នៅព្រឹកថ្ងៃទី៣០ ខែឧសភា ឆ្នាំ២០១៧ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានក្រុមការងារថ្នាក់ជាតិ ចុះជួយស្រុកកោះធំ បានដឹកនាំគណៈប្រតិភូមួយក្រុម អញ្ជើញជាអធិបតី ក្នុងពិធីដាក់ឱ្យប្រើប្រាស់ ផ្លូវចំនួនបួនខ្សែរួមមាន៖ ផ្លូវបេតុងចំនួនបីខ្សែ មានប្រវែងសរុបចំនួន ៤៦៨ម៉ែត្រ និងផ្លូវដីក្រាលថ្មចំនួនមួយខ្សែប្រវែងសរុបចំនួន ១.០៥០ម៉ែត្រ ស្ថិតក្នុងឃុំព្រែជ្រោយតាកែវ ស្រុកកោះធំ ខេត្តកណ្តាល។
ឯកឧត្តមបានជម្រាបជូន ប្រជាពលរដ្ឋទាំងអស់ ថារាជរដ្ឋាភិបាលតាមរយៈ ឯកឧត្តមផ្ទាល់ក្នុងនាម ជាប្រធានក្រុមការងារថ្នាក់ជាតិ ចុះជួយស្រុកកោះធំ កំពុងខិតខំរៀបចំផ្លូវក្នុងភូមិ ក្នុងស្រុកកោះធំ ស្ទើតែទាំងអស់ ឲ្យក្លាយទៅជាផ្លូវបេតុង ដើម្បីសម្រួលដល់ការធ្វើដំណើរ និងការដឹកជញ្ជូនកសិផល ទៅលក់នៅទីផ្សារមានភាពងាយស្រួល។
ឯកឧត្តមទេសរដ្ឋមន្ត្រី បានបន្ថែមទៀតថា ឯកឧត្តម កំពុងខិតខំប្រឹងប្រែងក្នុង ការចូលរួមអភិវឌ្ឍ និងប្រែក្លាយស្រុកកោះធំ ឲ្យទៅជាតំបន់សេដ្ឋកិច្ចពិសេស ដោយបានអញ្ជើញអ្នកវិនិយោគជប៉ុន ឲ្យមកធ្វើការសិក្សាលទ្ធផលនៃតំបន់នេះ។
ឆ្លៀតក្នុងឱកាសនោះដែរ ឯកឧត្តមទេសរដ្ឋមន្ត្រី បានលើកឡើងអំពីការខិតខំប្រឹងប្រែងរបស់រាជរដ្ឋាភិបាល កម្ពុជាក្នុងការសាងសង់ផ្លូវ ស្ពាន ប្រឡាយទឹក សាលារៀន មន្ទីរពេទ្យ និងហេដ្ឋារចនាសម្ព័ននានា នៅក្នុងប្រទេស ជាពិសេសសមិទ្ធិផលដ៏មហាសាល នៅក្នុងស្រុកកោះធំនេះ មានដូចជា ផ្លូវជាតិលេខ២១ ផ្លូវជាតិលេខ១១០ និងស្ពានកោះធំ ព្រមទាំងស្ពានជ្រៃធំជាដើម…។ល។ ឯកឧត្ដមបានមានប្រសាសន៍ថា៖ សមិទ្ធិផលទាំងនេះ បានប្រសូត្រចេញពី សុខសន្តិភាពសង្គម និងសន្តិសុខនយោបាយ ក្រោមការដឹកនាំដ៏ឆ្លាតវៃរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
