ព្រឹកថ្ងៃទី៣០ ខែធ្នូ ឆ្នាំ២០១៥  នៅខេត្តកំពង់ឆ្នាំង ឯកឧត្តមរដ្ឋមន្ត្រី ត្រាំ អ៊ីវតឹក និងឯកឧត្តម ឈួរ ច័ន្ទឌឿន អភិបាលនៃគណៈអភិបាល  បានអញ្ជើញជាអធិបតី ក្នុងពិធីសំណេះសំណាល និងបំពាក់គ្រឿងឥស្សរិយយស ជូនមន្ត្រីរាជការចំនួន ៤៨រូប របស់មន្ទីរសាធារណការ និងដឹកជញ្ជូន ខេត្តកំពង់ឆ្នាំង ដែលបាន លះបង់កម្លាំងកាយ កម្លាំងចិត្ត ក្នុងការបម្រើជាតិ មាតុភូមិ។

រសៀលថ្ងៃទី៣០ ខែធ្នូ ឆ្នាំ២០១៥ ឯកឧត្តមរដ្ឋមន្ត្រី ត្រាំ អ៊ីវតឹក និងសហការី បានចុះពិនិត្យទីតាំងរៀបចំកន្លែងត្រួតពិនិត្យ បច្ចេកទេសយានយន្ត (ឈៀក) នៅមន្ទីរសាធារណការ និងដឹកជញ្ជូន ខេត្តកំពង់ស្ពឺ ។

រសៀលថ្ងៃទី៣០ ខែធ្នូ ឆ្នាំ២០១៥ ដដែល ឯកឧត្តមរដ្ឋមន្ត្រី ត្រាំ អ៊ីវតឹក និងសហការី បានចុះពិនិត្យការដ្ឋានសាងសងស្ពានព្រែកត្នោតទី២ នៅខេត្តកំពង់ស្ពឺ ដែលទទួលការសាងសង់ដោយមជ្ឈមណ្ឌល ជួសជុល និងថែទាំផ្លូវថ្នល់ របស់ក្រសួងសាធារណការ និងដឹក ជញ្ជូន ។

ព្រឹកថ្ងៃទី ១១ ខែមករា ឆ្នាំ២០១៦ នៅទីស្តីការក្រសួង ឯកឧត្តមរដ្ឋមន្រ្តី ត្រាំ អុីវតឹក បានអនុញ្ញាត្តអោយក្រុមការងារនៃទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ចូលជំនួបសំដែងការគួរសម និងពិភាក្សាការងារ ស្តីពីគំរោងធ្វើអោយប្រសើឡើងវិញនៃស្ពានមិត្តភាពកម្ពុជាជប៉ុនជ្រោយចង្វារ ។

ព្រឹកថ្ងៃទី១៣ ខែមករា ឆ្នាំ២០១៦ នៅទីស្តីការក្រសួង មានធ្វើពិធីចុះហត្ថលេខាលើកំណត់ហេតុប្រជុំពិភាក្សាគ្នា MOU លើគំរោងធ្វើឲ្យប្រសើទ្បើងវិញស្ពានមិត្តភាពកម្ពុជា ជប៉ុនជ្រោយចង្វា  រវាង ឯកឧត្តមរដ្ឋមន្ត្រី ត្រាំ អុីវតឹក  នឹងលោក KOIZUMI Yukihiro មន្ត្រីជាន់ខ្ពស់មកពី JICA H/Q Tokyo។ ក្រុមJica បានធ្វើការពិភាក្សាគ្នាជាមួយស្ថាប័នពាក់ពន្ឋ ជាមួយក្រុមអ្នកបច្ចេកទេស ក្រសួងសាធារណការ និងដឹកជញ្ជូន ហើយឈានទៅការចុះហត្ថលេខាលើ MOU នាព្រឹកនេះ ។ គំរោងនេះចាប់ផ្តើមសិក្សារៀបចំគំនូរប្លង់លំអិត  ឯកសារដេញថ្លៃ នឹងដេញថ្លៃឲ្យបានមុនឆ្នាំ២០១៦ ហើយដើមឆ្នាំ២០១៧នឹងចាប់ផ្តើម សាងសង់ ។ ដោយរយះពេលសាងសង់ ២ឆ្នាំ​ ។

យោងតាមលិខិតលេខ០៦សសរចុះថ្ងៃទី១៣ ខែមករា ឆ្នាំ២០១៦ ស្តីពី សេចក្តីសំរេចស្តីពីការលប់ចោលនូវកិច្ចព្រមព្រៀងសម្បទានរវាងរាជរដ្ឋាភិបាលនៃព្រះរាជាណាចក្រកម្ពុជានឹងក្រុមហ៊ុនអេហ្សិតឌីស្ទ្រីប្យូហ្សិន AZ Distrubution Co.  នៅល្ងាចថ្ងៃទី១៣ ខែមករា ឆ្នាំ២០១៦ នៅទីស្តីការក្រសួងមានបើកកិច្ចប្រជុំការងារ ក្រោមអធិបតីភាព ឯកឧត្តមរដ្ឋមន្រ្តី ត្រាំ អីវតឹក នឹងមានការចូលរួមពី ឯកឧត្តម លោកជំទាវ ជារដ្ឋលេខាធិការ អនុរដ្ឋលេខា អគ្គនាយក ប្រធាននាយកដ្ឋានជំនាញន តំណាងមកពីក្រសួងមហាផ្ទៃ តំណាងក្រុមហ៊ុនAZ  ។  ក្រសួងនឹងរៀបចំក្រុមការងារទៅទទួលប្រគល់នៅយប់នេះវេលាម៉ោង០០ ។  គ្រប់ស្ថានីយជញ្ជីងត្រូវគ្រប់គ្រងដោយរដ្ឋចាប់ពីម៉ោង០០នេះតទៅហើយអនុលោមតាមច្បាប់ផ្លូវថ្នល់ ។

នៅម៉ោង១០យប់ថ្ងៃទី១៣ ខែមករា ឆ្នាំ២០១៦  ប្រតិភូក្រសួងសាធារណការនឹងដឹកជញ្ជួនដឹកនាំដោយ ឯកឧត្តមរដ្ឋមន្ត្រី  ត្រាំអីវតឹក និងមន្ត្រីជំនាញបានចុះទៅធ្វើការប្រគល់ទទួលបញ្ជរបង់ប្រាក់ នឹងជញ្ជីងថ្លឹងរថយន្តនៅមុខសាសាស្រុកអង្គស្នួល  ជាមួយតំណាងក្រុមហ៊ុនAZ ។ ដោយទ្បែកបញ្ជរបង់ប្រាក់នៅពេជ្រនិល និងនៅអូរចំណារ ខេត្តព្រះសីហនុ នឹងស្ថានជញ្ជីងថ្លឹងរថយន្តទាំងអស់ត្រូវបានប្រគល់ទទួលដោយ ឯកឧត្តម លឹមស៊ី នីន រដ្ឋលេខាធិការ ជាមួយតំណាងក្រុមហ៊ុនAZ ផងដែរ ។ 

ព្រឹកថ្ងៃទី០៤ ខែកុម្ភៈ ឆ្នាំ២០១៦ ឯកឧត្តមរដ្ឋមន្ត្រី ត្រាំ អុីវតឹក បានដឹកនាំកិច្ចប្រជុំ ពិភាក្សាអន្តរក្រសួង ស្តីពី គម្រោងសិក្សា និងសាងសង់កំពង់ផែ ក្នុងស្រុក ដើម្បីតភ្ជាប់ផ្លូវនាវាចរណ៍ ។

ព្រឹកថ្ងៃទី១០ ខែកុម្ភៈ ឆ្នាំ២០១៦ គណៈប្រតិភូជំនាញបច្ចេកទេសស្ពាន ថ្នល់ នៃក្រសួងសាធារណការ និងដឹកជញ្ជូន ដឹកនាំដោយ ឯកឧត្តមរដ្ឋ មន្ត្រី ត្រាំ អ៊ីវតឹក បានអញ្ជើញចុះពិនិត្យស្ថានភាពកំណាត់ផ្លូវជាតិផ្នែកភូមិភាគឥសាន្ត ពិសេសនៃលក្ខណៈសម្បត្តិ ការស្ថាបនាលើកំណាត់ផ្លូវជាតិលេខ៧៦ ដែលទើបនឹងបានសាងសង់រួចរាល់ក្នុងឆ្នាំ២០១៥កន្លងមកនេះ ចាប់ពីចំណុចទីរួម ខេត្តមណ្ឌលគីរី ដល់ខេត្តរតនគីរី ប្រវែងសរុបជាង ១៧១គីឡូម៉ែត្រ ។

កំណាត់ផ្លូវជាតិលេខ៧៦នេះ បានចាប់​ផ្តើម​សាង​សង់​​នៅ​ថ្ងៃ​​​ទី២០​ ខែសីហា ឆ្នាំ២០១១ មានប្រវែង​សរុប​​​​​ជាង​១៧១គីឡូម៉ែត្រ ពីសែនមនោរម្យ-កោះ​ញែក ស្ថិត​ក្នុង​​ខេត្ត​មណ្ឌលគីរី រហូតដល់លំផាត់-តាអង្គ ស្ថិត​ក្នុង ខេត្តរតនគីរី ជាប្រភេទ​ផ្លូវ​ចាក់​ក្រាល​​កៅស៊ូ DBST សាង​សង់​ដោយ​ក្រុមហ៊ុនChina Roade and Bridge Corporation ដោយ​ប្រើប្រាស់គម្រោងថវិកាបដិភាគ ដៃគូរអភិ​វឌ្ឍន៍​ជាមួយកម្ពុជា ចំណាយ​ថវិកា​​​​សរុប​ចំនួន​ ៩១លាន ៦សែន​ ៨ម៉ឺន​ដុល្លារ​អាមេ​រិក មកដល់បច្ចុប្បន្ន​នេះ កំណាត់​ផ្លូវ​ជាតិលេខ​៧៦នេះ បាន​ស្ថាបនា​រួច​រាល់​ហើយ។

នៅក្នុងដំណើរនៃការអញ្ជើញចុះពិនិត្យនេះ ឯកឧត្តមរដ្ឋមន្រ្តី ត្រាំ អ៊ីវតឹក បានសង្កេតឃើញថា ការ​ស្ថាប​​នា​នៅ​លើកំណាត់ផ្លូវជាតិលេខ៧៦នេះ គឺនៅ​មានចំណុច​​​​​​​ខ្វះខាតមួយចំនួន លើលក្ខណៈ​សម្បត្តិ នៃការ​សាង​សង់ ដោយក្នុងឱកាសនេះ ឯឧរដ្ឋមន្ត្រី បានណែនាំដល់ក្រុមហ៊ុនជាអ្នកទទួល​បន្ទុកការងារ​សាង​សង់ ត្រូវ​ធ្វើ​​ការកែលម្អនៅលើចំណុចមួយចំនួន ក្នុង​​នោះរួមមាន ទី១ត្រូវធ្វើ​ការ​កែលម្អ​លូដែលនៅអម​សង្ខាង​ផ្លូវ​ឲ្យ​បានល្អ ដោយត្រូវគិតពីចរន្ត​ទឹក​ហូរ ទី២ត្រូវ​ដាក់​​ស្លាក​សញ្ញា​ចរាចរ និងធ្វើ​គំនួសផ្លូវឲ្យបានត្រឹមត្រូវ ទី៣នៅត្រង់ចំណុច​ផ្លូវ​កោង ត្រូវធ្វើការ​ពង្រីកចិញ្ចើមផ្លូវបន្ថែម ឲ្យបាន​ធំទូ​លាយ ជាពិសេសត្រូវដាក់​បង្គោល​​សុវត្ថិ​ភាព​បន្ថែមនៅ​ត្រង់​ចំណុច​ណាដែលកោងខ្លាំង និងទី៤នៅត្រង់​ចំណុចនៃជញ្ជាំងជម្រាលភ្នំ ត្រូវធ្វើ​ការ​សាង​សង់​ឡើង​វិញ បើពុំដូច្នេះទេ វានឹងអាច​បណ្តាលឲ្យមាន​ការ​រអិល​បាក់ដី មកលើផ្លូវថ្នល់ ដែល​​​​បណ្តាលឲ្យ​មាន​ការខូចខាតផ្លូវ និងអាចបង្ករនៅគ្រោះថ្នាក់ផ្សេងៗ ហើយ​​ក្នុងនោះ ចំពោះ​ស្ពាន ដែល​​មាន​លក្ខណៈ​កដប ត្រូវធ្វើការកែលម្អឡើងវិញផងដែរ។ គួរំលឹកថា តំបន់​ដែល​កំពុងធ្វើ​ការ​ស្ថាប​នា​ផ្លូវនេះ ពីមុនមក​ពុំ​ដែល​មានផ្លូវជាតិឡើយ ទើបតែបច្ចុប្បន្ន​នេះ ក្រោមការ​ដឹក​នាំប្រកប​ដោយ​កិត្តិ​បណ្ឌិត​របស់​សម្តេច​​តេជោ នាយក​រដ្ឋ​មន្ត្រី បាន​យកចិត្តទុកដាក់​ ក្នុង​ការ​​ស្ថាបនាផ្លូវ យ៉ាង​ប្រទាក់​ក្រឡា​គ្នា​នៅ​ទូទាំង​ផ្ទៃប្រទេស ហើយជាពិសេស​ទៅទៀតនោះ កំណាត់​ផ្លូវជាតិលេខ៧៦នេះដែរ ក៏ជាផ្លូវសេដ្ឋកិច្ចមួយដ៏សំខាន់ ពីព្រោះថា មាន​ភ្ញៀវ​ទេសចរណ៍​ជា​ច្រើន ដែល​បាន​ធ្វើ​ដំណើរមកកាន់តំបន់ភូមិភាគឥសាន្តនេះ ដើម្បីមកលេងកំសាន្តនៅតាម​តំបន់​​រម្មណីយ៍​ដ្ឋានទេស​ចរណ៍​ធម្មជាតិ នៅ​ទីនេះ និងជាផ្លូវពាណិជ្ជកម្ម សំរាប់ការដឹកជញ្ជូនទំនិញ ទៅកាន់​ប្រទេសជិតខាង ផងដែរ។

តមកនៅថ្ងៃដដែលនេះដែរ គណៈប្រតិភូជំនាញបច្ចេកទេសស្ពាន ថ្នល់ នៃក្រសួងសាធារណការ និងដឹកជញ្ជូន ដឹកនាំ​ដោយ ឯកឧត្តមរដ្ឋ មន្ត្រី ត្រាំ អ៊ីវតឹក​ បានអញ្ជើញចុះពិនិត្យស្ថានភាពនៃការខូចខាតផ្លូវ នៅលើកំណាត់ផ្លូវជាតិលេខ៧ ចាប់ពីគល់ស្ពានសេកុង រហូតដល់ច្រកព្រំដែនត្រពាំងគ្រៀល ព្រំដែនកម្ពុជា-ឡាវ ដែលមានការខូចខាតធ្ងន់ធ្ងរ​ប្រវែង​១០​គីឡូម៉ែត្រ លើប្រវែងសរុបជាង៦០គីឡូម៉ែត្រ ។

នៅក្នុងដំណើរនៃការចុះពិនិត្យនេះ ឯកឧត្តមរដ្ឋមន្ត្រី ត្រាំ អ៊ីវតឹក បានណែនាំឲ្យមន្ទីរសាធារណការ និងដឹកជញ្ជូន​ខេត្តស្ទឹងត្រែង ត្រូវធ្វើការសហការជាមួយនាយកដ្ឋានផ្លូវថ្នល់ នៃក្រសួងសាធារណការ និងដឹកជញ្ជូន ដើម្បីចុះសិក្សា​ឲ្យបានលំអិត ហើយលើកជាគម្រោងវាយតម្លៃឲ្យបានច្បាស់លាស់ ដើម្បីដាក់ជូនក្រសួងពិនិត្យ និងសម្រេច ឲ្យបាន​ទាន់​ពេលវេលា បើមិនដូច្នេះទេ ស្ថានភាពផ្លូវនេះ នឹងកាន់តែខូចខាតធ្ងន់ធ្ងរឡើងថែមទៀត។ឯឧរដ្ឋមន្ត្រី បានមាន​ប្រសាសន៍បញ្ជាក់ថា កំណាត់ផ្លូវជាតិលេខ៧ ចាប់ពីគល់ស្ពានសេកុង រហូតដល់ច្រកព្រំដែនត្រពាំងគ្រៀល ព្រំដែន​កម្ពុជា-ឡាវនេះ គឺជាផ្លូវសេដ្ឋកិច្ចមួយដ៏សំខាន់ ក្នុងការដឹកជញ្ជូនភ្ញៀវទេសចរណ៍  មកកំសាន្តទៅវិញទៅមក និងក៏​ជា​ផ្លូវពាណិជ្ជកម្ម  សំរាប់ដឹកជញ្ជូនទំនិញផងដែរ ៕

ព្រឹកថ្ងៃទី១១ ខែកុម្ភៈ ឆ្នាំ២០១៦  ក្នុងដំណើរបេសកកម្មចុះត្រួតពិនិត្យបណ្តាញផ្លូវ គណៈប្រតិភូជំនាញបច្ចេកទេសស្ពាន ថ្នល់ នៃក្រសួង​សា​ធារណការ និងដឹកជញ្ជូន ដឹកនាំ​ដោយ ឯកឧត្តមរដ្ឋ មន្ត្រី ត្រាំ អ៊ីវតឹក​ បានអញ្ជើញចុះពិនិត្យ ស្ថានភាពផ្លូវលេខ៩២ លេខ៩៤ កំពង់ផែរថ្មទន្លេរពៅ និងទីតាំងសាងសង់ស្ពានឆ្លងកាត់ទន្លេរពៅ ព្រំដែនកម្ពុជា-ឡាវ ។

កំណាត់ផ្លូវលេខ៩២ ចាប់ពីចំណុចផ្លូវបំបែកលេខ៩ ត្រង់សំអាង ស្រុកថាឡា​បរិវាត់​ ខេត្តស្ទឹងត្រែង រហូត​ដល់​ឃុំស្រឡៅ ស្រុកឆែប ខេត្តព្រះវិហារ ប្រវែងប្រមាណ៦៥គីឡូម៉ែត្រ បច្ចុប្បន្នផ្លូវនេះ ជាប្រភេទផ្លូវដី​ក្រហមនៅឡើយ ដោយឡែក កំណាត់ផ្លូវជាតិលេខ៩៤ ចាប់ពីទីរួមស្រុកឆែប ទៅកំពង់ស្រឡៅ ប្រវែងប្រមាណ៧០គីឡូម៉ែត្រ និងទីតាំង​សាងសង់ ស្ពានឆ្លងកាត់ទន្លេរពៅ ព្រំប្រទល់កម្ពុជា-ឡាវ ប្រវែងជាង១៤៥ម៉ែត្រ ព្រមទាំងបានចុះពិនិត្យ​កំពង់ផែថ្ម​ទន្លេ រ​ពៅ ដែល​ជា​អំណោយរបស់ប្រជាជន និងរដ្ឋាភិបាលជប៉ុន តាមរយៈជំនួយឧបត្ថម្ភទ្រង់​ទ្រាយតូចសន្តិ​សុខ​មនុស្ស​ជាតិ។

បណ្តាញគម្រោងសាងសង់ផ្លូវស្ពានខាងលើនេះ ដើម្បីតភ្ជាប់ការដឹកជញ្ជូន ផ្នែកសេដ្ឋកិច្ច រវាង ប្រទេសកម្ពុជា ទៅកាន់ប្រទេស​ឡាវ ប៉ុណ្ណោះទេ ថែមទាំងជាប៉ូលនៃតំបន់ទេសចរណ៍ធម្មជាតិយ៉ាងល្អប្រណិតថែមទៀត ដូចជានៅ​ខាង​ប្រទេសឡាវ មានតំបន់ប្រាសាទវត្តភូ  ខាងកម្ពុជាមានតំបន់ប្រាសាទព្រះវិហារ ព្រមទាំងរមណីយ៍ដ្ឋានព្រះនិមិត្រ ព្រះរំកិល និងអន្លង់ផ្សោត មិនតែប៉ុណ្ណោះបណ្តាញផ្លូវនេះ បានតភ្ជាប់មកផ្លូវជាតិ៩ ដល់ផ្លូវលេខ៦២ លេខ៦ តំបន់​ប្រាសាទព្រះវិហារ រហូតមកដល់ប្រាសាទអង្គរវត្ត ខេត្តសៀមរាប។

ឯកឧត្តមរដ្ឋមន្ត្រី ត្រាំ អ៊ីវតឹក បានណែនាំឲ្យមន្ទីរសាធារណការ និងដឹកជញ្ជូនខេត្តព្រះវិហារ សហការជាមួយ​នាយក​ដ្ឋានផ្លូវថ្នល់ ព្រមទាំងស្ថាប័នពាក់ព័ន្ធរៀបចំគម្រោងសាងសង់នេះឲ្យបានឆាប់រហ័ស មិនតែប៉ុណ្ណោះ ត្រូវគិតគូពីផ្ទៃដី​បំរុងទុក សំរាប់​​ការសាងសង់សំណង់នានាខាងលើនេះ ដើម្បីលើកជាគម្រោងដាក់ជូនរាជរដ្ឋាភិបាលពិនិត្យ និង​សម្រេច លើ​ការ​ស្ថា​បនា​ហេដ្ឋារចនាសម្ព័ន្ធទាំងនេះ។ ឯឧរដ្ឋមន្ត្រី ក៏បានកោតសរសើរដល់មន្ទីរសាធារណការ​ខេត្ត​ព្រះវិហារ និង​អគ្គ​នាយកដ្ឋានសាធារ​ណការ ដែលបានពុំពារ ឈួសឆាយបើកផ្លូវនេះ ឲ្យដំណើរការបាន ជា​បណ្តោះ​អាសន្ន ដែលពីមុនពុំដែលមានផ្លូវនេះទេ បច្ចុប្បន្នប្រជាពល​រដ្ឋ​​ដែល​រស់តំបន់ដាច់ស្រយាលនោះ អាចធ្វើដំណើរ និងដឹកយកកសិផលមកកាន់តំបន់ផ្សេងៗទៀតបាន រហូតមកដល់ទីរួមខេត្តទាំងមូល។ដោយឃើញពីគុណប្រយោជន៍ នៃបណ្តាញផ្លូវទាំងនេះ រាជរដ្ឋាភិបាលមានគម្រោងស្ថាបនាផ្លូវ ស្ពាន ដើម្បីតភ្ជាប់ជាមួយប្រទេសឡាវ សំដៅលើក​កម្ពស់​សក្តានុពលសេដ្ឋកិច្ច ទេសចរណ៍ ក្នុងតំបន់ នៃបណ្តាប្រទេសសហគមន៍អាស៊ានទាំងមូល។

តមកឯកឧត្តមរដ្ឋមន្ត្រី ត្រាំ អ៊ីវតឹក បានដឹកនាំគណៈប្រតិភូជំនាញបច្ចេកទេសស្ពាន ថ្នល់ នៃក្រសួង​សា​ធារណការ និងដឹកជញ្ជូន ជួបសាកសួរសុខទុក្ខ មន្ត្រីរាជការ និងពិនិត្យ​សំណង់​អគារ នៃមន្ទីសាធារណការខេត្តព្រះវិហារ ដែល​កំពុងដំណើរការសាងសង់បានប្រមាណ៩០%ហើយ ។

អគារនោះ មានទំហំ បណ្តោយ៣៥ម៉ែត្រ ទទឹង១២ម៉ែត្រ កំពស់២ជាន់ មានបន្ទប់បំរើការងារចំនួន១៣ បន្ទប់​សាល​​ប្រជុំចំនួន២ សាងសង់លើផ្ទៃដីប្រមាណជិត១ហិកតា ដែលមានរោងសម្រាប់រក្សាទុកគ្រឿងចក្រ និងអគារ​សម្រាប់​​បុគ្គលិកស្នាក់នៅថែមទៀត។ ឯកឧត្តមរដ្ឋមន្ត្រី ត្រាំ អ៊ីវតឹក បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ មន្ត្រីរាជការ នៃមន្ទីរសាធារ​ណការ​ខេត្តព្រះវិហារទាំងអស់ ដែលបានខិតខំប្រឹងប្រែងក្នុងការអនុវត្តការងារ នាពេល​កន្លងមកទទួលបានជោគជ័យ​គួរជាទី​មោទនៈ។ ទន្ទឹមនឹងនេះដែរ ដើម្បីឲ្យការអនុវត្តការងាររបស់យើងនាពេល​អនា​គត​កាន់​តែមានភាពប្រសើរឡើង ថែមទៀតនោះ ក្រៅពីការរៀបចំថែទាំ សម្ភារៈគ្រឿងចក្រផ្សេងៗ ចាំបាច់ត្រូវតែមាន​កត្តាសាមគ្គីភាពផ្ទៃក្នុងជាមូលដ្ឋាន ទើបអាចឲ្យដំណើរការនៃការអនុវត្តការងារប្រព្រឹត្តទៅប្រកបដោយប្រសិទ្ធភាព ដោយ​ស្របតាមកម្មវិធីនយោបាយ​របស់រាជរដ្ឋាភិបាលក្នុងការអភិវឌ្ឍន៍ប្រទេសជាតិ៕

ព្រឹកថ្ងៃទី១២ ខែកុម្ភៈ ឆ្នាំ២០១៦ ក្នុងដំណើរបេសកកម្ម ចុះត្រួតពិនិត្យបណ្តាញផ្លូវ គណៈប្រតិភូ ជំនាញបច្ចេកទេសស្ពាន ថ្នល់ នៃក្រសួង​សា​ធារណការ និងដឹកជញ្ជូន ដឹកនាំ​ដោយ ឯកឧត្តមរដ្ឋ មន្ត្រី ត្រាំ អ៊ីវតឹក​ បានអញ្ជើញចុះពិនិត្យស្ថានភាពផ្លូវតាណឺយ និង​ពិនិត្យ​ការដ្ឋានស្ថាបនាផ្លូវបេតុងពីអាងក្រពើ ដល់ភ្នំក្រោម និងផ្លូវវាង ក្រុងសៀមរាប ។

ផ្លូវ​​​តាណឺយ មានប្រវែង១៤៥០ម៉ែត្រ ទទឹង១៨ម៉ែត្រ ផ្លូវនេះមាន២គន្លង ដោយមានសួនច្បារនៅ​ចំកណ្តាល បច្ចុប្បន្ន ការស្ថាបនាសម្រេចបាន១០០%ហើយ ដែលអនុវត្តការសាងសង់ ​ដោយមន្ទីរ​សាធារ​ណ​ការ​ខេត្តសៀមរាប ​​ប្រើ​ប្រាស់គម្រោងថវិកាជាតិ ក្នុងផែន​ការឆ្នាំ​២០១៥ ជាង២ពាន់លាន់រៀល។   ដោយឡែក​ការងារ​សាងសង់ផ្លូវ​បេតុង​១​កន្លែង ប្រវែង​៦គីឡូម៉ែត្រ ទទឹង៨ម៉ែត្រ    ព្រមទាំងលូកាត់ទទឹងផ្លូវ​ចំនួន៧កន្លែង ​និង​លូទឹក​តាមបណ្ដេយ​ផ្លូវ​៣កន្លែង ស្ថិត​​លើ​ផ្លូវ​ជាតិ​លេខ៦៣ ក្នុងក្រុងសៀមរាប ពីចំណុច​អាងក្រពើ ដល់​ភ្នំក្រោម​ មកដល់ពេលនេះការងារ​សាងសង់​សំរេច​បាន៨០%ហើយ​ ដែល​ការងារសាង​សង់នេះអនុវត្ត​ដោយ​ក្រុមហ៊ុន​វិស្វកម្ម​សំណាងខន់ស្ត្រាក់សិន  ដែល​មាន​ទឹក​ប្រាក់​ចំនួនជាង​២លានដុល្លារអាមេរិក​។ ​រីឯការងារស្ថាបនា ផ្លូវវាងក្រុងសៀមរាប ស្ថិតនៅលើ​ផ្លូវខេត្ត​លេខ២៦៥F ភ្ជាប់ពីផ្លូវ​ជាតិ​លេខ៦​ ទៅរកផ្លូវជាតិលេខ​៦៣ ប្រវែង​១១ គីឡូ​ម៉ែត្រ២០០ម៉ែត្រ ទទឹង៨ម៉ែត្រ ត្រូវ​សាងសង់ជាប្រភេទផ្លូវក្រាលកៅ​ស៊ូពីរជាន់(DBST)។ ​ការងារ​សាង​សង់​នេះ​​អនុវត្តដោយ​ក្រុមហ៊ុន Banteay Srei Engineering & Construction Co., Ltd. ចំណាយថវិកាអស់​ប្រមាណ​​ជាង​២លាន​ដុល្លារ​អាមេរិក។​ការសាង​​សង់​បានចាប់ផ្ដើមពី ចុងខែកុម្ភៈឆ្នាំ២០១៥ដល់ចុង​ខែមេសា​ឆ្នាំ២០១៦ មានរយះពេល ១៤ខែ។ បច្ចុប្បន្ននេះ ការសាងសង់សម្រេចបានប្រមាណ៦៥%ហើយ។​គម្រោង​សាង​សង់ផ្លូវបេតុង និងផ្លូវវាងក្រុងសៀមរាប ទាំងពីរ​ខាង​លើ​នេះ ស្ថិតនៅក្រោមគម្រោងស្តារឡើងវិញ​បន្ទាន់​នូវហេ​ដ្ឋា​​រចនា​សម្ព័ន្ធ​​រូបវន្ត​ខូចខាតដោយទឹកជំនន់ឆ្នាំ២០១៣ ក្រោមហិរញ្ញប្បទានដោយ​នាគារអភិវឌ្ឍន៍​អាស៊ី (ADB) និងជំនួយ​ឥត​សំណង​​របស់រដ្ឋាភិបាលប្រទេសអូស្រ្តាលី​តាមរយៈធនាគារ​អភិវឌ្ឍន៍​អាស៊ី​(ADB)។

នៅក្នុងដំណើរនៃការចុះពិនិត្យនេះ ឯកឧត្តមរដ្ឋមន្ត្រី ត្រាំ អ៊ីវតឹក បានមានប្រសាសន៍ថា ដោយមើលឃើញ​ពីគុណ​ប្រយោជន៍ នៃបណ្តាញផ្លូវទាំងនេះ រាជរដ្ឋាភិបាលបានសម្រេចស្ថាបនាបណ្តាផ្លូវទាំងអស់នេះឡើង គឺដើម្បីសម្រួល​ដល់​ការកកស្ទះចរាចរណ៍ នៅក្នុងខេត្ត និងដើម្បីតភ្ជាប់ជាមួយបណ្តាប្រទេសជិតខាង សំដៅលើក​កម្ពស់​សក្តានុ​ពល​សេដ្ឋកិច្ច ទេសចរណ៍ និងក៏ជាផ្លូវពាណិជ្ជកម្មមួយដ៏សំខាន់ផងដែរ សំរាប់ការដឹកជញ្ជូនទំនិញ ទៅកាន់​ប្រទេស​ជិត​ខាង ក្នុងតំបន់ នៃបណ្តាប្រទេសសហគមន៍អាស៊ានទាំងមូល។  ឯកឧត្តមរដ្ឋមន្ត្រី បានមានប្រសាសន៍បញ្ជាក់ថា រាជរដ្ឋា​ភិ​បាលក្រោមការដឹកនាំប្រកបដោយកិត្តិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋ​មន្ត្រី​នៃ​ព្រះ​រាជាណាចក្រកម្ពុជា បានយកចិត្តទុកដាក់ទៅលើការកសាងហេដ្ឋារចនាសម្ព័ន្ធផ្លូវ ស្ពាន យ៉ាងប្រទាក់ក្រឡាគ្នា នៅ​ទូទាំងប្រទេស និងដោ​យបានចាត់ទុកថា ផ្លូវ និងស្ពាន គឺជាសរសៃឈាម​មួយដ៏សំខាន់​ក្នុងការចូលរួមចំណែក​អភិ​វឌ្ឍន៍​​ប្រទេសជាតិ។ នៅក្នុងឱកាសនេះដែរ ឯឧរដ្ឋមន្ត្រី ត្រាំ អ៊ីវតឹក ក៏បានជំរុញឲ្យ​អ្នក​ទទួលបន្ទុក​សាងសង់​ធ្វើយ៉ាង​ណា​ស្ថាប​​​នា ឲ្យបាន​ទាន់​ពេល​វេលានៃ​កិច្ចព្រមព្រៀងដែលបានកំណត់ ជាពិសេសលើការស្ថាបនា គឺត្រូវគោរព​ទៅតាម​លក្ខណៈ​បច្ចេក​​ទេសស្តង់​ដារ​​​អន្តរជាតិ ដើម្បីឲ្យមានគុណល្អ ប្រើប្រាស់បានយូរអង្វែង។ ទន្ទឹមនឹងនេះ គឺត្រូវ​ដាក់ស្លាក់សញ្ញា​នៅគ្រប់​ការ​​ដ្ឋានសាង​សង់ទាំង​អស់ ដើម្បីបញ្ជៀសនូវការកកស្ទះចរាចរណ៍ និងគ្រោះថ្នាក់ចរាចរ​ណ៍ដល់​ប្រជាពល​រដ្ឋ​​ដែល​ធ្វើដំណើរទៅមក៕

ព្រឹកថ្ងៃទី១២ ខែកុម្ភ: ឆ្នាំ២០១៦ ដដែល ឯកឧត្តមរដ្ឋមន្ត្រី ត្រាំ អុីវតឹក និងសហការី បានបន្តដំណើរចុះពិនិត្យការដ្ឋានសាងសង់ក្រាលបេតុង កៅស៊ូ (AC) ផ្លូវជាតិលេខ៦ ពីថ្នល់កែងដល់អង្គ្រង ខេត្តសៀមរាប ប្រវែង ២៤៧,៧០គម បច្ចុប្បន្ននេះសម្រេចលទ្ធផលបាន ៨២.៤២ % ។

ព្រឹកថ្ងៃទី១៥ ខែកុម្ភៈ ឆ្នាំ២០១៦ នៅទីស្តីការក្រសួង  ឯកឧត្តម រដ្ឋមន្ត្រី ត្រាំ អ៊ីវតឹក ដឹកនាំការកិច្ចប្រជុំលើកទី១ របស់គណៈកម្មាធិការសម្របសម្រួលនាវាចរណ៍ មេគង្គកម្ពុជា ។

ព្រឹកថ្ងៃទី១៦ ខែកុម្ភៈ ឆ្នាំ២០១៦ ឯកឧត្តមរដ្ឋមន្ត្រី ត្រាំ អ៊ីវតឹក បានដឹកនាំកិច្ចប្រជុំ ស្តីពី ការពង្រឹងការងារសុវត្ថិភាពចរាចរណ៍ផ្លូវគោក ដើម្បីរំលេចអំពីសកម្មភាពរបស់អនុគណៈកម្មការគោលនយោបាយ និងផែនការយុទ្ធសាស្ត្រសុវត្ថិភាពចរាចរណ៍ផ្លូវគោក ហៅថា (អនុគណៈកម្មការទី១) និងអនុគណៈកម្មការត្រួតពិនិត្យការអនុវត្តច្បាប់ស្តីពីចរាចរណ៍ផ្លូវគោក ហៅថា(អនុគណៈកម្មការទី២) ដែលនឹងប្រគល់ភារកិច្ចឱ្យនគរបាលត្រួតពិនិត្យឯកសារយានយន្ត នៅតាមបញ្ជរបង់ប្រាក់របស់ក្រុមហ៊ុន AZ ដោយរួមបញ្ចូលប្រធានបទសុវត្ថិភាពចរាចរណ៍ ទៅក្នុងគោលនយោបាយភូមិ-ឃុំ មានសុវត្ថិភាព ក្នុងការអប់រំផ្សព្វផ្សាយច្បាប់ បទដ្ឋាន ការបំពាក់ ស្លាកសញ្ញាចរាចរណ៍ ការពង្រីក និងជួសជុល ថែទាំ ការសង្គ្រោះ ជនរងគ្រោះ ។

នៅព្រឹកថៃ្ងទី២៣ ខែកុម្ភៈ ឆ្នាំ២០១៦ នៅទិស្តីការក្រសួង ឯកឧត្តមរដ្ឋមន្ត្រី ​ត្រាំ អ៊ីវតឹ​ក  បានអនុញ្ញាតិឲ្យ គណៈប្រតិភូខេត្តហ៊ឺ​ណា​ន​សាធារណៈរដ្ឋប្រជាមានិតចិនចូលជួបសំដែងការគួរសម និងភាក្សាការងារ ​។

នៅក្នុងជំនួបនេះ ឯកឧត្តម ​ត្រាំ អ៊ីវតឹ​ក បាន​ថែ្លង​អំណរ​គុណយ៉ាងជ្រាល​ជ្រៅ​ចំពោះរដ្ឋាភិបាលនៃសា​ធារណៈរដ្ឋប្រជា​មានិត​ចិន​ ដែលតែងតែបន្តការផ្តល់ជំនួយនិងធ្វើកិច្ចសហប្រតិបត្តិការយ៉ាងជិតស្និតជាមួយកម្ពុជាលើគ្រប់វិស័យជាពិសេសខាង​ផ្នែកប្រព័ន្ធ​ហេ​ដ្ឋា​​រចនា​សម្ព័​ន្ធ​ផ្លូវថ្នល់ លើវិស័យសាធារណៈការ និងដឹកជញ្ជូនគឺជាមធ្យោបាយ ដែលអាចឱ្យកម្ពុជា​មានលទ្ធភាព​កសាងនិងអភិវឌ្ឍ​ប្រទេស​​ដោយខ្លួនឯងបាន។ ឯកឧត្តមរដ្ឋមន្ត្រី ​បានបញ្ជាក់ថា បច្ចុប្បន្ននេះ កម្ពុជាមានផ្លូវស្ពានខ្វាត់ខ្វែងចាប់​ពីទីក្រុងរហូត​ដល់​ជនបទ​និង​​លាត​សន្ធឹ​ង​​​ទៅដល់ព្រំដែននៃប្រទេស និងក៏កំពុងកសាងជាបន្តបន្ទាប់ទៀតជាជំហានៗ​ ដើម្បី​បំរើ​​ឱ្យសេចក្តីត្រូវការជាក់​ស្តែង​នូវ​ចំនួនយានយន្តកាន់តែច្រើនក្នុងការធ្វើចរាចរណ៍ដឹកជញ្ជូននិងការទំនាក់ទំនង ហើយថ្មីៗនេះសម្តេចអគ្គមហាសេនាបតីតេជោ ហ៊ុន សែន ប្រមុខនៃរាជ​រដ្ឋាភិ​បាល​កម្ពុជា ក៏បានឯកភា​ពរួចហើយស្តីពី​ការ​អភិវឌ្ឍផ្លូវល្បឿន លឿននៅកម្ពុជា ដែលជាជំហាន​ដំបូងនេះ​​វិទ្យាសា្ថន​ស្រាវជ្រាវគម្រោង​ប្លង់នៃមន្ទីរ​សា​​​ធា​​​​រ​ណៈការ និងដឹកជញ្ជូនខេត្ត​ហឺណាន​សាធារ​ណៈ​​​រ​ដ្ឋ​​​ប្រជាមានិត​ចិ​ន​ មានគម្រោងនឹងសាង​សង់​មុន​គេ​នូវផ្លូវល្បឿនលឿននេះដែល​​ប្រវែង​​​​​​ប្រមាណ​៩,៣៥៨km ពីចំនុច​ព្រះសត្យមុន្នី​ចេតី​យ៍​​ខាង​មុខ​ស្ថានីយ៍រថភ្លើង​ទីក្រុងភ្នំពេញ ​​​ស្រប​តាម​ផ្លូវដែក​ឆ្ពោះទៅដល់ អាកាសយាន​ដ្ឋានអន្តរជាតិ​ភ្នំពេញក្នុងតំបន់​ពោ​ធិ​​​​​ចិន​តុង។​

លោក ចាវ ជៀនឆាយ (Zhao jian chhai) ​អភិបាល​រង​ខេត្ត​ហ៊ឺ​ណា​​​ន​បានគូសបញ្ជាក់ថា​ខេត្តហ៊ឺណានមានក្រុម​ហ៊ុនធំៗ​ចំនួន៦ដែលបា​ននឹងកំពុងវិនិយោគ​នៅ​កម្ពុ​ជា ​ក្នុងនោះមានទំហំ​ទឹក​​ប្រាក់​ចំនួនជាង១០០លានដុល្លាអាមេរិក ក្នុងនោះមានផ្លូវល្បឿន​លឿនផ្លូវជាតិ៩៥ ​និង​តំបន់​​ផ្លូវថ្នល់ជាច្រើនកន្លែងទៀតនៅក្នុងប្រទេសកម្ពុជា បន្ទាប់ពីខេត្ត​ហ៊ឺណាន​បានចុះហត្ថ​លេខាជា​មួយ​ភាគី​ខាង​ក្រសួងសាធារណៈការនិរដឹកជញ្ជូនកាលពីឆ្នាំ២០១២កន្លង​មកនេះ។ ​ឆ្លងតាមរយៈនៃដំណើរទស្សនៈកិច្ចរបស់គណប្រតិភូ​ខេត្ត​​ហ៊ឺ​ណាននៅកម្ពុជាពេលនេះ ឯកឧត្តម ​រដ្ឋមន្ត្រីក៏បានធ្វើការឯកភាពនូវសំណើរ​របស់ភាគីខេត្តហ៊ឺណានដែល​សុំឱ្យមាន​ការ​ធ្វើទស្សនៈកិច្ចរបស់គណប្រតិភូកម្ពុជាទៅខេត្តហ៊ឺណាននាពេលណាមួយដែលចាំបាច់។

តំណាង​ក្រុមការ​ងារនៃភាគីចិនបានឲ្យដឹងថា៖ វិទ្យា​សា្ថ​ន​បានយល់ព្រមស្តីពី​ការ​សាង​សង់​នេះ។ គម្រោងនៃការសាងសង់ ផ្លូវអាកាសល្បឿនលឿន ក្នុង​​​​​ជំហានដំបូងនេះ​ធ្វើ​ឡើង បន្ទាប់​ពីវិទ្យា​ស្ថា​​​​ន​​បានបញ្ចប់​កិច្ចការរបស់ខ្លួន សី្តពីការពង្រៀង​នៃ​កា​​រ​​បង្កើត​ប្លង់​មេផ្លូវ​ល្បឿ​ន​​​លឿននៅកម្ពុជា   និងបញ្ចប់​ឯក​សា​​​​​រ​​ប្ល​ង់​​​​​មេ​នេះ កាលពី​ខែមេសា  ​ឆ្នាំ​២​​០​​​១​​៤។  លោក ​បាន​បញ្ជាក់ទៀតថា ក្រុម​​​ហ៊ុន នឹង​​ធ្វើកុងត្រាចាប់​ដំណើរ​​​ការ​បើក​ការដ្ឋាន​សាងសង់ក្នុងពេលឆាប់ៗខាងមុខនេះ ក្រោយពីមានការឯកភាពពីក្រសួង​សា​ធារ​ណៈ​​ការនិង​ដឹក​ជញ្ជូន​ជាមុនសិន។ ឯកឧត្តមរដ្ឋមន្ត្រី បានមានប្រសាសន៍ទៀតថា គម្រោងការ​វិនិយោគ​លើ​វិស័យ​សាធារ​ណៈការ​នៅ កម្ពុជារបស់វិទ្យាសា្ថននាពេលនេះ គឺជាគោលនយោបាយ​នៃ​យុទ្ធសាស្ត្រ​របស់ប្រទេសជាមិត្ត និង​ជា​ដៃ​គូរ​អភិវឌ្ឍមិនខ្វះបាន​សំរាប់កម្ពុជាដែល​សម្តេចអគ្គ​មហាសេនាបតីតេជោហ៊ុនសែននាយករដ្ឋមន្ត្រី​នៃព្រះរាជាណាចក្រកម្ពុជា​បានផ្តល់​អទិភាពយ៉ាង​ខ្ពស់បំផុត លើបណ្តាញផ្លូវល្បឿនលឿន​នៅ​កម្ពុជាដើម្បីរួមចំណែក​ជួយ​ជម្លៀស​​​ការកកស្ទះ​ចរាចរនៅក្នុងទីក្រុងនិងទីប្រជុំជនធំៗ ស្រប​តាមសភាពការ​វិវត្តន៍រីកចំរើន ខាង​វិស័យសេដ្ឋ​កិ​ច្ច​ពាណិជ្ជកម្មមានការលំហូរចូលយ៉ាងច្រើនចំនួនយាន​យន្តនិងទេសចរនៃ​ប្រទេស៕

ក្រោយពីរាជរដ្ឋាភិបាល បានសម្រេចដកយកកំណាត់ផ្លូវជាតិលេខ៤ពីការគ្រប់គ្រង​របស់​ក្រុម​ហ៊ុនAZ​ ដើម្បី​បញ្ចប់​​នៅការបង់ប្រាក់ ពីការធ្វើចរាចរណ៍ឆ្លង កាត់ទៅមកលើកំណាត់ផ្លូវជាតិលេខ៤ មក​ឲ្យក្រសួងសាធារណការ និងដឹកជញ្ជូន ជាអ្នកគ្រប់គ្រងវិញនោះ  ថ្ងៃទី២៨ ខែកុម្ភៈ ឆ្នាំ២០១៦ នាចុងសប្តាហ៍ កន្លងមកនេះ គណៈប្រតិភូជំនាញបច្ចេកទេសស្ពាន ថ្នល់ នៃ​ក្រសួង​​សា​ធា​រ​ណការ និងដឹកជញ្ជូន ដឹកនាំ​ដោយ ឯកឧត្តមរដ្ឋមន្ត្រី ត្រាំ អ៊ីវតឹក​ បានអញ្ជើញ ចុះពិនិត្យ ដោយផ្ទាល់​ពីស្ថាន​ភាព​នៃការពង្រីកផ្លូវ ថ្នល់ នៅលើកំណាត់​ផ្លូវជាតិ​លេខ៤។

ការចុះពិនិត្យស្ថានភាពនៃការពង្រីកផ្លូវនៅលើកំណាត់ផ្លូវជាតិលេខ៤នេះ គឺកំណាត់ទី១ ចាប់ផ្តើមពី​ចំណុចPK 39+860 ដល់PK40+380 មានប្រវែង៥២០ម៉ែត្រ ទទឹង៨ម៉ែត្រ ដោយនៅលើកំណាត់ទី១នេះ ការងារក្រួសក្រហមសំរេច បានប្រមាណ៧០%។ដោយឡែក កំណាត់ទី២ ចាប់ពីចំណុចPK 42+100 ដល់PK43+740 ប្រវែង៨៥០ម៉ែត្រ ទទឹង​៩ម៉ែត្រ ហើយការងារដែលសម្រេចបាននៅលើកំណាត់ទី២នេះ គឺបានចាក់ដីសតួថ្នល់ បាន១០០%ហើយ និងកំណាត់​ទី៣  ចាប់ពីចំណុចPK 104+100 ដល់PK104+700 មានប្រវែង៦០០ម៉ែត្រ ទទឹង៥ម៉ែត្រ។ រីឯកំណាត់ទី៤ ចាប់ពី​ចំណុចPK 195+080 ដល់PK196+570 មានប្រវែង១៦០ម៉ែត្រ ទទឹង២ម៉ែត្រកន្លះ ហើយលើការងារដែលសម្រេចបាន រួមមាន ការងារក្រួសក្រហម ការងារថ្មម៉ិច និងការងារDBSTសំរេចបាន១០០%។ នៅលើកំណាត់ផ្លូវ​ជាតិ​លេខ៤​នេះ​ដែរ គណៈប្រតិភូជំនាញបច្ចេកទេសស្ពាន ថ្នល់ បានអញ្ជើញពិនិត្យស្ថានភាពផ្លូវបេតុង នៅត្រង់ចំណុចនៃចំណោទ​ពេជ្រ​​និល លោកយាយម៉ៅ ទៅកាន់ខេត្តព្រះសីហនុ ដែលត្រូវស្ថាបនាជាផ្លូវបេតុងបន្តពីផ្លូវបេតុង​ចាស់ប្រវែង​៦០០​ម៉ែត្រ​បន្ថែមទៀត ដើម្បីបង្ករលក្ខណៈ ងាយស្រួលដល់ការដឹកជញ្ជូនទៅមកសម្រាប់រថយន្តធន់ធំ។ ការងារសាងសង់នេះ អនុវត្តដោយមជ្ឈមណ្ឌលជួសជុល និងថែទាំផ្លូវថ្នល់ ដោយប្រើប្រាស់ គម្រោងថវិកាជាតិ ហើយការងារនេះបាន​ចាប់​ផ្តើមសាង​សង់ពីថ្ងៃទី២៧ ខែកុម្ភៈ ឆ្នាំ២០១៦។

តមកនៅថ្ងៃដដែលនេះដែរ គណៈប្រតិភូជំនាញបច្ចេកទេសស្ពាន ថ្នល់ បានអញ្ជើញចុះពិនិត្យស្ថានភាពនៃ​ការ​ពង្រីកផ្លូវ នៅក្នុងទីរួមខេត្តកែប ចាប់ពីចំណុចសេះស ដែលមានទទឹង៣៣ម៉ែត្រ ដោយមានសួនច្បារនៅចំកណ្តាល។ បច្ចុប្បន្ននេះ នៅលើកំណាត់ផ្លូវនេះ ការងារពង្រីកផ្លូវដែលសម្រេចបាន មានប្រវែង១៨០០ម៉ែត្រ ដោយក្នុងនោះ​បាន​ចាក់​ក្រាលកៅស៊ូ បានប្រវែង១២០០ម៉ែត្រ ជាប្រភេទផ្លូវអេស៊ី(AC) សរុបមកនៅលើកំណាត់ផ្លូវនេះ បានចាក់ក្រាល​ក្រៅស៊ូ សម្រេចបាន៤គីឡូម៉ែត្រ២០០ម៉ែត្រ។ ការងារសាងសង់នេះអនុវត្តន៍ដោយមន្ទីរសាធារណការ និងដឹកជញ្ជូន ខេត្តកែប ដោយប្រើប្រាស់គម្រោងថវិកាក្នុងផែនការឆ្នាំ២០១៥-២០១៦។

នៅក្នុងដំណើរនៃការចុះពិនិត្យនេះ ឯកឧត្តមរដ្ឋមន្ត្រី ត្រាំ អ៊ីវតឹក បានណែនាំដល់អ្នក​ទទួលបន្ទុកសាងសង់ ត្រូវ​ចាក់​ដី នៅត្រង់ចំណុចផ្លូវកោងឲ្យបានធំទូលាយ ល្អ និងត្រូវធ្វើការកិនបង្ហាប់ស្រទាប់គ្រឹះបាតក្រោមឲ្យបានហាប់ណែនល្អ ជាពិសេសត្រូវធ្វើ​ការជ្រើសរើសកៅស៊ូ ដែលមានគុណភាពល្អ មុននឹងចាប់ផ្តើម ចាក់ក្រាលកៅស៊ូ លើសពីនេះទៀត នៅត្រង់ចំណុច​នៃ​ការតភ្ជាប់មុខតំណរនីមួយៗ ត្រូវធ្វើការសាងសង់ឲ្យបានស្អាតល្អ ជៀសវាងមានលក្ខណៈខ្ពស់ទាប ហើយលើ​ការ​ងារ​ស្ថាបនានេះដែរ គឺត្រូវ​គោរពទៅ​តាមបទ​ដ្ឋាន​បច្ចេក​ទេសនៃ​ស្តង់​ដារអន្តរជាតិ ដើម្បីឲ្យទទួល​បាននូវ​ប្រសិទ្ធិ​ភាព និង​គុណភាព​ខ្ពស់ រួមទាំងត្រូវគិត​ពី​សោភ័ណ្ឌ​ភាព​ឲ្យ​បាន​ល្អ ជាពិសេសនៅត្រង់ចំណុចដែលធ្លាប់​តែមាន​គ្រោះ​ថ្នាក់យឹកញាប់ គឺត្រូវធ្វើការសិក្សា និងកែលម្អ ឲ្យបានឆាប់រហ័ស ដើម្បីជៀសវៀងកើត មានឡើងនូវគ្រោះថ្នាក់​ចរាច​រណ៍ជាថ្មីទៀត​។ នៅក្នុងឱកាសនេះ ឯឧ ត្រាំ អ៊ីវតឹក ក៏បានណែនាំដល់បណ្តាមន្ទីរសាធារណការខេត្តកណ្តាល ខេត្តកំពង់ស្ពឺ និងខេត្តព្រះសីហនុ ត្រូវធ្វើការថែទាំផ្លូវ ថ្នល់ ស្ពាន នៅក្នុងដែនសមត្ថកិច្ចរបស់ខ្លួនឲ្យបានជាប់ជាប្រចាំ ជាពិសេសត្រូវធ្វើការត្រួតពិនិត្យនៅតាម ទីតាំងនៃជញ្ជីងនីមួយៗរបស់ខ្លួន ដោយត្រូវធ្វើថែទាំ និងសម្អាតឲ្យ​បាន​ស្អាត​ល្អ។ដោយឡែក ចំពោះការស្ថាបនាផ្លូវ នៅក្នុងទីរួមខេត្តកែប ឯឧរដ្ឋមន្ត្រី បានណែនាំដល់​មន្ទីរសា​ធារ​ណការ និងដឹក​ជញ្ជូន​ខេត្តកែប ត្រូវធ្វើការសាងសង់ដោយ គោរពទៅ​តាមបទ​ដ្ឋាន​បច្ចេក​ទេសនៃ​ស្តង់​ដារអន្តរជាតិ ដើម្បីឲ្យទទួល​បាន​នូវ​​ប្រសិទ្ធិ​ភាព និង​គុណភាព​ខ្ពស់ រួមទាំងត្រូវគិត​ពី​សោភ័ណ្ឌ​ភាព​ផងដែរ ជាពិសេស ត្រូវដាក់​ស្លាក​សញ្ញាចរាចរណ៍​ឲ្យ​បានត្រឹមត្រូវ ព្រមទាំងគូស គំនូសផ្លូវឲ្យបានល្អ ពីព្រោះថា ផ្លូវនេះ គឺជាផ្លូវសេដ្ឋកិច្ចមួយដ៏សំខាន់ ដែល​មានភ្ញៀវទេស​ចរណ៍ធ្វើដំណើរឆ្លងកាត់មកកំសាន្តនៅតំបន់ទេសចរណ៍ធម្មជាតិ នេះផងដែរ។ ឯឧ ត្រាំ អ៊ីវតឹក បាន​​មានប្រសាសន៍​បញ្ជា​​ក់​ថា លើការងារស្ថាបនាផ្លូវ ថ្នល់ ស្ពាន គឺក្រសួងមានផែនការ ធ្វើការសាងសង់រហូត ទៅតាម​គម្រោងថវិកាជាតិ។ ក្នុងឱកាសនេះ ឯឧរដ្ឋមន្ត្រី ត្រាំ អ៊ីវតឹក ក៏បាន​ជំរុញ​​ឲ្យអ្នក​ទទួល​បន្ទុក​សាងសង់ ត្រូវដាក់​ស្លាក់​សញ្ញា ភ្លើង​សំគាល់ នៅ​គ្រប់​ការ​ដ្ឋាន​សាង​សង់នីមួយៗ ឲ្យបានជាប់​ជាប្រចាំ ដើម្បី​សម្រួលដល់​ការ​កក​ស្ទះ​ចរាចរណ៍ និង​គ្រោះ​ថ្នាក់​ចរាចរណ៍ នៅពេល​បងប្អូនប្រជាពលរដ្ឋ​ធ្វើ​ដំណើរ​ទៅ​មក៕

ព្រឹកថ្ងៃទី០១ ខែមីនា ឆ្នាំ២០១៦ ឯកឧត្តមរដ្ឋមន្ត្រី បានដឹកនាំគណៈប្រតិភូសាធារណការចុះពិនិត្យទីតាំងដាក់ជញ្ជីងនៅខាងកើតស្ពានហ្សឺបាសា នឹងកន្លែងដែលរថយន្តបង្កហេតុធ្វើឲ្យខូចខាតកន្លងមក។

នៅរសៀល នាថ្ងៃទី០១ ខែមីនា ឆ្នាំ២០១៦ ឯកឧត្តមរដ្ឋមន្ត្រី បានអញ្ជើញជាអធិបតីភាព ក្នុងកិច្ចប្រជុំជាមួយ ក្រុមហ៊ុនសាងសង់ចិន សៀង ហៃ ដើម្បីពិនិត្យលើលក្ខណៈ បច្ចេកទេស និងគុណភាពផ្លូវជាតិលេខ៦ នៅទីស្តីការក្រសួង

នៅវេលាម៉ោង ១៦:៣០នាទី នាថ្ងៃទី០១ ខែមីនា ឆ្នាំ២០១៦ នៅទីស្តីការក្រសួង ឯកឧត្តមរដ្ឋមន្ត្រី ត្រាំ អ៊ីវតឹក បានជួបសំណេះសំណាលជាមួយគណៈប្រតិភូជប៉ុន ដឹកនាំដោយ Mr. Norio Yamaguchi, Chairman of the International Friendship Exchange Council (FEC) Japan-ASEAN Culture and Economic Exchange Committee, and Senior Corporate Adviser and Former Chairman of AJINOMOTO Co.,INC., ដើម្បីស្វែងយល់ពីការអភិវឌ្ឍន៍ ហេដ្ឋារចនាសម្ព័ន្ធ ផ្លូវថ្នល់ និងស្ថានភាពការវិនិយោគ និងបរិយាកាសអាជីវកម្ម នាពេលបច្ចុប្បន្ននៅក្នុងប្រទេសកម្ពុជា   ។