នៅថ្ងៃទី១៥ ខែមិថុនា ឆ្នាំ២០១៦ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ដែលអមដំណើរដោយមន្ត្រីសាធារណការ និងដឹកជញ្ជូន និងមន្ត្រីស្ថានប័នពាក់ព័ន្ធ បានអញ្ជើញជាអធិបតី ក្នុងពិធីសម្ពោធដាក់ឲ្យប្រើប្រាស់ មណ្ឌលប្តូរ និងពន្យារបណ្ណបើកបរ សម្រាប់យានយន្ត នៅផ្សារទំនើប AEON Mall ដែលនេះជាការឆ្លើយតប ទៅនឹងផែនការយុទ្ធសាស្ត្រចតុកោណ ដំណាក់កាលទីបីរបស់រាជរដ្ឋាភិបាល។
មណ្ឌលថ្មីនេះបង្កភាពងាយស្រួល ដែលចូលរួមចំណែលលុបបំបាត់ ការលំបាករបស់ប្រជាពលរដ្ឋ នៅក្នុងការ ប្តូរ ឬពន្យារបណ្ណបើកបររបស់ពួកគាត់ ហើយចំណាយពេលជាមធ្យមត្រឹមតែ ៣០នាទីប៉ុណ្ណោះ។
មណ្ឌលនេះគឺជាផ្នែកមួយ នៃផែនការសកម្មភាពរយៈពេល១០០ថ្ងៃរបស់ក្រសួងសាធារណការ និងដឹកជញ្ជូន ដែលជាគំនិតផ្តូចផ្តើមមួយ ធ្វើឲ្យប្រសើរឡើងនូវរាល់សេវាពាក់ព័ន្ធទៅនឹងវិស័យដឹកជញ្ជូន ជាពិសេសការប្តូរ និងពន្យារបណ្ណបើកបរ ដូចជា បង្កើតឲ្យកាន់តែមានតម្លាភាព ក្នុងការទទួលបានសេវារបស់ប្រជាពលរដ្ឋ ចំណេញពេលវេលា កាត់បន្ថយចំណាយជាដើម។ កាន់តែងាយស្រួលជាងនេះទៅទៀត មណ្ឌលយើងខ្ញុំ បើកដំណើរការផ្តល់សេវាជូនប្រជាពលរដ្ឋ រៀងរាល់ថ្ងៃ ចាប់ពីម៉ោង ០៩ព្រឹក ដល់ម៉ោង ១០យប់។
ជាទីកត់សម្គាល់ នៅក្នុងត្រីមាសទីមួយ ឆ្នាំ២០១៦ យើងខ្ញុំបានផ្តល់បណ្ណបើកបរ ជូនប្រជាពលរដ្ឋបាន ៨៨.៦៧៥ បណ្ណទូទាំងប្រទេស ហើយសម្រាប់ថ្ងៃទី១៥ ខែមិថុនា ឆ្នាំ២០១៦នេះ មណ្ឌលនៅផ្សារទំនើប AEON Mall ក៏បានផ្តល់បណ្ណបើកបរជូនប្រជាពលរដ្ឋបានចំនួន បានជាង ២០០បណ្ណផងដែរ។
