥ បំពាក់ម៉ាស៊ីនស្កែនខ្នាតធំ ២គ្រឿង ឧបករណ៍លើកដាក់កុង ទែរន័រខ្នាតធំ១គ្រឿង ខ្នាតតូច១០គ្រឿង។ ដំណាក់កាលទី២ រៀបចំឲ្យមានការចូលរួមពីផ្នែកឯកជនក្រោមរូបភាពPPP ក្នុងការអភិវឌ្ឍន៍តំបន់ស្ទឹងបត់ ជាតំបន់ ឡូជីស្ទីក ជាតំបន់ពាណិជ្ជកម្ម ជាតំបន់ឃ្លាំងឧស្សាហកម្ម ជាតំបន់ពាណិជ្ជកម្ម និងជាតំបន់ស្នាក់នៅ។ គម្រោងច្រកទ្វារអន្តរជាតិស្ទឹងបត់នេះ មានលក្ខណៈកម្រឹតអន្តរ ជាតិ ដោយបានត្រៀមឲ្យមានទីតាំងសម្រាប់យន្តការត្រួតពិនិត្យរួមគ្នា សម្រាប់មន្ត្រីជំនាញទាំងពីរភាគី កម្ពុជា-ថៃ៕

នៅព្រឹកថ្ងៃទី១១ ខែមីនា ឆ្នាំ២០១៥ នៅទីស្តីការក្រសួង បាន​ប្រារព្វ​បើកសន្និបាតបូកសរុបលទ្ធផល ការងារប្រចាំឆ្នាំ២០១៤ និង​ទិសដៅ​ផែនការ​សកម្ម​ភាព​ឆ្នាំ២០១៥ ក្រោម អធិបតីភាព ឯកឧត្តម ត្រាំ អ៊ីវតឹក រដ្ឋមន្ត្រី​ក្រសួង​សា​ធារ​ណ​ការ និងដឹកជញ្ជូន នៅទីស្តីការក្រសួង។

បន្ទាប់ពីបានស្តាប់របាយការណ៍របស់ ឯកឧត្តម វ៉ាស៊ឹម សុរិយា អគ្គនាយករដ្ឋបាល​នៃក្រសួង​សាធារ​ណ​ការ និងដឹកជញ្ជូន ពីលទ្ធផលការងារដែលសម្រេចបាននៅ ឆ្នាំ២០១៤ លើការងារកសាងបណ្តាញ​ផ្លូវជាតិ និងផ្លូវខេត្ត  ការងារស្តារ និងស្ថាបនាហេដ្ឋារចនាសម្ព័ន្ធផ្លូវថ្នល់ ការ​ងារ​សាងសង់ផ្លូវថ្នល់ស្ពានជាយុទ្ធសាស្ត្រ​មួយ​​ចំនួន តាមអនុសាសន៍ ដ៏ខ្ពង់ខ្ពស់របស់សម្តេចតេ​ជោ​​​នាយករដ្ឋមន្ត្រី ការងារជួសជុល និងថែទាំហេដ្ឋា​រច​នា​​សម្ព័ន្ធដឹកជញ្ជូន  សុវត្ថិភាព​ចរាច​​​រណ៍​តាមរយៈ​ការកែលំអ និងការ ពង្រឹងការអនុវត្ត​ច្បាប់ស្តីពី​ចរាចរណ៍​ផ្លូវ​គោក ការរៀបចំ និង​អនុវត្តន៍ផែនការមេ ​នៃការ​អភិវឌ្ឍហេដ្ឋារចនាសម្ព័ន្ធដឹកជញ្ជូន ដើម្បីតភ្ជាប់ផ្ទៃ​ក្នុង​ប្រទេស និង​ជាមួយ ប្រទេសជិតខាង ការ រៀបចំ​គោលនយោបាយ និងក្របខ័ណ្ឌនគិតិយុត្ត​ចាំបាច់​សម្រាប់​ការគ្រប់គ្រង និងអភិវឌ្ឍន៍ហេដ្ឋារចនាសម្ព័ន្ធ ការរៀបចំផែនការមេ​នៃការ អភិវឌ្ឍន៍​ហេដ្ឋា​រចនា​សម្ព័ន្ធ ទីក្រុង និងការបន្តជំរុញការចូលរួមវិស័យឯកជន ក្នុងការអភិវឌ្ឍវិស័យហេដ្ឋារចនា​សម្ព័ន្ធ​​ដឹកជញ្ជូន តាមរយៈ​ការ​ពង្រឹង និងការកែ លម្អយន្តការភាពជាដៃគូ​រវាងវិស័យ​សា​ធារ​ណៈ និងវិស័យឯកជន ហើយនិងទិសដៅ​សំខាន់​ៗ និងការងារផ្សេងៗ ប្រចាំឆ្នាំ២០១៥ ដែល​ត្រូវ​អនុវត្តបន្តរួចមក ឯកឧត្តមរដ្ឋមន្ត្រី ត្រាំ អ៊ីវតឹក បានមានប្រសាសន៍ថា ក្រសួង​សាធារណការ និងដឹកជញ្ជូន បានរៀប​ចំឡើងនូវសន្និបាតបូកសរុបការងារឆ្នាំ ២០១៤​នេះ ឲ្យស្រប​ជា​មួយ​កម្មវិធីនយោ​បាយ​យុទ្ធ​សាស្ត្រចតុកោណដំណាក់កាលទី៣ របស់រាជរដ្ឋា​ភិបាល​កម្ពុជា អាណត្តិទី៥ នៃ​រដ្ឋ​ស​​ភា​ជាតិ ដែលផ្តោតសំខាន់ទៅលើកំណើនការងារ​ សមធម៌ និងប្រសិទ្ធភាព ដែលត្រូវទាមទារ​នូ​វ​ការ​ខិតខំ​ប្រឹង​ប្រែង និង សកម្មភាពបន្ថែម ដើម្បីជំរុញការអនុវត្តការងារជំនាញរបស់ក្រសួង ឲ្យមានប្រសិទ្ធភាព​ខ្ពស់​បន្ថែមទៀត។ ឯកឧត្តមរដ្ឋមន្ត្រី មាន​ប្រសាសន៍បន្តថា គោលបំណង​សំខាន់​ជាចំបង នៃអង្គសន្និបាត​នា​ពេល​នេះ គឺត្រួតពិនិត្យ និងវាយតម្លៃ​លើស្នាដៃ និង លទ្ធផល ការងារ ដែលក្រសួងទទួលបានក្នុងការអនុវត្ត​ការងារ​រយៈ​​ពេល​ពេញមួយឆ្នាំ នៅឆ្នាំ២០១៤ កន្លងមកនេះ ដោយមានការអញ្ជើញចូលរួមពីថ្នាក់ដឹកនាំ និងមន្ត្រី​ពាក់​ព័ន្ធ ដើម្បីពិនិត្យមើលនូវ​វឌ្ឍនភាពការងារ ការពិភាក្សាផ្លាស់ប្តូរយោបល់ និងដកស្រង់នូវ បទពិសោធន៍ល្អៗ ពិចារ​ណា និងត្រង់​ត្រាប់​នូវអនុសាសន៍ដ៏ល្អប្រពៃ និងមានតម្លៃ វិសេសវិសាលរបស់ប្រមុខរាជរដ្ឋាភិបាល ដើម្បី​​​ដោះ​ស្រាយបំពេញ​បន្ថែម និងកែលម្អចំណុច​ខ្វះខាតនានា ដែលមានកន្លងមក និងដើម្បីឈាន​ទៅ​អនុ​វត្ត​ទិស​ដៅ និងការងារថ្មី នៅ​បណ្តា​ឆ្នាំខាងមុខ ពិសេសឆ្នាំ២០១៥ ឲ្យសម្រេចបានជោគជ័យ។ ឯឧរដ្ឋមន្ត្រី ត្រាំ អ៊ីវតឹក មាន​ប្រសា​សន៍​បញ្ជាក់ថា ការចូលរួមរបស់ ឯឧ លោកជំទាវ លោក លោកស្រី គឺជាវិភាគ​ទាន​​ដ៏មាន​តំលៃ និងមិនអាចកាត់ផ្តាច់បាន ក្នុងការរួមចំណែកយ៉ាងសកម្ម ក្នុងការស្តារ និងសាងសង់ ផ្លូវ ថ្នល់ ស្ពាន ទាំងអស់ ដែលជា ចំណែកមួយនៃការកសាង និងអភិវឌ្ឍហេដ្ឋារចនាសម្ព័ន្ធរូបវ័ន្ត ដែលស្ថិតក្នុង​មុំអាទិ​ភាព​​ទី២ ចតុកោណទី២ នៃយុទ្ធសាស្ត្រចតុកោណដំណាក់កាលទី៣ របស់ រាជរដ្ឋាភិបាលអាណត្តិទី៥ នៃ​នីតិកាល​រដ្ឋសភានេះ ដែលមានសម្តេចតេ​ជោ​នា​យករដ្ឋមន្ត្រី ជាប្រមុខ ដែលបាន​ដាក់ចេញ​នូវចក្ខុ​វិស័យ​វែង​ឆ្ងាយ និង​ប្រកបដោយ កិត្តិបណ្ឌិតឈ្លាស់វៃ ក្នុងការកសាង និងអភិវឌ្ឍហេដ្ឋារចនាសម្ព័ន្ធរូបវន្ត ពិសេសជំរុញ​អនុវត្ត​ផែនការមេវិស័យដឹកជញ្ជូន និង ភស្តុភាកម្ម និងតភ្ជាប់បណ្តាញផ្លូវ គមនាគមន៍ក្នុងតំបន់ ឲ្យមាន​ភាព​រឹងមាំ និង​អាចចាប់យក​កាលានុវត្តភាពផ្សេងៗ ពិសេសការអនុវត្តសហគមន៍សេដ្ឋកិច្ច​អាស៊ាន ឆ្នាំ២០១៥​នេះ។​ ឯកឧត្តមរដ្ឋមន្ត្រី មានប្រសាសន៍បញ្ជាក់បន្តថា  ប្រធានបទសំខាន់សំរាប់​សន្និបាតរបស់​ក្រសួង​សា​ធារ​ណ​ការ​ និង​ដឹកជញ្ជូន នៅឆ្នាំនេះគឺ ជំរុញអនុវត្ត យុទ្ធសាស្ត្រចតុកោណ ដំណាក់កាលទី៣ របស់រាជរដ្ឋាភិបាល​អាណត្តិ​ទី៥ លើវិស័យសាធារណការ និងដឹកជញ្ជូន  ដូច្នេះដើម្បីឆ្លើយតប ទៅនឹងប្រធានខាងលើនេះ ឯឧរដ្ឋមន្ត្រី ក៏បានផ្តល់​នូវអនុសាសន៍ និងបានលើកឡើង​នូវចំណុចសំខាន់ៗជាគន្លឹះ​មួយចំនួន​ដាក់​ជូនអង្គ​សន្និ​បាតធ្វើការពិភាក្សាផងដែរ។

នៅក្នុងពិធីនេះដែរ ឯកឧត្តម មាស ម៉ូនីកា អនុរដ្ឋលេខាធិការ ​ក្រសួង​សាធារ​ណការ និងដឹកជញ្ជូន បាន​អាន​ព្រះរាជក្រឹត្យ តែងតាំង ឯកឧត្តម ជា ថោយ  ឯកឧត្តម អៀង វ៉េងស៊ុន ឯកឧត្តម ម៉ៅ ឡាំង  ឯកឧត្តម ប៉ែន បូរាណ  ឯកឧត្តម ម៉ា ស៊ុនហួត ជាអនុ​រដ្ឋលេខាធិការ នៃក្រសួងសាធារណការ និងដឹកជញ្ជូន និងអានប្រកាស តែងតាំង​ ឯកឧត្តម ម៉ា ស៊ុនហួត ជានាយកខុទ្ធកាល័យ នៃក្រសួងសាធារណការ និងដឹកជញ្ជូន ជំនួស ឯកឧត្តម ស្លូត សំបូរ ទទួល​មរណភាព។

តមកឯកឧត្តមរដ្ឋមន្ត្រី ត្រាំ អ៊ីវតឹក ក៏បានអញ្ជើញប្រគល់ព្រះរាជក្រឹត្យ និងប្រកាស ដល់ ឯកឧត្តម ទាំងអស់ ដែលទើប​ទទួល​ភារកិច្ចថ្មីផងដែរ៕

នៅថ្ងៃទី១២ ខែមីនា ឆ្នាំ ២០១៥ នៅទីស្តីការក្រសួងសាធារណការ និងដឹកជញ្ជូន បានប្រារព្វបិទ  សន្និបាតបូកសរុបលទ្ធផលការងារឆ្នាំ២០១៤ និងទិសដៅការងារអនុវត្តន៍ឆ្នាំ២០១៥ របស់​ក្រសួង​សាធារណ ការ និងដឹកជញ្ជូន ក្រោមអធិបតីភាព ឯកឧត្តម គាត ឈន់ ឧបនាយករដ្ឋមន្ត្រីប្រចាំការ តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយក​រដ្ឋ​មន្ត្រី​នៃព្រះរាជាណាចក្រកម្ពុជា។តាមសន្ទរកថា ស្វាគមន៍របស់ ឯកឧត្តម ត្រាំ អ៊ីវតឹក រដ្ឋមន្ត្រីក្រសួងសាធារណការ​ និងដឹកជញ្ជូន បានមាន ប្រសាសន៍ថា អស់រយៈពេលមួយថ្ងៃកន្លះកន្លងមកនេះ អង្គសន្និបាតបានដំណើរការប្រកបដោយជោគជ័យ ដោយថ្នាក់ដឹកនាំ ក្រសួង អគ្គនាយកដ្ឋាន អង្គភាពមន្ទីរសាធារណការ និងដឹកជញ្ជូនខេត្តពាក់ព័ន្ធ បានធ្វើការ ចាប់អារម្មណ៍  និងបទអន្តរាគមន៍ បង្ហាញអំពីបទពិសោធន៍ និងអនុសាសន៍ល្អៗ ព្រមទាំងបានពិភាក្សា​ផ្លាស់ប្តូរយោបល់យ៉ាងផុសផុល  ប្រធានបទសំខាន់ជាគន្លឹះស្របតាមទិសស្លោក ជំរុញអនុវត្តយុទ្ធសាស្ត្រចតុ​កោណ​ដំណាក់​កាល​ទី៣ របស់រាជរដ្ឋាភិបាល​អាណត្តិ​ទី៥ លើវិស័យសាធារណការ និងដឹកជញ្ជូន ដែល​យក​ជា​មូលដ្ឋាន ដើម្បីឆ្លុះបញ្ចាំងអំពីលទ្ធផលការងារឆ្នាំ២០១៤ និងលើកទិសដៅអនុវត្តការងារឆ្នាំ​២០១៥របស់​ក្រសួង។ ឯកឧត្តមរដ្ឋមន្ត្រី មានប្រសាសន៍បញ្ជាក់ថា សន្និបាតនេះ បានវាយតំលៃខ្ពស់ លើលទ្ធផលការងារ ដែល​សម្រេច​​បានលើចំណុចអាទិភាពទាំង៧ រួមមាន ទី១ បន្តជំរុញកសាងបណ្តាញផ្លូវជាតិ និងផ្លូវខេត្ត ទី២ បង្កើនការយកចិត្តទុកដាក់លើការងារជួសជុល និងថែទាំ ហេដ្ឋារចនាសម្ព័ន្ធដឹកជញ្ជូន ទី៣ បន្តការផ្តោតយក ចិត្តទុកដាក់ខ្ពស់ លើសុវត្ថិភាពចរាចរណ៍តាមរយៈការកែលំអ និងការពង្រឹងការអនុវត្តច្បាប់ស្តីពីចរាចរណ៍ផ្លូវ គោក ទី៤ រៀបចំ និងអនុវត្តផែនការមេ នៃការអភិវឌ្ឍហេដ្ឋារចនាសម្ព័ន្ធដឹកជញ្ជូន ដើម្បីតភ្ជាប់ផ្ទៃក្នុងប្រទេស ផង និងជាមួយប្រទេសជិតខាង ទី៥ រៀបចំគោលនយោបាយ និងក្របខ័ណ្ឌគតិយុត្តចាំបាច់សម្រាប់ការគ្រប់ គ្រង និងអភិវឌ្ឍន៍ហេដ្ឋារចនាសម្ព័ន្ធ ទី៦ រៀបចំផែនការមេនៃការអភិវឌ្ឍហេដ្ឋារចនាសម្ព័ន្ធទីក្រុង និងទី៧ បន្តជំរុញការចូលរួមវិស័យឯកជន ក្នុងការអភិវឌ្ឍវិស័យហេដ្ឋារចនាសម្ព័ន្ធដឹកជញ្ជូន តាមរយៈការពង្រឹង និង ការកែលំអយន្តការភាពជាដៃគូរវាងវិស័យសាធារណៈ និងវិស័យឯកជន។ លទ្ធផលដែលសម្រេចបានខាង​លើ​នេះ គឺបានមកពីមគ្គទេសក៏ភាពដ៏ឆ្នើមរបស់សម្តេចអគ្គមហាសេនាបតីតេជោ ដែលជានិច្ចកាលតែងបាន​យកចិត្ត ទុកដាក់ ឧបត្ថមគាំទ្រទាំងស្មារតី និងសំភារៈ និងកៀរគរជំនួយពីបរទេស ដើម្បីជួយក្រសួង ឲ្យមាន​លទ្ធ​ភាព កាន់តែច្រើនជាងមុន ក្នុងការរួមចំណែកអភិវឌ្ឍន៍ប្រទេសជាតិ និងកាត់បន្ថយភាពក្រីក្រ​របស់​ប្រជា​ពលរដ្ឋ។

មានប្រសាសន៍បិទសន្និបាតបូកសរុបលទ្ធផលការងារឆ្នាំ២០១៤ និងទិសដៅការងារអនុវត្តឆ្នាំ ២០១៥ ឯកឧត្តម ឧបនាយករដ្ឋមន្ត្រី គាត ឈន់ បានពាំនាំការសួរសុខទុក្ខពីសំណាក់ សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជូនចំពោះថ្នាក់ដឹកនាំ អង្គភាព និងមន្ត្រីរាជការ និយោ​ជិត គ្រប់លំដាប់ថ្នាក់ នៃ​ក្រសួងសាធារណការ និងដឹកជញ្ជូន ទាំងនៅរាជធានីភ្នំពេញ ទាំងនៅតាម​ខេត្ត​ទូទាំង​ប្រទេស ដែលបាននិងកំពុងខិតខំអនុវត្តភារកិច្ចជំនាញយ៉ាងសកម្មក្នុងការសាងសង់ ថែទាំ ជួសជុល​ផ្លូវ ស្ពាន ផ្លូវគោក ផ្លូវដែក ផ្លូវទឹក កំពង់ផែ ការគ្រប់គ្រងការងារពាក់ព័ន្ធនឹងការដឹកជញ្ជូន និងសុវត្ថិភាព      ច​រាចរណ៍​ទទួលបានជោគជ័យគួរជាទីមោទនៈ។ ឯឧឧបនាយករដ្ឋមន្ត្រី មានប្រសាសន៍​បន្តថា បច្ចុប្បន្ន យើង​​​​​​មានផ្លូវស្ពាន ដែលចាក់កៅស៊ូប្រទាក់ក្រឡាខ្វាត់ខ្វែង តភ្ជាប់ទៅគ្រប់ទៅកន្លែង ជិតឆ្ងាយនៅទូទាំង​ប្រទេស និងភ្ជាប់ទៅនឹងប្រទេសជិតខាងក្នុងតំបន់ ដែលបានរួមចំណែកជួយរាជរដ្ឋាភិបាល ក្នុងការសម្រេច​ជោគជ័យលើកម្មវិធីនយោបាយសមាហរណកម្មផ្ទៃក្នុងប្រទេស និងជាមួយប្រទេសក្នុងតំបន់ ដើម្បីបង្កើន​ភាព​ងាយស្រួល ក្នុងការធ្វើចរាចរណ៍ដឹកជញ្ជូន និងការអភិវឌ្ឍលើគ្រប់វិស័យ ដែលនាំឲ្យសេដ្ឋកិច្ចជាតិ និង​សេដ្ឋកិច្ចគ្រួសារមានការរីកម្រើនពីមួយឆ្នាំទៅមួយឆ្នាំ។ ឯឧ ឧបនាយករដ្ឋមន្ត្រី គាត ឈន់ បានមានប្រសា​ស​ន៍​បញ្ជាក់​ថា ជាការពិត ក្រោមការដឹកនាំដ៏វៃឈ្លាស ពោរពេញទៅដោយបញ្ញាញាណ និងគតិបណ្ឌិតដ៏ខ្ពង់​ខ្ពស់​របស់ម្តេចអគ្គមហាសេនាបតីតេជោ ហ៊ុន សែន នៃព្រះរាជាណាចក្រកម្ពុជា ទោះបីទទួលរងនូវ​បញ្ហា​ប្រឈម​នានា ជាពិសេសគ្រោះធម្មជាតិ និងឥទ្ធិពលអាក្រក់ពីវិបត្តិកលយុគហិរញ្ញវត្ថុអន្តរជាតិ ព្រមទាំង​ការ​ធ្លាក់​ចុះនៃសេដ្ឋកិច្ចសាកលលោកក្តី ក៏កម្ពុជាសម្រេចបានកំណើនសេដ្ឋកិច្ចខ្ពស់ ប្រកបដោយចីរភាព និង​បរិយាប័ន ជាមធ្យមជាង ៨% ក្នុងមួយឆ្នាំ ក្នុងរយៈពេល១៥ឆ្នាំកន្លងមក។ជាក់ស្តែង នៅឆ្នាំ២០១៣ កម្ពុជា​សម្រេច​បានកំណើនសេដ្ឋកិច្ច៧,៤% ហើយតាមការគណនាបឋមរបស់វិទ្យាស្ថានជាតិ​ស្ថិតិនៃក្រសួង​ផែន​ការ  កំណើននេះ នឹងសម្រេចបានក្នុងរង្វង់៧% សម្រាប់ឆ្នាំ២០១៤។ ចំពោះឆ្នាំ២០១៥ និងរយៈពេល​មធ្យម​ខាង​មុខ កំណើនសេដ្ឋកិច្ច ត្រូវបានប៉ាន់ប្រមាណថា នឹងស្ថិតជុំវិញប្រមាណ៧%ទៀត។ បរិការណ៍ អំណោយ ផលនេះ ជាបច្ច័យល្អសម្រាប់ការអភិវឌ្ឍលើគ្រប់វិស័យ ដែលនឹងជំរុញឲ្យព្រះរាជាណាចក្រកម្ពុជា សម្រេច បានមហិច្ឆិតារបស់ខ្លួន ក្នុងការប្រែក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងប្រទេស មានចំណុលខ្ពស់នៅឆ្នាំ២០៥០ ដោយចៀសវាងការធ្លាក់ចូលក្នុងអង្គប់នៃប្រទេសដែលមានចំណូលមធ្យម តាមរយៈការដាក់ចេញ នូវគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥។ ក្នុង ឱកាសនេះ ឯកឧត្តម ឧបនាយករដ្ឋមន្ត្រី គាត ឈន់ តំណាងដ៏ខ្ពង់ខ្ពស់សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា  បានផ្តល់នូវអនុសាសន៍ និងបាន​លើកឡើង​នូវចំណុច សំខាន់​ៗជាគន្លឹះ​មួយចំនួន ដើម្បីជាទុនសម្រាប់ជំរុញប្រសិទ្ធភាព នៃការអនុវត្ត​កម្ម​វិធី​ការងារវិស័យសាធារ ណការ និងដឹកជញ្ជូន ឲ្យទទួលបានជោគជ័យថែមទៀត។

ក្នុងឱកាសនេះដែរ ឯកឧត្តម ឧបនាយករដ្ឋមន្ត្រី គាត ឈន់ បានអញ្ជើញបំពាក់គ្រឿងឥស្សរិយយស ដល់​ថ្នាក់ដឹកនាំ មន្ត្រីរាជការ នៃក្រសួងសាធារណការ និងដឹកជញ្ជូន ដែលមានស្នាដៃឆ្នើមក្នុងការអនុវត្តការងារ​នា​ពេលកន្លងមក ក្នុងនោះរួមមាន មេដាយព្រះរាជាណាចក្រកម្ពុជា ថ្នាក់មហាសិរីវឌ្ឍន៍ ចំនួន២រូប  មេដាយ​ព្រះមហាក្សត្រីយានីស៊ីសុវត្ថិមុនីវង្ស កុសុមៈ ថ្នាក់មហាសិរីវឌ្ឍន៍ចំនួន១រូប មេដាយមុនីសារាភ័ណ្ឌ ថ្នាក់​មហា​​សិរីវឌ្ឍន៍ចំនួន១រូប មេដាយព្រះរាជាណាចក្រកម្ពុជា ថ្នាក់មហាសេនាចំនួន៨ រូប មេដាយសុវត្ថារា ថ្នាក់មហា​សេនា ចំនួន២រូប មេដាយមុនីសារភ័ណ្ឌ ថ្នាក់មហាសេនា ចំនួន១រូប មេដាយ​ព្រះរា​ជា​ណា​ចក្រកម្ពុជា ថ្នាក់​ធិបឌិន្ទចំនួន១រូប មេដាយសុវត្ថារា ថ្នាក់ធិបឌិន្ទចំនួន៤រូប មេដាយព្រះ​រាជាណាចក្រកម្ពុជា ថ្នាក់សេនា ចំនួន១រូប មេដាយសុវត្ថារា ថ្នាក់សេនា ចំនួន៥រូប មេដាយព្រះរាជាណាចក្រកម្ពុជា ថ្នាក់អស្សឫទ្ធិ ចំនួន១រូប មេដាយ​សុវត្ថារា ថ្នាក់អស្សឫទ្ធិ ចំនួន៦រូប និងមេដាយមាសការងារ ចំនួន២រូប សរុបទាំងអស់៣៥រូប៕

ព្រឹកថ្ងៃទី១៨ ខែមីនា ឆ្នាំ២០១៥ នៅក្រុងប៉ោយប៉ែត មានប្រារព្ធពិធីបើកការដ្ឋានគម្រោងសាងសង់ផ្លូវជាតិលេខ ៥៨ ពីក្រុងប៉ោយប៉ែត(ខេត្តបន្ទាយមានជ័យ) ទៅក្រុងសំរោង(ខេត្តឧត្តរមានជ័យ) ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជណាចក្រកម្ពុជា និងលោកជំទាវកិត្តិព្រឹទ្ធបណ្ឌិត ។

នៅព្រឹកថ្ងៃទី២៣ ខែមីនា ឆ្នាំ២០១៥ នៅទីស្តីការក្រសួងសាធារណការ និងដឹកជញ្ជូន ឯកឧ​ត្តមរដ្ឋមន្ត្រី ត្រាំ អ៊ីវតឹក បានអនុញ្ញាតឱ្យគណៈប្រតិភូ UNOPS ចូលជួបសំដែងការគួរសម  និងពិភាក្សាការងារ ។

នៅថ្ងៃទី៣១ ខែមីនា ឆ្នាំ២០១៥ ក្រុមប្រតិភូជំនាញបច្ចេកទេសស្ពាន ថ្នល់ នៃក្រសួងសាធារណការ និងដឹកជញ្ជូន ដឹកនាំដោយ ឯកឧត្តមរដ្ឋមន្ត្រី ត្រាំ អ៊ីវតឹក បានអញ្ជើញចុះ​ពិនិត្យ​ការដ្ឋានជួសជុល​ស្ថាបនា​កំណាត់ផ្លូវជាតិលេខ៧ ត្រង់ចំណុច PK 372 ដែលអនុវត្តន៏ការងារដោយមន្ទីរសាធារណការ និងដឹកជញ្ជូនខេត្តក្រចេះ និងកំណាត់ផ្លូវពីចំណុច PK 390 ដែលអនុវត្តន៏ការងារដោយ ក្រុមហ៊ុនសៀងហៃ ។ឯកឧត្តមរដ្ឋមន្ត្រី ត្រាំ អ៊ីវតឹក បានជំរុញឲ្យក្រុមហ៊ុនទទួលបន្ទុកសាងសង់ធ្វើយ៉ាងណាស្ថាបនា ឲ្យបាន​ទាន់​ពេល​វេលា ជាពិសេសលើការស្ថាបនាគឺត្រូវគោរពទៅតាមលក្ខណៈ​បច្ចេក​​​​ទេសស្តង់ដារអន្តរជាតិ ដើម្បីឲ្យមានគុណល្អ ប្រើប្រាស់បានយូរអង្វែង។

ឯកឧត្តមរដ្ឋមន្ត្រី បានណែនាំ​ឲ្យ​ក្រុមហ៊ុនទទួលបន្ទុកសាងសង់ ត្រូវធ្វើការកិនបង្ហាប់ និងចាក់ល្បាយថ្ម ឲ្យបានណែនហាប់ល្អ នៅត្រង់កន្លែង​ណាដែលមានទឹក ដែលអាចបង្កឲ្យមានជារូងនាគ បណ្តាលឲ្យបាក់ស្រុត ខូចខាតផ្លូវ។ ឯកឧត្តមរដ្ឋមន្ត្រី ក៏បានឲ្យ​ក្រុមហ៊ុន ដាក់ស្លាក់សញ្ញានៅគ្រប់ការដ្ឋានសាងសង់ គ្រប់ទីកន្លែងទាំងអស់ ដើម្បីបញ្ជៀសនូវ​ការកក​ស្ទះ​ចរាចរណ៍ និងគ្រោះថ្នាក់ចរាចរណ៍ដល់​ប្រជាពលរដ្ឋដែលធ្វើដំណើរទៅមក។​ ដោយឡែក​បញ្ហា​ធ្ងន់ធ្ងរជាងគេនោះ ការហុយធូលីដី ទៅលើលំនៅដ្ឋានរបស់​ប្រជាពល​រដ្ឋ​នៅតាមដងផ្លូវ ក៏ដូច​មិនអាចមើល​ផ្លូវ​​ឃើញនៅពេលបើកបរ ដូច្នេះសូមឲ្យក្រុមហ៊ុនធ្វើការស្រោចទឹកជាប្រចាំ ៕

នៅថ្ងៃទី១ ខែមេសា ឆ្នាំ២០១៥ មានប្រារព្ធពិធីសម្ពោធបើកអោយប្រើប្រាស់ជាផ្លូវការផ្លូវជាតិលេខ ៩ ប្រវែង ១៤៣,៣៣ គម ពីខេត្តស្ទឹងត្រែង ដល់ខេត្តព្រះវិហារខេត្តព្រះវិហារ និងស្ពានមិត្តភាពកម្ពុជា​ ចិនស្ទឹងត្រែង ប្រវែង ១៧៣១ម ដែលចំណាយថវិកា ប្រមាណ ១១៦,៥ លានដុល្លា  ក្រោម អធិបតីភាពដ៍ខ្ពង់ខ្ពស់របស់ សម្តេចគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។

នៅថ្ងៃទី៦ ខែមេសា ឆ្នាំ២០១៥ មានប្រារព្ធពិធីសម្ពោធបើកអោយប្រើប្រាស់ជាផ្លូវការស្ពានត្សឹបាសា(Spien Tsubasa) ប្រវែង ២,២១៥ ម ដែលចំណាយថវិកា ប្រមាណ ១២៧ លានដុល្លា ក្រោមអធិបតីភាពដ៍ខ្ពង់ខ្ពស់របស់ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា និង​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ព្រមទាំង​តំណាង​ជាន់ខ្ពស់ របស់​រដ្ឋាភិបាល​ជប៉ុន ។

នៅថ្ងៃទី២០ ខែមេសា ឆ្នាំ២០១៥ នៅទីស្តីការក្រសួង បានប្រារព្វ ពិធីចុះហត្ថលេខា រវាងក្រសួងសាធារណការ និងដឹកជញ្ជូន ជាមួយក្រុមហ៊ុន KATAHIRA ENGI​NEER INTERNATIONAL ជាក្រុមហ៊ុន​ទទួលបាន​សិទ្ធិត្រួត​ពិនិត្យ​បច្ចេក​ទេស និងគណនាលើគំរោង​ធ្វើ​ឲ្យ​ប្រសើរឡើងវិញផ្លូវជាតិលេខ៥ ពីព្រែកក្តាម ខេត្តកណ្តាល កាត់តាមខេត្តកំពង់ឆ្នាំង រហូតដល់ ធ្លាម្អម ខេត្តពោធិសាត់ ដំណាក់កាលទី២ ភាគខាងត្បូង ដែលហត្ថលេខីនេះធ្វើឡើងដោយ ឯកឧត្តម ត្រាំ អ៊ីវតឹក រដ្ឋ​មន្ត្រី​ក្រសួង សាធារណការ និង​ដឹកជញ្ជូន និងលោក អាន់ថូនី ហ្គូលី អ្នកគ្រប់គ្រងគម្រោង តំណាងក្រុមហ៊ុន KATAHIRA ENGINEER INTERNATIONAL ។គម្រោងធ្វើឲ្យប្រសើរឡើងវិញកំណាត់ផ្លូវជាតិលេខ៥ ពីព្រែកក្តាមទៅដល់ក្រុងប៉ោយប៉ែតនេះ ជាផ្លូវ​អា​ស៊ាន​ហាយវ៉េ ដែលត្រូវពង្រីកជា៤គន្លង  ហើយគម្រោងនេះ ត្រូវបានបែងចែកជា៣ដំណាក់កាល ក្នុងនោះ​ដំណាក់កាលទី១ ពីបាត់ដំបង ដល់សេរីសោភណ្ឌ ភាគខាងជើង ដែលបច្ចុប្បន្ននេះ ការសិក្សា និង​ការគណនាលំអិត បានបញ្ចប់រួចរាល់ ហើយកំពុងតែធ្វើការអនុវត្តនីតិវិធីក្នុងការជ្រើសរើសក្រុមហ៊ុនសាង​សង់។​ដំណាក់កាលទី១នេះ និងចាប់ផ្តើមសាងសង់នៅចុងឆ្នាំ២០១៥នេះ និង អាចបញ្ចប់នៅចុងឆ្នាំ២០១៨ មានប្រវែង៨៤គីឡូម៉ែត្រ ៧០០ម៉ែត្រ។ ដោយឡែកដំណាក់កាលទី២ ដែលបានធ្វើការចុះហ​ត្ថលេខា​នាពេល​នេះ ពីព្រែកក្តាម ខេត្ត កណ្តាល កាត់តាមខេត្តកំពង់ឆ្នាំង រហូតដល់ធ្លាម្អម ខេត្តពោធិសាត់ មាន​ប្រវែ​ង​១៣៥គីឡូម៉ែត្រ ៤០០ម៉ែត្រ រួមជាមួយផ្លូវវាងទីប្រជុំជនឧត្តុង្គ ប្រវែង ៤គីឡូម៉ែត្រ ៩០០ម៉ែត្រ និងផ្លូវវាងទីរួម ខេត្តកំពង់ឆ្នាំ ប្រវែង១១គីឡូម៉ែត្រ ៨០០ម៉ែត្រ  ដំណាក់កាលទី២នេះ និងចាប់ផ្តើមសាងសង់នៅឆ្នាំ២០១៦ និងបញ្ចប់ការសាងសង់នៅឆ្នាំ ២០១៩។រីឯដំណាក់កាលទី៣ ពីធ្លាម្អម ខេត្តពោធិសាត់ ដល់ខេត្តបាត់ដំបង រួមនិងកំណាត់ផ្លូវ ពីសេរីសោភ័ណ ទៅក្រុងប៉ោយប៉ែត កំពុងតែអនុវត្តន៍នីតិវិធីក្នុងការ ជ្រើសរើសក្រុមហ៊ុន ត្រួត​ពិនិត្យ​លក្ខណៈបច្ចេកទេស។គម្រោងធ្វើឲ្យប្រសើរឡើងវិញកំណាត់ផ្លូវជាតិលេខ៥នេះ គឺធ្វើឡើង​ដោយ​​​​ប្រើ​ប្រាស់គម្រោង​ថវិកាកម្ចី​ឥណ​ទាន​​សម្ប​ទានពីរដ្ឋាភិ​បាលជប៉ុន ដៃគូអភិវឌ្ឍជាមួយកម្ពុជា ។

ក្នុងឱកាសនេះ ឯកឧត្តមរដ្ឋមន្ត្រី ត្រាំ អ៊ីវតឹក បានមានប្រសាសន៍ថា គម្រោងធ្វើឲ្យប្រសើរឡើងវិញផ្លូវជាតិ លេខ៥ គឺជាជំហានដ៏សំខាន់មួយទៀត សម្រាប់ការធ្វើឲ្យ ប្រសើរឡើងវិញនូវផ្លូវជាតិសំខាន់ៗ។ឯឧរដ្ឋមន្ត្រី មានប្រសាសន៍បញ្ជាក់ថា ផ្លូវជាតិលេខ៥នេះ មានសារៈសំខាន់ណាស់ សម្រាប់ការដឹកជញ្ជូនទាំងនៅក្នុង ស្រុក ក៏ដូចជាការដឹកជញ្ជូនក្នុងបណ្តាប្រទេសជាសមាជិកអាស៊ាន និងមហាអនុតំបន់មេគង្គ និងបានចាត់​ទុកថា ជាផ្លូវហាយវ៉េ ទីមួយប្រចាំតំបន់អាស៊ីផងដែរ។ជាមួយ គ្នានេះ ឯឧរដ្ឋមន្ត្រី ត្រាំ អ៊ីវតឹក ក៏បានមាន​ប្រសាសន៍​លើកឡើង ពីការអភិវឌ្ឍន៍រីកចំរើនលើគ្រប់វិស័យរបស់ព្រះរាជាណាចក្រកម្ពុជា  ក្រោមការដឹកនាំ​ប្រកប ដោយកិត្តិ​បណ្ឌិតរបស់​សម្តេច​អគ្គ​មហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជា​ណា​ចក្រ​​​កម្ពុជា ជាពិសេស​លើ​ការងារសាងសង់ជួសជុល ថែទាំ ផ្លូវ ស្ពាន ដែល បច្ចុប្បន្ននេះ យើងមានផ្លូវថ្នល់ ខ្វាត់ខ្វែងប្រទាក់ក្រឡាគ្នា ចាប់ពីទីក្រុង ដល់ទីប្រជុំជន រហូតដល់តំបន់ជនបទ។

មានប្រសាសន៍ស្វាគមន៍ លោក អាន់ថូនី ហ្គូលី បានសន្យាថា នឹងខិតខំប្រឹងប្រែងធ្វើយ៉ាងឲ្យគម្រោង ធ្វើឲ្យប្រសើរឡើងវិញផ្លូវជាតិលេខ៥នេះ ប្រព្រឹត្តទៅដោយរលូន និងមានតម្លាភាពបំផុត ក្នុងការអនុវត្ត នីតិ​វិ​ធី​ក្នុងការជ្រើសរើសក្រុមហ៊ុនសាងសង់ ដើម្បីឲ្យការស្ថាបនា ទទួលបាននូវគុណភាព សោភណ្ឌភាព និងស្របទៅតាម លក្ខណៈបច្ចេកទេសស្តង់ដារអន្តរជាតិ៕

នៅថ្ងៃទី០៧ ខែឧសភា ឆ្នាំ២០១៥ នៅសណ្ឋាគារឡឺរ៉ូយ៉ាល់  ឯកឧត្តម ត្រាំ អ៊ីវតឹក រដ្ឋមន្ត្រីក្រសួងសាធារណការ និងដឹកជញ្ជូន ចូលរួមជាអធិបតី ក្នុងសិក្ខាសាលាលើកទី២ ស្តីពីការធ្វើឱ្យ ប្រសើរឡើងវិញនូវការដឹកជញ្ជូនតាមផ្លូវទឹក និង Logistics រវាងកម្ពុជា និងវៀតណាម ។

នៅថ្ងៃទី៨ ខែឧសភា ឆ្នាំ២០១៥ ឯកឧត្តម ត្រាំ អ៊ីវតឹក រដ្ឋមន្ត្រី​​ក្រសួង​សាធារណការ និងដឹកជញ្ជូនធ្វើជាអធិ​ប​តី ក្នុងពិធីសម្ពោធដាក់ដំណើរការរោងចក្រ PHNOM PENH PRECAST PLANTS ផលិត​លូ​បេតុង ស្ថិតនៅ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ ហើយ ពិធីនេះក៏មានការអញ្ជើញចូលរួមពី ឯកឧត្តម លោកជំទាវ លោកឧញ៉ា អស់លោក លោកស្រី ជាវិនិយោគិនជាតិ និងអន្តរជាតិ ពាណិជ្ជករ អាជីវករ និងប្រជាពលរដ្ឋ។តាមរបាយការណ៍ស្វាគមន៍របស់ លោកឧកញ៉ា ជឹង ធានសេង ប្រធានក្រុមហ៊ុន PHNOM PENH PRECAST PLANTS បានឲ្យដឹងថា រោងចក្រនេះ ចាប់ផ្តើមសាង សង់នៅពាក់កណ្តាលឆ្នាំ២០១៣ កសាង​នៅលើផ្ទៃដីជិត៣ហិកតា ប្របមាត់ទន្ទេតាមបណ្តោយដៃទន្លេសាប ដែលស្ថិតនៅ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ ដែលមានចម្ងាយប្រហែល១០គីឡូម៉ែត្រ ភាគខាងជើងរាជធានី​ភ្នំពេញ​។​រោងចក្រនេះ ធ្វើឡើងដោយបាននាំយកគ្រឿងចក្រ គ្រឿងផលិត បរិក្ខាផ្សេងៗ និងបច្ចេកទេសពី​ប្រទេស​អាឡឺម៉ង់ ដោយប្រើប្រាស់អ្នកបច្ចេកទេស និងកំលាំងពលកម្មខ្មែរយើងសុទ្ធសាធ មានចំនួនប្រហែល​៣០០នាក់។លោកឧកញ៉ា មាន ប្រសាសន៍បញ្ជាក់ថា លើចង្វាក់ផលិតកម្ម រោចក្រនេះ អាចមានលទ្ធភាព​ផលិត លូបេតុង មុខកាត់ចាប់ពី៦០០mm រហូតដល់១៥០០mm ដែលលូមួយកង់ៗមានប្រវែង ២៥០០mm។ គិតជាមធ្យមក្នុងមួយថ្ងៃ រយៈពេល៨ម៉ោង ក្រុមហ៊ុនអាចផលិតបានចំនួនពី ៤០កង់ ដល់៥០កង់ ដែលមាន គុណភាពខ្ពស់ធានាបានរយៈពេលយូររហូត ក្នុងជម្រៅដី។លោកឧកញ៉ា ជឹង ធានសេង មានប្រសាសន៍​បញ្ជាក់បន្ថែមថា ក្នុងរយៈពេល៥ខែកន្លងមកនេះ ក្រុមហ៊ុនរបស់លោក បានផ្គត់ផ្គង់លូទៅឲ្យក្រុមសំណង់ធំៗ មួយចំនួនដូចជា Hong Kong Land Tower និងTechno Bridge។លើសពីនេះទៀត សព្វថ្ងៃនេះ ក្រុមហ៊ុន បាននឹងកំពុងផ្គត់ផ្គង់ និងតំឡើងលូបេតុងក្រោមដី ដែលមាន ប្រវែងប្រហែល ៤គីឡូម៉ែត្រ របស់​ក្រុម​ហ៊ុន​Shukaku Inc ក្នុងការអភិវឌ្ឍន៍តំបន់បឹងកក់ផងដែរ។

ឯកឧត្តមរដ្ឋមន្រ្តី ត្រាំ អុីវតឹក មានប្រសាសន៍ថា បច្ចុប្បន្ន ក្រោមការដឹកនាំប្រកបដោយកិត្តិ បណ្ឌិតរបស់​សម្តេច​អគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឲ្យព្រះ​រាជា​ណា​​​ចក្រ​កម្ពុជា ទទួលបាននូវសុខសន្តិភាពពេញលេញ និងមានការអភិវឌ្ឍលើគ្រប់វិស័យ ពិសេសវិស័យ​ហេដ្ឋារចនា សម្ព័ន្ធរូបវ័ន្ត មានវិស័យសាធារណការ និងដឹកជញ្ជូន នគររូបនីយកម្ម និងសំណង់។​ រាជរដ្ឋា​ភិបា​ល​កម្ពុជា បាននិងកំពុងបន្តជំរុញគាំទ្រ និងលើទឹកចិត្ត ឲ្យមានការ វិនិយោគបន្ថែមទៀត លើគ្រប់វិស័យ អំពី​សំណាក់វិនិយោគិនក្នុងប្រទេស ដើម្បីធានាបាននូវនិរន្តរភាព និងភាពជាម្ចាស់ក្នុងការផលិតបំរើឲ្យទីផ្សារ និង​​តំរូវការ ក្នុងស្រុក ដូចជាការផលិតលូ បេតុង ដើម្បីបំរើឲ្យការងារសំណង់ ដែលកំពុងមានសំទុះកើន​ឡើង រីកដុះដាល និងអភិវឌ្ឍឥតឈប់ឈរ សំរាប់បំរើដល់សេចក្តីត្រូវការចាំបាច់នា ពេលបច្ចុប្បន្ន ក្នុងការជួសជុល ស្តារ និងសាងសង់នូវបណ្តាញលូបង្ហូរទឹកសំណល់ និងប្រព័ន្ធការពារ​ទឹកជំនន់ជាដើម ដើម្បីការពារ និង​បញ្ជៀស​នូវការកកស្ទះ និង ជន់លិចពេលរដូវភ្លៀងធ្លាក់ នៅតាមទីប្រជុំជន ទីក្រុង និងរាជធានី។ ​ជាមួយគ្នា​នេះ​ រាជរដ្ឋាភិ​បា​ល​ បានកំណត់ថា វិស័យឯកជន គឺជា​ក្បាល​ម៉ាស៊ីន​នៃកំណើនសេដ្ឋកិច្ច។ ការអភិវឌ្ឍន៍​វិស័យ​ឯកជន គឺជាកត្តាគន្លឹះ ក្នុងការជំរុញកំណើន និងអភិវឌ្ឍ​សង្គម សេដ្ឋកិច្ច ពិសេសជួយសំរេច ឲ្យ​បាន​នូវ​គោលដៅរបស់រាជរដ្ឋាភិបាល ក្នុងការធ្វើ ពិពិធកម្ម​មូល​ដ្ឋាន​ផលិតកម្ម ការបញ្ចូល​បច្ចេកវិទ្យាទំនើប និង​គំនិត​ឆ្នៃប្រឌិត ព្រមទាំងការបង្កើតការងារ ដើម្បីជួយ​ប្រជា​ពល​រដ្ឋ ក្នុង​ការ​កាត់បន្ថយភាពក្រីក្រឲ្យ​បាន​ឆាប់​រហ័ស និងលើកកំពស់ជីវភាព រស់នៅប្រចាំ​ថ្ងៃបានល្អ​ប្រសើរ។ ឯកឧត្តមរដ្ឋមន្ត្រី មាន​​ប្រសាសន៍បញ្ជាក់ថា សព្វ​ថ្ងៃ​នេះ បន្ទាប់ពីច្បាប់ផ្លូវថ្នល់ ដែលរដ្ឋសភាជាតិបាន អនុម័ត និងប្រកាស​ដាក់​ឲ្យ​ប្រើប្រាស់ជាផ្លូវការ កាលពីដើម​ឆ្នាំ២០១៤កន្លងទៅ ក្រសួងសាធារណការ និងដឹកជញ្ជូន នៅបាននិង​កំពុង​​យក​ចិត្តទុក​ដាក់ក្នុង​ការរៀប​ចំ​ច្បាប់ លិខិតបទដ្ឋានគតិយុត្ត និងស្តង់ដារបច្ចេកទេសបន្ថែមទៀត សំរាប់​បំរើ​ឲ្យការសាង​សង់ហេដ្ឋា​រចនា​សម្ព័ន្ធ​សំណង់ផ្លូវស្ពាន និងប្រព័ន្ធលូបង្ហូរទឹក។ ឯកឧត្តម ត្រាំ អ៊ីវតឹក បាន​កោត​សរ​សើរ និងវាយតម្លៃខ្ពស់ ចំពោះ​ក្រុមហ៊ុន PHNOM PENH PRECAST PLANTS ដែលបានឈានមុខគេ នាំ​មក​នូវបច្ចេកវិទ្យាទំនើប​ពី​បរទេស ដើម្បីផលិត ផ្គត់ផ្គង់ និងតម្លើង​បំពង់លូប្រកបដោយគុណភាព និងស្តង់​ដារ​​ខ្ពស់ ស្របតាមបទដ្ឋាន​អន្តរជាតិ។​

ឯកឧត្តមរដ្ឋមន្ត្រី ត្រាំ អុីវតឹក ក៏បានអញ្ជើញចែកអំណោយអនុស្សាវរីយ៍ដល់ប្រជាពលរដ្ឋដែលបានចូលរួម និងបានអញ្ជើញកាត់ខ្សែបូរសម្ពោធដាក់ឲ្យដំណើរការរោងចក្រ PHNOM PENH PRECAST PLANTS ចាប់​ពីពេលនេះតទៅ។ ក្នុងឱកាសនេះ ឯឧរដ្ឋមន្ត្រី ត្រាំ អ៊ីវតឹក ក៏បានអញ្ជើញ ពិនិត្យមើលពីដំណើរការនៃខ្សែ​ចង្វាក់​ផលិតកម្ម របស់ក្រុមហ៊ុន PHNOM PENH PRECAST PLANTS។​សូមបញ្ជាក់ថា ឈរលើស្មារតីគិតគូ ពីការចូលរួមអភិវឌ្ឍន៍ប្រទេសជាតិ និងឆន្ទះចូលរួមចំណែក ក្នុងការស្តាវ និងអភិវឌ្ឍហេដ្ឋារចនាសម្ព័ន្ធ ក្នុង​គោល​បំណងលើកកំពស់វិស័យសាធារណការ និងដឹកជញ្ជូន ឲ្យរឹងតែ​ប្រសើរ​ឡើង ស្របនឹងយុទ្ធ​សាស្ត្រ​ចតុ​កោណដំណាក់កាលទី៣ របស់រាជរដ្ឋាភិបាលកម្ពុជា រោងចក្រធុន​មធ្យម​​នេះ​បានបង្កើតឡើង ដោយមានការ​ដាក់ទុនក្នុងស្រុករួមគ្នា​ ដើម្បីផលិតលូធ្វើពីបេតុង សំរាប់បំរើដល់​សេចក្តី​ត្រូវការក្នុងការស្តារ​នូវហេដ្ឋារចនា​សម្ព័ន្ធ មានបណ្តាញលូ ដែលបច្ចុប្បន្នអាជ្ញាធរមូលដ្ឋានធ្វើការ​ជួស​ជុលលូ បាក់បែក ឫ ធ្វើបណ្តាញថ្មីបន្ថែម បញ្ជៀសនូវការកកស្ទះ លិចលង់ពេលមានទឹក្លៀងធ្លាក់កំរិតខ្ពស់​នៅ​តាម​ទីប្រជុំជន ទីក្រុង និងរាជធានី​ជា​ដើម។​លើពីនេះទៅទៀត មិនត្រឹមតែបំរើដល់សេចក្តីត្រូវការ ក្នុង​ការ​ប្រើប្រាស់ក្នុងប្រទេសប៉ុណ្ណោះទេ ថែម​ទាំងជួយផ្តល់ការងារដល់ប្រជាពលរដ្ឋយើង​ កាត់បន្ថយកា​រចំណាក​ស្រុក ទៅធ្វើការនៅក្រៅប្រទេស លើក​កំពស់​ជីវភាពរស់នៅឲ្យចាកផុតពីភាពក្រីក្របានមួយកម្រិតផងដែរ៕